الفنانة الإماراتية أحلام دايما مثيرة للجدل وأخبارها وصورها تنتشر مع كل إطلالة جديدة، مرة شكلها الذي اتغير ووزنها الذي اختلف تماما.. ومرة بلبسها الغالي جدا.. وطبعا ودائما مجوهراتها التي ليس لها مثيل، ولكن هذه المرة ابتكرت نوع مختلف من المجوهرات.
باروكة أحلام الألماس عملت صدمة وجدل كبير جدا على مواقع التواصل الاجتماعي.. بعد ظهورها الأخير في حفل الليلة الماسية في موسم الرياض بالمملكة العربية السعودية.
ظهرت المطربة أحلام في الصور المتداولة على مواقع التواصل الاجتماعي.. واللي نشرتها بنفسها عندها على انستجرام.. بباروكة على الرأس مرصعة بالألماس.. ومش بس كده.. ده كان في لآلئ على رقبتها.. وده خلى الجمهور ينتقدها.
ورغم إن الناس مش متأكدة إن الباروكة دي من الماس فعلا ولا مجرد زينة وإكسسوار.. لكن فكرة Ahlam in Diamond.. اللي وصفت بيها نفسها كانت مثيرة للاستغراب.. الناس مش فاهمة طب انتي ليه بتستفزي متابعينك بالشكل ده.
خصوصا في ظل الأزمة المالية العالمية.. الناس مش ناقصة يعني.. وإن كفنانة بيتابعك ناس كتير.. ده جزء من الانتقادات اللي اتقالت لأحلام على السوشيال ميديا.. ورغم كده هي لا تبالي.. بتحقق أحلامها وطموحاتها ورغباتها بدون أي غضاضة منها
تفاعل الجمهور بشكل كبير مع إطلالة أحلام.. كان فيه انقسام.. ما بين اللي شايفين إن مظهرها جميل وإطلالتها فريدة.. وفي ناس انتقدوا مبالغتها في ارتداء المجوهرات لغاية ما وصل الموضوع لباروكة من الألماس.
ومش بس كده.. ظهرت أحلام بأقراط على شكل ثريا.. وهو مصنوع من مستويات متعدّدة متدلّية من الكريستال.. وكمان مليانة بالأحجار الكريمة.. الخرز وغيرها.. بس في نص الحفلة استبدلته وظهرت بحلق أصغر حجمًا.
حب أحلام للمجوهرات مش جديد.. وكلنا عارفين.. أو الناس اللي متبعاها عارفة كويس شغفها بالمجوهرات.. وإنها بتحب تجمع قطع فريدة.. وتعتبر أكتر فنانة ومطربة عربية عندها مجوهرات بالملايين.. وبتحافظ عليهم جدا.. وحطاهم في خزنة فريدة من نوعها.
“طب ادينا خصلة من الباروكة نعيش بيها حياتنا”.. ده كان أبرز تعليق على موضوع باروكة الألماس بتاعت أحلام.. الناس طموحاطها بسيطة.. وعاوزين يعيشوا بجزء ولو بسيط من النعيم اللي فيه المغنية الإماراتية.
وطبعا مع دخول شهر رمضان وفي ناس كتير بتحاول توفر أكل ليها ولأسرتها.. كان المنظر المتلأ لأ ده استفزازي جدا..
أحلام تمتلك قطعة مجوهرات سعرها وصل الأربعين والخمسين مليون دولار.. ودايما في المناسبات الكبيرة ومع فساتين السهرة.. بتميل لاعتماد أطقم مجوهرات فاخرة.. وعادةً ما بتكون من الذهب الأبيض ومرصعة بالألماس.
أحلام واحدة من أشهر المطربات في الوطن العربي.. ودايما بتكون الاختيار الأول للغناء في أفراح ومناسبات الملوك والأمراء.. ومعظم مجوهراتها بتكون مهداة من قامات كبيرة في العالم.. غير إن جوزها مبارك الهاجري بيحب يدلعها ويغرقها بالهدايا والمجوهرات عشان دي الحاجة اللي هي بتحبها.. يا بختك يا ملكة.
