ستندم كثير لو فوت هذه الوظيفة، وهذا لأن مجموعة طيران الإمارات نازلة بثقلها في مصر وستوفر فرص للتعيين، لكن المهم تعرف ما الخطوات التي يجب القيام بها حتى لا تضيع الفرصة من يديك.
لو نفسك تشتغل أو تشتغلي في شركة طيران كبيرة فـ الفرصة جت لحد عندك وده لأن مجموعة الإمارات واللي بتضم طيران الإمارات ودناتا وشركات تانيه كتير هتعمل أكبر حملة للتوظيف في مصر
واللي هتكون عن طريق جلسة معلومات من خلال الانترنت وهيشارك فيها متخصصين في تكنولوجيا المعلومات والجلسة دي هتكون يوم 14 و15 مايو الجاي .
والمفاجأة إن مجموعة الإمارات قدمت دعوة لكل محترفي تكنولوجيا المعلومات في مصر واللي عايزين يطوروا مسارهم المهني وحابين ينضموا لفريق عمل الشركة في مقرها الرئيسي في دبي
وده لأن مجموعة الإمارات بتستهدف توظيف أكتر من 300 خبير في مجال تكنولوجيا المعلومات في الشهور الجاية.
والمفترض إن الناس دي هتتولى مجموعة من الأدوار في هندسة البرمجيات والتطوير والسحابة المختلطة والتسليم السريع وإدارة المنتجات التقنية ومقر العمل الرقمي والأمن السيبراني والهندسة المعمارية الحديثة والابتكار وإدارة الخدمات.
وعلى فكرة كل المجالات اللي قولنا عليها دي موجودة في أشهر الجامعات المصرية سواء الحكومية أو الخاصة وعندنا فئات كبيرة جدا جدا محترفه في مجال تكنولوجيا المعلومات .
وده اللي أكده عادل رضا الرئيس التنفيذي للعمليات في شركة طيران الإمارات واللي قال إنهم شغالين على مجموعة من مشاريع التكنولوجيا والابتكار.
وعشان كده بيدوروا على الكوادر والكفاءات اللي تساعدهم في تحسين مشاريعهم
قال كمان إنهم دايما بيسعوا لجذب المواهب من الشباب المتميز في مجال تكنولوجيا المعلومات عشان يكن ضمن فريق العمل ليهم.
نيجى بقى لأهم سؤال ياترى إيه مميزات الحصول على وظيفة في مجموعة الإمارات وياترى المرتبات بتكون قد إيه ؟
بص ياسيدي المعروف عن مجموعة الإمارات إنها بتقدم رواتب وبدلات تنافسية وتأمين طبي وتأمين ممتاز على الحياة لكل العاملين فيها.
ومش بس كده دي كمان بتقدملهم تسهيلات على الشحن بشروط ميسرة وبتديهم إجازة سنوية وتذاكر للعائلة مخفضة.
دي كمان بتقدم تذاكر طيران مخفضة جدا للمُعالين وكمان لكل أفراد العائلة والأصدقاء للسفر لـ أكتر من 130 وجهة عالمية على شبكة طيران الإمارات.
والمفاجأة إنها بتقدم لموظفيها بطاقة الإمارات البلاتينية واللي بتديهم مجموعة من الامتيازات والخصومات بيستفيدوا منها خلال آلاف المنافذ، غير بقا اشتراكات النوادي والعيادات والتعليم ومنافذ البيع بالتجزئة والضيافة في الإمارات العربية المتحدة والعالم.
وبعد ما عرفت كل المعلومات دي أظن كده مفيش حاجة تمنعك من إنك تقدم على وظيفة مثالية زي دي وتبقى واحد من ضمن 300 خبير في مجال تكنولوجيا المعلومات مطلوبين للعمل في مجموعة طيران الإمارات.
ها قولنا دلوقتي مستني إيه عشان تقدم في فرصة وظيفة متتعوضش زي دي؟
