إن كنت تبحث عن فرصة عمل في الخارج وخاصة في السعودية، لأن السلطات هناك تعمل على مشروع سيوفر أكثر من 100 ألف فرصة عمل وكلمة السر “الزراعة”.
إيه هى فرص العمل المتاحة في السعودية؟ وازاي نقدر نسافر لها؟ كل ده واكتر هنعرفه مع بعض في التقرير التالي:
المملكة العربية السعودية شغالة اليومين دول على استراتيجية جديدة لخلق استثمارات كبيرة في المملكة واللى بدورها هتصب فى صالح المصريين، وعلى حسب كلام المسؤولين السعوديين الاستثمارات دى هتوفر ما لا يقل عن 100 ألف وظيفة فى مجالات كتير أهمها الزراعة.
وزى ما قال وزير البيئة والمياه والزراعة السعودي المهندس عبد الرحمن بن عبد المحسن الفضلي، واللى قال إنه يجري الآن الاستعداد لاستثمار أكثر من 52 مليار ريال سعودى لتحقيق مستهدفات الاستراتيجية الوطنية للبيئة، ومن المتوقع أن تخلق استثمارات للقطاع الخاص وفرص عمل لأكثر من 100 ألف شخص.
يمكن للمصريين العمل فيها فى الجزء الذي يخص الزراعة، بصفتهم العمالة الأمهر والأكثر خبرة في الجزء ده، ده طبعا بخلاف قطاعات البيئة والمياه، بس فى الأغلب الشغل المتوفر للمصريين هيكون في الزراعة، ويمكن للعمال إستخدام آلات ووسائل حديثة في الزراعة.
وعشان كده فيه دور كبير جدا على وزارة القوي العاملة لأن هيكون فيه جزء عليها انها تدرب المزارعين والعمال المصريين على الطرق والأساليب الجديدة في الزراعة واستخدام آلات قبل السفر للمملكة العربية السعودية.
ومش بس كده، دي كمان طرق التقديم للوظائف وفرص العمل دي هيكون عن طريق وزارة القوى العاملة المصرية بالاتفاق مع الجانب السعودي، يعني انت كا مصرى يوم ما تحب تقدم على الوظيفة دى، بعد مايتم الإعلان عنها رسمياً، تاخد ورقك وتروح على وزارة القوى العاملة وهما هيكونوا مستنينك هناك علشان يستكملوا ورقك ويتأكدوا منه وبعدها يتم الاتفاق على موعد السفر للسعوديه والراتب الشهرى واللى فى الأغلب هتكون براتب يبدأ من 3 آلاف ريال أو 4 آلاف ريال يعني بما يعادل 30 ألف جنيه مصري في الشهر.
بس ده طبعاً علشان يحصل لازم فيه شرط مهم جدا، وهو أن السعودية محددة مواصفات خاصه للى حابب يسافر ليها الفترة بقصد الشغل، في الأول كده لازم يكون متقن جدا لكل الأدوات والأساليب الجديدة فى الشغلانه، ولو مش متقن للأسف فرصته في الشغل هتكون ضعيفة جداً جداً.
وعشان كده اشتغلت وزيرة الهجرة المصرية على فكرة إنشاء مركز مصري سعودي للهجرة والوظائف وإعادة الإدماج، زى المركز اللى كان معمول من فتره ، المركز المصري الألماني التابع بردوا لوزارة الهجرة المصرية، واللى بيهدف لتأهيل العمالة قبل سفرها وتدريبهم على كل الأدوات والمهارات اللازمة لضمان أن العمالة تكون في أحسن حال قبل السفر، وتحقق المطلوب منها.
لحد هنا ونكون وصلنا لنهاية الفيديو، بس قبل ما نقفل الفيديو حابين نسأل سؤال، هل الجماعه اللى شغالين فى الزراعه هنا دلوقتي هيقدروا كده يسيبوا مصر وأرضهم اللى بيزرعوها ويروحوا يزرعوا في السعودية؟
