برنامجه بيحقق نسب مشاهدة عالية كل سنة، بيستضيف فيه أشهر الرياضيين والفنانين المصريين والعرب ومنهم نجوم عالميين.. وبسبب المواقف الصعبة التي يقعوا فيها، البرنامج يكون هو البرنامج الرئيسي للمشاهدين في رمضان.
بنتكلم عن الفنان “رامز جلال” اللي أعلن عن برنامجه السنة دي باسم “رامز نيفر إند”، واللي هيتم عرضه على قناة إم بي سي مصر، بعدما طرح البروموا التشويقي له خلال الساعات اللي فاتت.
على مدار 13 سنة بيحرص النجم رامز جلال، على حجز مكانه وقت الفطار خلال شهر رمضان كل سنة.. لأن الجمهور اتعود على برنامجه كأنه عادة مينفعش يقطعها، زيه زي فانوس رمضان.
رامز طرح بوسترين لبرنامجه «نيفر إند» الأول ظهر فيه بلوك غريب متعود عليه كل سنة.. كان لابس فيه بدلة لونها دهبي، وصابغ شعره بنفس اللون وراكب تور، وفي إيده فانوس رمضان.
وفي البوستر التاني ظهر رامز وهو ماسك سلاح في إيد وفي إيده التانية ماسك فانوس وطاير في الهوا، وظهر معاه واحد بيقع من السما وملاعق وأطباق وأكواب بتطير في نفس البوستر.
أول ضحيتين لـ رامز كشفوا سر مقالبه الجديدة
الفنانة نسرين أمين كانت كشفت عن تعرضها لإصابة في إيدها وهي بتصور مع رامز جلال وقالت انه كان مقلب جامد أوي مش سهل على أي حد يستحمله.. نسرين قالت انها مكنتش متخيلة إنه هيوصل لكده، ومعرفتش تعمل اللي هي عاوزاه لأن كان فيه كاميرات بتصور والمقلب السنة دي جديد.
والفنانة دينا محسن الشهيرة بـ ويزو كشفت هي كمان عن المقلب اللي اتعرضت له مع رامز وقالت أنها قفزت خلال الحلقة من مسافة 13 متر في حمام السباحة.. والقفزة دي كانت مرعبة وأول مرة تعملها علشان تهرب منه.
أغلى سعر وفاندام الأعلى
برنامج “رامز موفي ستار” اللي اتعرض السنة اللي فاتت وصل سعر الفاصل الإعلانى بتاعه لـ 600 ألف جنيه، وده يعتبر أعلى سعر إعلاني على الشاشة.
أما النجم العالمي “فاندام” فظهر في 13 حلقة، حصل في الحلقة الواحدة على مبلغ 210 ألف دولار يعني حوالي 6 مليون ونص لليوم الواحد.
أجور الضيوف خيالية يا ترى هياخدوا كام السنة دي؟
المعروف إن برنامج رامز جلال بيحقق أعلى نسب مشاهدة على الشاشة، وإعلاناته هي الأغلى فمن الطبيعي إن ضيوفه ياخدوا أغلى مقابل علشان يظهروا معاه، وطبعاً الناس عاوزة تشوف النجوم اللي بيحبوهم سواء فنانين أو رياضيين.
يعني على سبيل المثال السنة اللي فاتت مقابل الظهور كان عالي أوي.. لاعب نادي الزمالك طارق حامد حصل على 70 ألف دولار يعني حوالي 2 مليون و200 ألف تقريباً، والفنانة أمينة خليل 50 ألف دولار يعني حوالي مليون و600 ألف جنيه تقريباً.
أما الفنانة غادة عادل فكانت حصلت على 40 ألف دولار ودي حوالي مليون و200 ألف تقريباً، وعلي معلول لاعب الأهلي كان حصل على 45 ألف دولار.
أما الراقصة والفنانة فيفي عبده فحصلت على 22 ألف دولار بحوالي 700 ألف مصري، وحصل لاعب الأهلي محمود كهربا على 46 ألف دولار، وحصلت الفنانة ياسمين صبري على 35 ألف دولار.
أما الفنان حمدي المرغني فحصل على 26 ألف دولار، والفنانة بدرية طلبة على 22 ألف دولار، والفنانة هنا زاهد على 25 ألف دولار، انما الفنان عبد الله بالخير فحصل على 30 ألف دولار.
كمان الفنان باسم ياخور فحصل على 28 ألف دولار، والفنانة ياسمين رئيس حصلت على 27 ألف دولار، والفنانة بوسي حصلت على 18 ألف دولار، وحصل المطرب الشعبي حسن شاكوش على 15 ألف دولار.
كمان مطرب المهرجانات حمو بيكا فحصل على 15 ألف دولار، والفنانة ريهام عبد الغفور على 22 ألف دولار، والفنان محي إسماعيل على 18 ألف دولار، والفنانة أروى جودة على 20 ألف دولار.
والمطرب الشعبي الشهير عبد الباسط حمودة فحصل على 18 ألف دولا، والفنانة نبيلة عبيد على 20 ألف دولا، والفنانة بسمة على 23 ألف دولار.
وطبعاً المقابل السنة هيزيد بمعدل كبير بعد الزيادة اللي حصلت في كل حاجة.
