وسط الصراع المشتعل بين مسلسلات رمضان، وما بين الزحمة هذه بدأت بعض الأعمال تعلن عن نفسها، وتأخذ مكانها ووقتها وتقدر تجذب الجمهور لمتابعتها بشكل يومي، ومن بين هذه الأعمال مسلسل «الصفارة» الذي بيجمع بين الثنائي أحمد أمين والمخرج علاء إسماعيل..
الفنان أحمد أمين واحد من الناس اللي قدروا إنهم يكونوا من الأرقام المهمة والمميزة على الساحة الفنية، وده بسبب موهبته الكبيرة وأفكاره المختلفة، وأسلوبه كمان الجديد علينا، وفي نفس الوقت وبالرغم من إنه معروف بإنه ممثل كوميدي، لكنه كمان بيعلب تراجيدي.
الفنان أحمد أمين عامل زي ثنائية كدة مع المخرج علاء إسماعيل، ولو وبصينا للاتنين، فهنلاقي إن علاء إسماعيل كل أعماله الأخراجية تقريبا واللي هي مش كتير، كانت للفنان أحمد أمين، بخلاف مسلسل سعودي، وبرنامج متحف الدحيح، ولكن البلاتوه الجزء التاني والتالت وأمين وشركاه والفاميليا وأخيرا الصفارة، فكلهم من إخراجه وكلهم من بطولة أحمد أمين.
الفنان أحمد أمين بيقدم شخصية شفيق، وده واحد كان بيشتغل في مجال السياحة، واتعرض لموقف وحش من زميل ليه، خلاه يحس بحزن كبير، فراح اشتغل في حاجات تاني في مجال السياحة باردو، ومن خلال الرحلة دي قدر إنه يلاقي صفارة، بتسمحله بإنه يرجع بالزمن لمدة 3 دقايق.
المقصود هنا بالـ3 دقايق دول مش من اللحظة اللي هو فيها وقتها، ولكن 3 دقايق في أي زمن هو يختاره، يعني موقف قديم حصل معاه وعايز يغيره، فبيرجع لمدة 3 دقايق في الزمن ده عشان يغير تصرف معين، ولكن بيكون عليه إنه بعد نهاية الـ3 دقايق دول، يتعامل مع المستجدات لأنه بيكون رجع للوقت الحاضر التاني، ومضطر إنه يتعايش مع العالم المختلف اللي هيكون فيه بعد ما قدر يغير قرار ما في الماضي.
من خلال التغيرات اللي بتحصل دي، بيكون في مساحات لتقديم كراكترات مختلفة، بتظهر مدى براعة أحمد أمين في التجسيد، وهنشوفه بأكتر من شكل ولبس واستايل مختلف، إلى جانب ده بيظهر معاه عدد من النجوم اللي عاملين حالة مميزة في العمل زي الفنان طه الدسوقي، واللي بيعمل دور وجيه أخوه في المسلسل، والفنان حاتم صلاح اللي بيلعب دور علاء، وده واحد مهمته يقرف شفيق في عيشته.
الفنان أحمد أمين مش بس هو بطل المسلسل، هو كمان المؤلف بالتعاون مع الكاتب محمود عزت، وده تاني تعاون ما بينهم بعد مسلسل «ما وراء الطبيعة».
الحقيقة إنه أحمد أمين بيقدم مساحة كوميدية مميزة وعائلية وممتعة للأسرة المصرية من أول برنامج البلاتوه لحد مسلسل الصفارة، فهو عمل قادر إنه يبسط الأسرة المصرية من غير ألفاظ أو مصطلحات مؤذية، في نفس الوقت بيحاول يقدم أفكار جديدة ومميزة، فنقدر نقول إن أحمد أمين كسب الرهان في إنه يقدم فكرة مختلفة بشكل كويس وينافس على خريطة مسلسلات رمضان.
