اسرار الوسط الفني كثيرة ودائما تجد اخباره تهم ناس كثير ويحبوا أن يعرفوا حكايات النجوم واسرارهم وحياتهم الشخصية ، ولذلك تجد نجوم الفن دائما في قائمة التريند.
انهارة هقولك بقى اصول النجوم … يعمي كل النجوم اللي احنا بنحبهم دول مش مصريين وليهم اصول تانية كتير سواء من الاب او الام او الجدود ،، هتتصدم لما تعرف اصولهم الحقيقية
النجمة غادة عادل مامتها سورية لكنها اتولدت اساسا في ليبيا وفضلت عايشة هناك ودرست لحد ما دخلت كلية التجارة والاقتصاد بدماعة قاريونس ، وده لان والدها كان شغال هناك وعاشت معاه هي ومامتها ، وبعد ماتخرجت جت عاشت في مصر وبدأت رحلتها بقى مع الاعلانات والكليبات وشاركت هاني شاكر في كليب تخسري سنة 97 ، ومن وقتها وهي عايشة في مصر ويمكن مش كل الناس عارفة انها اصلا مش مصرية
نيللي كريم كمان من اصل روسي ، وعشان كدا بنشوفها بتتكلم روسي حلو اوي ومتمكنة منه ، نيللي باباها مصري ومامتها روسية وعاشت معاهم هناك فترة طويلة واتعلمت الباليه في مدرسة روسية
وبعدها رجعت مصر ودرست في اكاديمية الفنون وعلمت دراسات عليا في فن اخراج الباليه ، وبدأت مشوارها الفني من خلال فوازير رمضان وبعدها دخلت مجال التمثيل ، لكن اتقانها اللغة الروسية خلى ناس كتيير تتوقع انها في حد في عيلتها من هناك وفعلا طلعت مامتها.
مي عز الدين بقى اسمها الحقيقي ماهيتاب ، واتولدت في الإمارات وعاشت في ابو ظبي 4 سنين ، وبعدها رجعت مصر مع مامتها وعاشوا في اسكندرية ، وكمان هي من اصل تركي لان جدتها تركية ، بس هي فضلت عايشة في مصر وكبرت واتربت هنا ، ولحد دلوقتي رافضة الجواز لحد ما تلاقي الحب اللي بتدور عليه.
هنا شيحة واختها حلا من اصول لبنانية أصيلة ، لان والدهم الفنان التشكيلي احمد شيحة اتجوز اللبنانية نادية زيتون وخلف منها 4 بنات ، لكنهم رجعوا عاشوا في مصر واهتمت نادية بمواهب بناتها الفنية والموسيقية ، ومن هنا درست هنا في المعهد العالي للفنوان المسرحية وبدأت مشوارها في التمثيل.
نهال عنبر كمان من اصول شركسية لكنها اتولدت في مصر، وعاشت في امريكا فترة طويلة جدا ، وبعدين رجعت مصر تاني ودرست سياحة وفنادق واشتغلت في المجال سنين كتير قبل ما تدخل مجال التمثيل.
النجمة ليلى علوي بقى اتولدت في القاهرة لكن مامتها اسمها ستيلا وهي ست يونانية واذاعية كبيرة، وقالت عنها ليلى علوي انها زي ستات الصعيد وكلمتها واحدة وده فرق في تربيتها ، وعاشت معاها في مصر وربتها زي المصريين مش تربية اوروبا.
هالة صدقي بقى او الشهيرة بالملكة صفصف ، والدها فلسطيني ومامتها مصرية واتولدت في امريكا وعاشت طفولتها هناك وبعدين رجعت عاشت في مصر مع والدتها وكملت دراستها وخدت ليسانس اداب ، وبعدها انطلقت للتمثيل وكانت فترة التمانينات هي بداية شهرتها.
الراقصة لوسي بقى مطلعتش مصرية زي ماكنا فاكرين ، لكنها فلسطينية واتولدت هناك وعاشت فترة طويلة وبعدين هاجرت وجت مصر وعاشت هنا وبدأت رحلتها في الرقص والتمثيل ، لكنها فضلت فترة طويلة متتكلمش عن اصلها الفلسطيني خالص ومحدش كان يعرف ، لحد ما طلعت في لقاء تلفزيوني وحكت قصة اصلها وان عيلتها من مدينة الخليل الفلسطينية.
ولو رجعنا شوية لأيام الزمن الجميل، هنكتشف كمان ان نجمات كتييير من بتوع زمان كمان ليهم اصول مش مصرية ، اولهم النجمة ليلى مراد ، ودي بقى حكايتها حكاية ، واسمها الحقيقي ليليان زكي مراد موردخاي ، اتولدت في اسكندرية وأسرتها يهودية الأصل ، وباباها هو المغني والملحن إبراهيم زكى موردخاى الشهير بـ “زكى مراد”، ووالدتها جميلة إبراهيم روشو، وهي يهودية مصرية.
كمان النجمة شادية والدها مصري لكن والدتها من أصول تركية ،، أما بقى الجان رشدي أباظة ، فمامته كانت إيطالية اسمها ليلى جورجنجينو ، ووالده كان مصري.
عندك كمان الاخوات حسين فهمي ومصطفى فهمي ليهم أصول شركسية ، ودول بقى ولاد ناس اوي وعيلتهم ارستقراطية وكلهم من بتوع العمل السياسي ، كان جدهم محمد باشا فهمي رئيس مجلس الشورى، وابوهم محمود باشا فهمي سكرتير مجلس الشورى، كمان جدتهم أمينة هانم المانسترلي صاحبة استراحة المانسترلي.
