عالم التكنولوجيا مالوش آخر، وكل يوم والتاني بيطلع اختراع جديد يبهرنا أكتر من اللي فاتوا، وخصوصا الساعات الذكية اللي بقت منتشرة بشكل كبير جدا.
شركة ميتا “صاحبة موقع فيس بوك الشهير” قررت تدخل السباق في عالم الساعات الذكية، يا ترى أيه مواصفات الساعة اللي هتنافس بيها في السوق، وأيه الإمكانيات اللي هتغطي بيها على ساعات أبل؟ تابعونا عشان تعرفوا كل التفاصيل.
الساعات الذكية
في الأول عشان تاخد فكرة، الساعات الذكية بتعمل وظايف كتير لدرجة متتخيلهاش، زي الحسابات والترجمة والألعاب كمان.
وبتشغل التطبيقات اللي على التليفون والراديو والصور والأغاني كمان، وكل ده عن طريق ربطها بالبلوتوث مع التليفون، ده غير كمان أنك ممكن ترد على التليفون منها.
وفي أنواع متطورة من الساعات دي فيها إمكانيات أعلى، زي الكاميرا والخرايط والبوصلة، وبيكون فيها آلة حاسبة وشاشة تاتش وجهاز راوتر صغير.
وفي نوع كمان من الساعات اسمه “الساعات الرياضية، دي بقى بيستخدمها أكتر فئة الرياضيين، وبتساعدهم في التدريبات وبتقدم معلومات عن معدلات السعرات في الجري وفيها استشعار داخلي وخارجي.
ساعة ميتا
في الفترة الحالية.. شركة ميتا الأمريكية “المالكة لفيس بوك وواتس آب وإنستجرام”.. شغالة على موضوع الساعات الذكية ده، وقريب هتعلن عن ساعة ذكية جديدة في السوق. والشركة قالت إن الهدف الرئيسيمن صنع “ساعة ميتا” هو تعزيز ودعم عروض الأجهزة الخاصة بعالم الميتافيرس.
مواصفات خرافية
ساعات ميتا الجديدة هتكون بنظام أندرويد مش زي الساعات المنتشرة واللي شغالة بنظام “وير أوو إس”.
والساعة فيها ميزة كمان أنها مزودة بكاميرتين.. كاميرا أمامية بجودة قليلة شوية.. وكاميرا سفلية في اللوحة الخلفية ودي دقتها عالية جدا.
وساعة ميتا الجديدة هتكون بتصمم أزرق للأرقام والعقارب.. مع عقرب للثواني باللون الأحمر.أما الميزة التنافسية للساعة دي.. أنها مصممة بإطار ممكن تشيله.. والميزة دي بتتيح لك أنك تخلع الساعة تماما من ايدك وتحتفظ بـ”السوار” لوحده وشكله بيكون شيك جدا.
موعد الإطلاق
بالنسبة لموعد إطلاق الساعة في الأسواق.. ففي مصادر داخل الشركة الأمريكية قالت إن ميتا بتخطط لإطلاق مجموعة من الأجهزة اللي تقدر تستخدمها في عالم الميتافيرس.. وأول جهاز هتعلن عن إطلاقه هو الساعة.
عشان المستخدمين يقدروا يتعودوا عليها قبل ما الشركة تطرح باقي الأجهزة، لأن كل الأجهزة هتكون مربوطة ببعض في عالم الميتافيرس.
ورغم أن الشركة لحد دلوقتي مأجلة الجدول الزمني لإطلاق الساعة في الأسواق، بس في مصادر بتقول إن الساعة هتكون متوفرة خلال الشهور القليلة الجاية.
محاولات ميتا
الساعة اللي هتطلقها ميتا السنة دي مش أول محاولة من الشركة عشان تطلع الساعة دي للنور.. والسنة اللي فاتت كان في تقارير بتقول إن الشركة هتعلن عن طرح ساعة ذكية في الأسواق بس تم تأجيل الإعلان.
وكان في قبل كدا محاولة قديمة من شركة ميتا لابتكار ساعة ذكية.. وكان اسمها “ساعة كودي”.. والساعة دي كان فيها مشكلة أنها بتتداخل مع الإشارات العصبية المستخدمة في عالم الميتافيرس.. عشان كدا اتأجل الموضوع.
والشركة اشتغلت على حل المشكلة دي.. وفي التصميم الجديد للساعة تم حل المشكلة.. وهتكون قريب في الأسواق.
قول لنا تتوقع يكون سعر الساعة كام؟ وهل تحب تستخدم التكنولوجيا العالية دي وتدخل عالم الميتافيرس ولا لأ؟
