قبل الشهرة والفلوس والنجومية ،، المشاهير كانوا ناس عاديين ويعملوا في وظائف مختلفة تماما لكن الحظ لعب معهم ،وأصبحوا كما تروهم اليوم، وظائف مفاجأة للفنانين قبل الشهرة لن تتخيلها سنكشفها من خلال التقرير التالي:
القيصر كاظم الساهر ،، هل تتخيل انه اتمرمط وهو صغير واشتغل حاجات كتير جدا مستحيل تقول ده كاظم اللي نعرفه .. ظروف اسرته كانت صعبة وليه 9 اخوات ، واضطر يشتغل عشان يصرف على نفسه.
عمل ايه بقى ؟اشتغل بياع ايس كريم ، وكمان اتعلم شغل النسيج والصباغة والنجارة كمان ، وفضل يحوش لحد ما جمع 12 دينار واشترى بيهم الة موسيقية يتدرب عليها في وقت فراغه وفضل مكمل لحد ماقدر يحقق حلمه وبقى القيصر ..
تامر حسني بقى .. نجم الجيل ،، ظروفه كانت صعبة وهو صغير لان والدته ووالده منفصلين ، واضطر يعتمد على نفسه ، وكان بيشتغل عامل في بنزينة وكمان في سوبر ماركت ، وتامر قال ده كذا مرة من غير ما يتحرج من جمهوره
أحمد فهمي بقى كان شغال عامل في محل خضار وفاكهة ، كان بيرص الحاجات كل يوم وينضف المحل ،، البداية كانت صعبة لكن اول ما حط رجله على بداية طريق الفن حياته اتغيرت تماما
طب هل تصدق ان عمرو سعد كان شغال على عربية فول؟
من وهو في ابتدائي كان متعود يعتمد على نفسه ، وكان بيحلم يكون ممثل مشهور، بس كان لازم يشتغل ويجيب لقمة عيشه ، واشتغل حاجات كتير ، منها فواعلي وكان بيطلع رمل واسمنت زي اللي بتشوفهم كل يوم في الشارع ، وكمان جه عليه وقت كان بيبع تين شوكي.
عمرو سعد قال عن الحكاية دي : انا بحب اشتغل واعافر عشان اجيب قرش ، وقبل ماروح الكلية كنت بشتغل شيال خشب ”
حمادة هلال بقى من ابتدائي وهو مسحول ,, اشتغل في السباكة والنقاشة وكمان اشتغل في محل كباب وكفتة ، وبالصدفة مرة كان بيغني وهو بيشتغل وسمعه زبون وعجبه صوته وطلب منه يغني في فرح بنته ، ومن هنا بدأ يركز اكتر على موهبته وحلمه.
احمد عز .. النجم اللي بنستنى اي عمل ليه ،، من زمان وهو عارف هدفه لكن الظروف مكنتش مساعداه ، وكان بيشتغل في مجال الخدمات الفندقية ، لحد ما جاتله الفرصة انه يدخل عالم عروض الازياء ومن بعدها دخل التمثيل.
علي الحجار صاحب الحنجرة الدهبية بقى ، والده كان بيمر بظروف مادية صعبة ، فاضطر يشتغل صبي مكوجي من ورا اهله ، وكان وقتها سنه 10 سنين ،لكن لما ابوه عرف حبسه في البيت ومنعه من الشغلانة دي.
مصطفى خاطر نجم مسرح مصر اللي في ظرف سنتين تلاتة بقى ممثل كبير ومهم وهتلاقيه منتشر في اعمال كتير ، كان بيشتغل نجار و استرجي ، وهو قال ده بنفسه في كذا لقاء اعلامي.
محمود عبد المغني بقى كان من الوراق وعايش هناك ، وكان بيشتغل في البلاط و ورشة طوب عشان الحتة اللي كان ساكن فيها كانت معظمها قايمة على الشغل ده.
اشرف عبد الباقي بقى كان حريص انه يستمر في شغلانته القديمة حتى بعد ما اتشهر، فهو كان عنده ورشة للنجارة والنقاشة وكان وارث الموضوع عن والده ، واشتغل في ديكورات المنازل كل ده وهو في ثانوية عامة ، وفضل مكمل في شغلانته فترة طووووويلة بعد ما بقى فنان معروف.
