الشهرة كما يكون لها مميزات يكون لها عيوب أيضا، وعندما تكون شخص مشهور فيجب أن تنتبه جيدا قبل أي تصريح ، لأن المشاهير يحاسبهم الجمهور على أي فعل مهما كان بيط.
مفيش كلام إن الفنان أحمد داش، النجم الشاب الصاعد واحد من أهم المواهب الفنية اللي قدرت تثبت نفسها خلال السنين الأخيرة، وهو من بداية ظهوره لأول مرة في فيلم «لا مؤاخذة» لما اختاره المخرج عمرو سلامة عشان يلعب الدور في الفيلم ده وهو ممثل واعد جدا.
أحمد داش قدر إنه يحافظ على نموه الفني سنة بعد سنة وعمل ورا عمل، وبيحاول إنه يركز ويتعلم ويفكر صح عشان يقدر إنه يلعب شخصياته بشكل مميز، وفي ناس كمان قالت إن هو خليفة أحمد زكي.
وخلال موسم رمضان الأخير شوفناه محقق نجاح ضخم من خلال دوره في مسلسل جعفر العمدة، واللي كان عامل حالة استثنائية مع الجمهور، المخرج محمد سامي اعتبر أحمد داش ممثل موهوب وبيحبه للدرجة اللي قال إنه عايز ياخده يربيه مع بناته، ومحمد رمضان كمان أشاد بموهبته وقال إنه قدر يعمل الحاجة الصعبة وهي إنه يمثل بسهولة وبساطة.
كمان شوفناه في فيلم هارلي أسطورة الأسفلت، وطالع مع محمد رمضان باردو، والفيلم حقق أعلى إيرادات في الأعمال المطروحة في موسم عيد الفطر.
أحمد داش وصل لمرحلة كبيرة من النجومية في عمر صغير، ودي من الحاجات اللي أصلا ممكن تدمر نفسية البعض خصوصا إنه بيكون مش عارف يتعامل مع الوضع ده، ولكن داش مدخلش في الحالة دي، ولكن محتاج يدرك إن كل تصريحاته وكل كلمة بيقولها بيكون ليها صدى واسع، وبالتالي كلامه اللي بيتقال في العلن هيكون محسوب عليه.
أحمد داش ف تصريحات لأحد البرامج اتكلم عن الكورة، وقال إنه بيعتبر أبو تريكة أحسن لاعيب في تاريخ مصر ومفيش زيه، وإن عيبه الوحيد تفكيره وانتماؤه للأهلي، وإن هو كان يقدر يخرج من الأهلي يلعب في مانشستر يونايتد، وإنه هيكون زيه زي زين الدين زيدان، وإنه بيفضله على إنيستا، والتصريحات دي جماهير الأهلي خدتها واحتفلت بأحمد داش، قبل ما يكمل كلامه.
قال كمان إن شيكابالا خلال الفترة من 2009 لـ2019 كان هو اللي شايل نادي الزمالك، وهو اللي بيوصل للمركز التاني، وكان بياخد الكورة من أول الملعب لآخره ويروح يجيب جون، وإنه لو كان بيلعب برة كان ممكن ياخد أحسن لاعب في العالم.
كل ده جميل وعادي، والتصريحات خدها جمهور الفريقين وكل واحد احتفل بيها بمزاجه وبالطريقة اللي تريحه، لكن المهم هنا إن تصريحات أحمد داش بيقول رأيه وهي عادية جدا ومفيهاش أي حاجة خطيرة أو مثيرة ومع ذلك حققت الانتشار ده، ومن هنا لازم هو ياخد باله إن كل كلمة بيقوله في لقاء أو حديث مصور هتعمل صدى وهتنتشر.
الفنان محمد رمضان بيقول إن أحمد داش صاحبه جدا في الحقيقة مش الشغل بس، وهو بيحبه، فمش عارفين بقى هل هيمشيى على خطاه وكل يوم هنلاقيه وسط مشكلة جديدة؟
