بدأت مسلسلات رمضان ومعاها بدأ الجمهور يتابع ويحلل ويفصص، وطبعا مع الوقت جمهور السوشيال ميديا، تحول من مجرد مشاهد، لمتذوق لديه القدرة على التحليل، وأصبحنا نرى الكثي من الناس تتحدث عن الكادرات والخطوط الدرامية، فبالتالي بدأ يلاحظ أخطاء ساذجة في بعض الأعمال الدرامية..
موسم رمضان 2023 بيشهد تنوع كبير في الأعمال الفنية المقدمة ما بين ديني وتاريخي وكوميدي وتراجيدي وكل حاجة، وطبعا كثافة الأعمال في رمضان سببها إن نسب المشاهدات بتكون أعلى، والموضوع ده طبعا ليه ميزة، إن الأعمال المميزة تضمن إن هي تحقق نسب مشاهدات كبيرة، ولكن كمان أي غلطة مش هتعدي.
وبدأ خلال الساعات اللي فاتت مع عرض أولى الحلقات من الأعمال الفنية في الموسم ده، رصد عدد من الأخطاء اللي نقدر نعتبرها ساذجة في المسلسلات، وده بيكون نتيجة عدم اهتمام بالتفاصيل أو التسرع، وهي إن كانت مش هتغير في شكل الحدوتة الرئيسية في حاجة، إلا إنها في الآخر غلطة وبناخد بالنا منها.
من بين الأخطاء اللي رصدها الجمهور لحد دلوقتي، خطأ في الحلقة الأولى من مسلسل «سره الباتع» للمخرج خالد يوسف، وده كان في أحد المشاهد لما كان أحمد فهمي واللي بيلعب دور اسمه حامد، وكان بيرعى مقام السلطان حامد.
وفي مرة من المرات رجع لقي حفرة تحت المقام، وفتح يبص، فوقع ومعرفش يطلع إلا بصعوبة جدا، وبعد فترة طويلة، والخطأ هنا، إن قبلها بثواني كان في عمال حفروا الحفرة دي، وطلعوا منها بسهولة ومكنتش بنفس العمق ده.
طبعا وخلال تصوير أحمد فهمي وهو بيحاول يطلع من الحفرة، كان واضح إن الخامة المتصممة منها الحفرة مبتعبرش عن الطين تماما، وكانت بتتهز بطريقة بتقول إن الديكور هنا مكنش مناسب.
كمان في مسلسل كامل العدد الحلقة التالتة، حصل خلاف بين «ليلى» اللي بتلعب دورها دينا الشربيني، و«أحمد» اللي بيقدمه شريف سلامة، وهي بعتتله رسالة على واتساب بتقوله إنها في كافيه المستشفى، المهم راحلها وقعد معاها، وبعدين عرف إنها مطلقة وعندها ابن فمشي غضبان، بعدها هي راحت النادي فهو طب عليها وقالها إنه عرف من صاحبتها إنها هناك، وخلال القعدة دي اتفقوا ينفصلوا، وبالتالي هما جايين من خناقة لقعدة انفصال.
ولكن بعد كدة لما حاولت تبعتله رسالة على واتساب في مشهد تاني ظهر كلام بينهم وعلامة قلب، وده مش متناسب مع سير الأحداث، اللي هما أصلا متخانقين ومنفصلين.
مسلسل «رشيد» اللي بتلعب بطولته ريهام عبد الغفور ومحمد ممدوح، ومن تأليف وسام صبري، وإخراج مي ممدوح، وقع في خطأ مضحك شوية، لأن الجمهور بيركز في تفاصيل رهيبة، وده حاجة تخلي صناع العمل هما كمان يركزوا اكتر بعد كدة.
في أحد المشاهد كان المفروض إن الزمن 2009، ولكن ظهر محل صغير في خلفية المشهد بيبيع منتج ظهر في 2021، والمنتج ده هو دوريتوس بالشطة والليمون، واللي مكنش موجود في الوقت ده.
