الزواج مثله مثل أشياء كثيرة في حياتنا رزق، لكن المشكلة كلها في نظرة المجتمع عمومًا لمن تتأخر عن سن الزواج، والعديد يتعرض للمضايقات بسبب هذا الأمر، وتابعونا في التقرير التالي سنوضح أبرز الفنانيين الذي تأخر سن زواجهم.
درة صبرت ونالت
الفنانة التونسية درة من وقت حضورها مصر وتقديمها أعمال فنية كتير الكل كان بيتكلم عنها بس جمالها كان لافت أكتر من شغلها والبعض استغرب إنها مكانتش لسه اتجوزت.
بس لما جه الكلام في الموضوع درة واجهت المضايقات دي وقالت إن الجواز ده نصيب ولسه نصيبها مجاش وكمان ملقتش الشخص المناسب عشان ترتبط بيه لحد ما في يوم بدأ تنتشر ليها صور مع رجل الأعمال هاني سعد.
ووقتها اتقال إن في مشروع جواز بس هي طلعت ونفت وحاولت تقفل الباب على حياتها الشخصية شوية بس معرفتش لحد ما تم الإعلان عن الجواز في شهر نوفمبر سنة 2020 ولما اتجوزت كان عندها 40 سنة.
حنان مطاوع وفقت بين الفن والحياة الشخصية
والفنانة حنان مطاوع قادرة بشكل كبير توفق بين شغلها في الفن وتربيتها لبنتها وكمان حياتها الشخصية وناجحة في ده جدًا وواضح إن رغم المضايقات اللي اتعرضت ليها بسبب تأخر جوازها لكن ده كان عامل لإنها مخططة لكل حاجة صح، واتجوزت حنان وهي عندها 41 سنة من المخرج المسرحي أمير اليماني واللي كانت رفضته في الأول وبعدين وافقت عليه.
حياتها مستقرة وخلفت منه بنتها أماليا بعد سنتين من جوازهم اللي تم في أغسطس سنة 2016، وكانت حنان بتواجه أي مضايقات بخصوص تاخرها عن الجواز بكلمة حاسبوني على أفعالي مش على أقداري، وأنا بكره كلمة هما الناس عميوا ولا إيه علشان الجواز.
منة شلبي مركزة في الفن
والفنانة منة شلبي تعتبر أشهر عازبة في الوسط الفني حاليًا ولإنها مخاضتش تجربة الجواز حاليًا لكنها واجهت مضايقات بردوا وقالت إنها مركزة في الحياة الفنية وعاوزة تظهر بشكل كويس ورغم وصولها سن 41 سنة لكنها بتعتبر الجواز تحصيل حاصل وبتتمنى يكون جوازها نابع من الحب في المقام الأول.
مي عز الدين عاوزة الحب
والفنانة مي عز الدين سنها وصل دلوقتي 43 سنة ومتجوزتش لسه لكنها سنة 2009، اتخطبت للاعب كرة القدم محمد زيدان، بس مكملتش الخطوبة واتفسخت بعد شهور قليلة.
ورغم إن والدتها مسيحية قالت إنها لا يمكن تتجوز من شخص غير مسلم عشان هي شخصية تقليدية وقالت عن سبب تأخر جوازها: “حاولت آخد الخطوة بالعقل بس ولكن منجحتش وطلع الحب أهم شيء وكمان عاوزة أتجوز واحد يحترم شغلي”.
ناهد السباعي سقف طموحها عالي
والفنانة ناهد السباعي وصلت 35 سنة وكان خلاص بينها وبين الجواز خطوة بس لغت حفل زفافها فجأة وبدون مقدمات وده اللي عمل حالة من الجدل وقتها بس هي مكانش في دماغها نظرة الناس أد ما كان همها تاخد قرار صعب زي ده.
المهم هي قالت عن تاخرها في الجواز إنها مش زي أي فتاة عاوزة تتجوز وتكون أسرة وبيت وأولاد وحياة مستقرة لكن هي معندهاش وقت دلوقتي لفكرة الارتباط وسقف طموحها بقى عالي حبتين بعد التجربة اللي كانت هتلبس فيها وقالت: “لما يبقى جدي فريد شوقي لازم يبقى سقف طموحاتي عالي شوية في الجواز”.
