فنانة كبيرة اعتادت على الصراحة في كل حياتها، وبسبب صراحتها دخلت في مشاكل كتيرة قبل كدة حتى مع زمايلها الفنانين.
بتكتب رأيها على صفحتها الشخصية بفيس بوك، ولما الناس تهاجمها ترجع تمسح اللي كتبته وتعتذر.. بنتكلم عن ملكة جمال مصر السابقة والفنانة الكبيرة “داليا البحيري”.
خناقة مع ياسمين عز
من كام ساعة السوشيال ميديا انشغل بالمعركة الكلامية اللي حصلت بين داليا البحيري والإعلامية ياسمين عز، بعدما ظهرت “داليا” في مقطع فيديو بتقلد “ياسمين” بطريقة ساخرة على طريقة بتوع التيك توك”.
داليا البحيري كانت في لقاء تلفزيوني ببرنامج “ET in Arabic”، وهاجمت “ياسمين عز” بسبب طريقتها ودفاعها عن الرجالة، وقالت انها مش بتتابعها لكن بتشوف فيديوهاتها بالصدفة كدة قدامها.
نشرت داليا على حسابها بانستجرام مقطع فيديو ظهرت فيه وهي بتسخر من ياسمين عز لما طلبت من الست تحترم جوزها وهي بتنده عليه وتقوله يا أستاذ,, فقامت داليا باستخدام تعبيرات وشها وحركات عنيها بسخرية.وده خلى ستات كتيرة تدافع عن ياسمين عز وتهاجم داليا البحيري.
صاحبة أشهر خلاف فني
مش ده الخلاف الوحيد لداليا البحيري مع النجوم، بالعكس ليها خلاف مشهور أوي مع المطربة الكبيرة “أنغام” اللي جمع بينهم لقاء فني واحد وبسببه خاصموا بعض 10 سنوات.
في سنة 2013 وقع خلاف بين داليا وانغام بعد تصويرهم مسلسل “فى غمضة عين” اللي كان فيه أكتر من خلاف..
بدأ بانسحاب المخرج سميح النقاش بعدها قامت خناقة أكبر بين داليا وانغام بسبب مين فيهم الأحق بوضع إسمها الأول على التتر.
خلافهم استمر سنوات طويلة وخلال كل السنوات دي كانوا بيبادلوا بعض الاتهامات.. داليا البحيرى شايفة أنها الأحق باسمها الاول وانغام نفس الحكاية.. وبعد السنوات دي كلها اتقابلوا بالصدفة على البحر خلال أجازة المصيف واتصالحوا.
بعدها ظهرت أنغام وداليا البحيرى فى مقطع فيديو وهما بيرقصوا مع بعض على أنغام أغنية أجنبية، واتفاعل الجمهور مع الفيديو اللي أكد على إن الخلاف بينهم انتهى.
شبشب داليا البحيري عملها ازمة مع زمايلها الفنانين
“داليا البحيري” كان ليها أزمة كبيرة اتعرضت فيها لهجوم من زمايلها الفنانين ولحملة شرسة من المصريين.. لما كتبت على فيس بوك تصريحات هاجمت فيها “العمالة اليومية” وقالت إن اللي هيدافع عنهم تاني هتضربه بالشبشب.
ودي التصريحات اللي سببت لها أزمة كبيرة سواء في مصر أو خارج مصر خاصة في الدول العربية اللي بتنتشر فيها العمالة اليومية لعمال سافروا علشان لقمة عيشهم.
وقتها قالت داليا بطريقة إنفعاليه إنها هتضرب أي حد يدافع عن العمالة اليومية بالشبشب لانهم سبب مصايبب مصر.
بعدها عينك متشوف الا النور.. هجوم كبير من كل الفنانين، ومن الجمهور ده غير الرسايل اللي فيها كلام كبير جاتها من برة مصر وده اللي أجبرها تمسح الفيديو وتعتذر للعمالة في كل مكان.
داليا البحيري وخناقتها مع أبو تريكة
“داليا” كان ليها خناقة تانية بس من نوع تاني قلبت السوشيال ميديا.. لما هاجمت على صفحتها الشخصية اللاعب المحبوب جماهيريا “محمد ابو تريكة”، ووصفته بأوصاف كتيرة اعترض عليها عدد كبير من متابعي السوشيال ميديا ومحبي أبو تريكة.
“داليا” اتعرضت لحملة شرسة من الجماهير المصرية خاصة الأهلاوية بعدما انتقدت الكابتن ابو تريكة، وده اللي فتح عليها باب الهجوم اضطرت بعدها تعتذر له في كل وسائل الإعلام.
النجمة داليا البحيري المعروف عنها انها عاشت طفولتها في السودان.. وفي منطقة جبل أولياء جنوب الخرطوم كان ابوها شغال في وزارة الري وهناك اتولدت ودرست وكان من اهم هواياتها مشاهدة افلام الكارتون السوداني.
