أحمد فرحات أشهر طفل في السينما وسر علاقته بالرؤساء

كان أشهر طفل على الشاشة، له عبارة مهمة لا أحد يقدر ينساها أبداً، عندماقال لعمر الشريف في فيلم إشاعة حب “بابا إنت يا حبيبي”

موهوب من صغره

موهوب من صغره اتميز بخفة دمه وشقاوته، ومع كل ده جسمه كان نحيف وملامحه معروفة.. هو الفنان “أحمد فرحات” الملقب بالطفل المعجزة وفصيح السينما.

“أحمد فرحات” مخدش حظه من الشهرة زي غيره بعدما كبر في السن.. لكن وهو صغير كان معروف للجمهور بقفشاته، وكمان أدواره المميزة.

أشهر طفل عرفته السينما

يعتبر أشهر طفل عرفته السينما المصرية بسبب عبقريته الفذة، وللسبب ده وقف قدام عمالقة الشاشة العندليب وهند رستم واسماعيل ياسين وعمر الشريف وعبد المنعم ابراهيم وتوفيق الدقن وغيرهم كتير.

ناس كتير عارفة ملامحه لكن متعرفش حاجة عن حياته الخاصة.. “فرحات” اتولد سنة 1950 وأول دور عمله كان عمره 8 سنوات، لكن لما حصلت “نكسة يونيو” اتأثر بها أوي فساب الفن واهتم بدراسته.

في معهد اللاسلكي

“أحمد فرحات” كان شاطر في دراسته، بعد حصوله على “الثانوية العامة” دخل المعهد العالي الصناعي قسم اللاسلكي، وما اكتفاش بالمعهد.. ده سافر أمريكا علشان يتعلم أكتر.
فصيح السينما اتجوز 3 مرات الأولى ما استمرتش كتير انفصل عنها واتجوز واحدة تانية، وبرضه التانية فشلت فانفصل عنها ليرتبط بست اسمها “فوزية” اللي هي عايشة معاه حالياً.

أسرار فرحات

“فرحات” عنده أسرار كتيرة في حياته أهمها عدم انجاب أبناء وده اللي خلاه ينفصل عن زوجاته الأولى والتانية.. وفي مرة اعترف بإنه اتولد باضطراب في الهرمونات منعته من الخلفة.
كمان من ضمن أسراره القوية إنه بعد نكسة يونيو قرر ترك التمثيل علشان يهتم بالتخصص اللي درسه في أمريكا وهو مجال الاتصالات، ومن خلاله تم تكليفه بتأمين اتصالات الرؤساء.

مهندس اتصالات

اشتغل “مهندس اتصالات” لمدة 30 سنة بدأت سنة 1977 بتعيينه في مكتب رئيس الجمهورية “محمد أنور السادات”، وقتها أصبح “فرحات” مكلفاً بتأمين اتصالات رئاسة الجمهورية.
اشتغل مع الرئيس السادات لمدة 4 سنوات، ومن بعده مع الرئيس محمد حسني مبارك لمدة 26 سنة.. علشان كدة أحمد فرحات كان طفل معجزة في السينما وفي شغله الرسمي.

مع الرئيس مبارك

“أحمد فرحات” بعدما طلع معاش حكى عن مواقف كتيرة حصلت بينه وبين الرئيس الأسبق حسنى مبارك منهم الموقف اللي حصل معاه لما شافه لأول مرة في مطار الدخيلة.
بيقول فرحات إنه وقتها كان مسؤول عن تأمين اتصالات مبارك من مطار الدخيلة، وهناك دخل مبارك المطار وأول ماشافه قال لسكرتيره جمال عبد العزيز: ” أنا مش عارف إيه الموظفين اللي جايبين عيالهم معاهم يصيفوا دول؟”.

موقف في القصر الجمهوري

فرد عليه “جمال عبد العزيز” قاله “يا فندم ده أحمد فرحات زميلنا بتاع الاتصالات”.. فرد عليه قاله هو ده الواد بتاع طاقية الإخفاء قاله آه يافندم هو.. فمبارك قاله: “هو هيقعد يمثل بقى ويغيب عن شغله؟.. فرد جمال سكرتير مبارك قاله “لا يا فندم هو خلاص ساب الفن”.