الفنان فتحي عبدالوهاب معروف في الوسط الفني وله محبين كثيرين ولذلك نجد أن كثير من الفنانيين قرروا يحضروا زفة أخته حنان لكي يباركوا له في يوم مثل هذا ويقفوا بجانبه.
. لكن ليه فتحي عمل زفة أخته في قصر ومين هو عريسها الأمريكي اللي اتجوزته ومين الفنانين حضروا الفرح.لأ وكمان كانت زفتها على عربية كاديلاك وشكلهم كان يجنن وكمان العريس كان بيرقص مع عيلته الأجانب اللي كانوا فرحانين بيه.. خليكوا معايا في التقرير ده هقولكم كل التفاصيل.
فتحي عبدالوهاب كان باين عليه إنه رتب كل حاجة في الفرح ده بنفسه ومفيش حاجة فاتته ولا مشاركش فيها أو أشرف عليها عشان اليوم يتقال عليه إيه اليوم الحلو ده أخو العروسة بقى وحقه يفرح بيها.. وده اللي كان واضح من الفيديو اللي نشره فتحي على صفحته الرسمية على فيسبوك وظهر معاه من أول دقيقة الفنان محمد رجب اللي شاركه فرحته ووقف جنب صاحبه ومفارقهوش لحظة.
وعشان كده الناس اتكلمت على الفرح ده إنه جميل وعجبهم وكمان كان القصر اللي اتعمل فيه حلو وممكن نشوف أفراح كتير في المكان ده الفترة الجاية عشان فتحي وأخته اختاروا يبعدوا عن جوّ الفنادق والقاعات المفتوحة والمقفولة وكان اليوم جميل.
شكله بيحبها أوي
الأخت لما بتكون قلب أخوها بتاخد كل حاجة حلوة منه ومفيش أحسن من يوم الفرح عشان تظهر المحبة دي والفرحة اللي كان بيستناها.. وده اللي حصل في فرح أخت الفنان فتحي عبدالوهاب اللي شكله بيحب أخته أوي.. تشوفه وهو بيدخل المكان كإنه بيقول للناس ها كل حاجة تمام وعملتوا كذا طيب وكذا خلص وهكذا لحد ما العروسة تدخل فرحها تنبهر باللي حاصل فيه.. اللي يتفرج على اللقطات اللي حصلت في فرح أخت فتحي عبدالوهاب هيقول إنه جميل وربنا يسعدها ويفرح قلبها.
اتجوزت أمريكاني
حنان عبدالوهاب أخت الفنان فتحي عبدالوهاب قررت تبعد عن الرجالة المصريين وكمان العرب وتكون زفتها على راجل أجنبي أمريكي الجنسية واسمه أنتوني مارين.. وتشوفه في الفرح تلاقيه مشغول وسايب عروسته وقاعد يرقص مع عيلته الأجانب اللي كانوا فرحانين بيه.. وعروسته قاعدة في الكوشة وأخوها فتحي راح قعد جنبها وياخد صور معاها.
ده غير إن العروسة كانت زي القمر وفستانها كان جميل والضحكة مفارقتش وشها والناس كانوا فرحانين بيها وبيباركولها ده غير اللي جت تقرصها في ركبتها يمكن تحصلها وتتجوز.
الزفة والنجوم
حفل الزفاف متعملش في فندق واختارت العروسة إنه يتعمل في قصر محمد علي في المنيل وده طبعًا من الأماكن التاريخية في مصر وأكيد فرحة العروسة كملت لما زفتها اتعملت في قصر.. وكان واضح من الصور اللي خدوها في الزفة إن العروسة اتزفت على عربية كاديلاك مفتوحة ومتزينة بالورد وكمان الفرقة الموسيقية كانت مصحباهم في الفرح.. ومن الفنانين اللي حضروا الزفة دي محمد رجب وإدوارد وصفاء الطوخي والسيناريست هاني سرحان والفنانة غفران محمد والمنتج حسام شوقي.
