بالتأكيد جميعنا نلاحظ ارتفاع أسعار الموبايلات في السوق لأكثر من مرة خلال الفترة الماضية، ذلك بالإضافة إلى عدم وجود إصدارات ونقصها في السوق.
الخبر الجيد انه يوجد ماركة عالمية ستصنع مليون موبايل لها في مصر. ولكن ما هي هذه الماركة وهل سيؤثر ذلك على انخفاض اسعار الهواتف المحمولة في مصر هذا مما نتعرف عليه من خلال التالي.
شركة «اتش ام دي» العالمية والمالكة للعلامة التجارية «Nokia»، وقعت اتفاقية مع شركة اتصال للصناعات المتطورة «EAI» فى مصر.
والهدف من الاتفاقية هو انتاج مليون موبايل من موديلات وإصدارات مختلفة لماركة نوكيا منها الهواتف التقليدية ، والهواتف الذكية Smart Phone.
والمليون موبايل هيتصنعوا بالكامل خلال سنة 2022، مع الاتفاق على مضاعفة حجم الانتاج خلال الفترة الجاية.
الدكتور عمرو طلعت، وزير الاتصالات قال ان الاتفاقية الجديدة مع نوكيا بتأكد حرص الحكومة على تشجيع وتحفيز القطاع الخاص للتصنيع داخل مصانع مصرية لنقل المعرفة والخبرات وتوطين صناعة الإلكترونيات.
كما ان أحمد أبو عوف، الممثل لشركة EAI المصرية، قال ان المنتج المصري هيكون مماثل تماما للمنتج العالمي من حيث الجودة والكفاءة، سواء في المكونات الإلكترونية نفسها أو في التجميع والتغليف والاختبارات.
اما تامر الجمل مدير عام شركة HMD الفنلندية، فأوضح إن شركته هتزود المصنع المصري بمتطلبات الإنتاج من مواد خام وأدوات تفتيش واختبار ومعدات المعايرة المطلوبة للعملية الإنتاجية.
كمان الشركة العالمية هتنقل للمصنع فى مصر الخبرات التكنولوجية والدعم الفنى عن طريق تدريب الكوادر المصرية على إيد خبراء Nokia من فنلندا.
وعلى فكرة، نوكيا مش اول ماركة عالمية ناوية تصنع هواتفها في مصر خلال الفترة الجاية، فالسبق كان لشركة فيفو الصينية، واللي أنشأت مصنع ليها في العاشر من رمضان باستثمارات 20 مليون دولار، ومنتظر توصل الى 30 ميون دولار كمان.
وتعلقا على تصنيع نوكيا لهواتفها في مصر، قال المهندس محمد الحارثي خبير الاتصالات، إن الشركات العالمية المتخصصة في صناعة الهواتف المحمولة بتتنافس على السوق المصري لأكتر من سبب، زي الحجم الكبير لأعداد المستهلكين للهواتف المحمولة في مصر، وكمان باعتبارها بوابة التصدير إلى أفريقيا
طيب هل معنى كده ان أسعار الموبايلات دي هترخص؟
المفترض إن تصنيعها جوه مصر هيقلل من تكاليف تانية زي رسوم الاستيراد وغيرها، ودا اللي هنتابعه مع بعض خلال الشهور الجاية عشان نعرف صفقة من النوع دا تأثيرها على السوق المصري هيكون شكله إيه، والشركات المنافسة هتبتدب تتحرك ازاي
شاركونا بتوقعاتكم في التعليقات
