البرامج التلفزيونية بقت دلوقتي حاجة قوية بعد ما أي فنان يقدر يروح يسجل حلقة أو يظهر على الهوا وكمان ممكن تعمل تريند بسؤال جرئ أو غير متوقع في ظل انتشار السوشال ميديا التى أصبحت عامل مساعد يقلب الدنيا رأسا على عقب.
لكن الغريب بقى إنك تبقى رايح في أمان الله تتسئل كام سؤال وتعمل حلقة عادية تلاقي نفسك في حتة بعيدة خالص عن اللي توقعتها ويجيلك سؤال محرج يخليك تكره اليوم اللي وافقت فيه تظهر في برامج أصلًا، وده اللي حصل مع فنانين كتير لما ظهروا في البرنامج اتحرجوا بالأسئلة لدرجة إنهم سابوا الاستوديو على الهوا ومشيوا، وفي الفيديو ده هنقولكم على الفنانين اللي واجهوا النوع ده من الإحراج بكل تفصيلة فيه.
سرك مش في بير
رغم إن الإعلامي تامر أمين، تقيل في حتته وابن إعلامي كبير بردوا والمفروض عنده خبرة تخليه يعدي اللي ممكن يقع فيه وعارف قصص البرامج وحكايات الإعلاميين لكنه مستحملش اللي اتعمل فيه من بسمة وهبة في فقرة “سرك مش في بير” لما عرضت عليه سر وطلبت منه يقوله لكن رد فعله كان صادم وقطّع الورقة ورفض يتكلم وقال لبسمة ده إنتي عاوزة تخشي جوه البيت طيب ما تيجي تعيشي معانا أحسن لأ يا حاجة إنتي كده خدتي كفايتك وزيادة.
قصته اتفضحت
المطرب سعد الصغير يعتبر من أهم نجوم الغناء الشعبي بس لما ظهرت المهرجانات حطت عليه خالص وبقى شغله قليل وده عادي التطور الطبيعي للأجيال، المهم سعد اتسأل من شيخ العرافين في برنامج العرافة مع بسمة وهبة عن الفيلا بتاعته وباعها ولا لأ ورغم إنه اتحرج وقتها بس رد وقال لأ مبعتهاش.
وعدت القصة لكنه اتكلفت بسؤال تاني عن عياله اللي محدش يعرف عنهم حاجة وهوب سعد راح خالع المايك وساب الاستوديو ومشي، وقال أقسم بالله لو الموضوع ده اتعرف أنا ولا عاوز برنامج ولا عاوز غيره أنا كنت بحترم حضرتك بس خلاص بقى، وبعد كده اكتشفنا قصة جوازته على مراته واتضح إن موضوع عياله ده حقيقي وفي فنانة مش معروفة للجمهور اسمها برلنتي عامر قالت إنه كان متجوزها في السر.
أبوها اتبرى منها
واتعرض السيناريست والإعلامي محمد الغيطي لموقف محرج على الهوا لما كان في برنامج حديث القاهرة وكان وقتها عشان يتكلم عن مسلسل الضاحك الباكي اللي بيتناول جانب من حياة نجيب الريحاني في فترة من الفترات ووقتها الناس اتصدمت في المسلسل وفشل بشكل ذريع.
وهو ضيف بقى الفنانة عبير الشرقاوي عملت مداخلة على الهوا عشان تتكلم عن المسلسل ووقتها هي كانت منتقدة العمل وصنّاه في بوست على الفيسبوك لكن لما الغيطي عرف إنها هي اللي هتتكلم اعترض وقال ومين دي أصلًا عشان تنتقد دي قالت علينا رمم في بوست ليها على فيسبوك دي أبوها اتبرى منها على الهوا أنا ماشي والله ما أنا مكمل الحلقة وساب الاستوديو على الهوا ومشي.
جوازة مخفية
حسن شاكوش بقاله كام يوم تريند بسبب أزمته هو ومراته ريم طارق وهما اتجوزوا في شهر مارس اللي فات ده والحفل وقتها أحياه النجم تامر حسني، والاتنين ظهروا مع بعض في برنامج “العرافة”، وحصل خلاف بينهم لما سأل “شيخ العرافين” عن جوازة حسن شاكوش التانية في شقة بالتجمع وإنها مدياله سلسلة هدية وهو اداها عربية.
والموضوع اتطور لما قال إن الكلب اللي اداه شاكوش لمراته ريم طارق هدية فهو في الأصل بتاع مراته الأولى، وحسن شاكوش قال ده بيخبط في الكلام وهدد إنه يمشي وقام وقف فعلًا وحاولت بسمة تهديه لما قالت لشيخ الحارة ده خراب بيوت.
