فنانين من الذين لديهم مكانة كبيرة عند الجمهور.. قدموا أعمال فنية كثيرة ولهم مشاهد محفورة في الذاكرة، ومازالت الحياة مستمرة ويقدروا يقدموا كل جديد ويمتعوا جمهورهم.
لكن الفنانين اللي هنتكلم عنهم في التقرير ده صحتهم بعافية شوية ومحتاجين دعوات الجمهور منهم اللي دخل العناية المركزة ومنهم اللي عملت عملية.. يلا بينا أقولكم أصل الحكاية.
الفجأة وحشة
طبعاً كل حاجة بتحصل قدر ومكتوب وبتاعة ربنا في الأول والآخر وكل اللي علينا إننا نتقبل ونرضى عشان ربنا يكون حنين علينا ويخفف الألم اللي ممكن نعيشه.. لكن عموماً الفجأة وحشة يعني تبقى قاعد في أمان الله لا بيك ولا عليك وهوب تتنقل المستشفى وفحوصات وأشعة وتحاليل وحكايات لا ليها أول ولا آخر والصحة تبقى في النازل وده اللي حصل الساعات اللي فاتت مع فنانين معروفين.
عملت عملية
الفنانة لقاء سويدان حضرت زفة الفنانة ميرنا نور الدين الجمعة اللي فاتت عادي جداً ومفيهاش أي حاجة ورقصت وهزرت وضحكت لكن مفيش كام ساعة واتنقلت المستشفى هي اتحسدت ولا إيه؟.
لكن عموماً لقاء سويدان عملت عملية جراحية اتقال إنها بسيطة وهتعدي بسرعة وحاولت الفنانة نهال عنبر اللي هي مسؤولة عن الملفات الحصبة للفنانين في نقابة الممثلين تطمن الجمهور وقالت إنها تواصلت مع الأطباء واطمنت على لقاء وقالولها إنها عملت عملية بسيطة بس مرضيتش تقول تفاصيلها إيه وكمان كلما وقت قصير وتبقى في بيتها وسط ولادها وكان يوم وهترجع تكمل حياتها عادي.
دخل العناية المركزة
اللي كان مفاجأة أكبر للجمهور هو الفنان حسام داغر اللي كتب على صفحته في فيسبوك بيقول للجمهور ادعولي أنا تعبان جداً وكمان متنسوش الدعاء لكل مريض بالشفاء، وقال إنه بيمر بوعكة صحية صعبة وحقيقي الإنسان ده ضعيف أوي قصاد أي حاجة، تعالوا ندعي لكل مريض بالشفاء وبرفع الابتلاء، يهون علينا جميعًا، ونشكر ربنا على كل حاجة وكل نعمة وربنا يقوينا على كل حاجة بتحصلنا.
لحد هنا الأمور تمام وماشية عادي لحد ما فجأة الأمور اتطورت وبدل ما يبقى حسام داغر بيتكلم مع الجمهور وطالب دعواتهم بقى في العناية المركزة لا حول ليه ولا قوة وأخوه هو اللي يطلب من الجمهور يدعيله وقالت إن حالته صعبة أوي فعلاً والموضوع مش سهل.. وكتب أحمد داغر أخو حسام بيقول حسام أخويا تعبان جدًا واتحجز في العناية المركزة في مستشفى الشيخ زايد وطلب من الجمهور يدعيله.
وحقيقي محدش عارف عنده إيه حتى لما تم التواصل معاه قال إن الدكاترة لحقوا أخوه وبقى أحسن ولسه هو تحت الملاحظة وهيخرج من العناية المركزة قريب وهيبقى في المستشفى بردوا بس في أوضة عادية عشان الدكاترة يكملوا العلاج معاه ويبقى كويس وقال إنه مش هيتكلم عن تفاصيل في التعب اللي صاب أخوه ده ولما حسام يخرج بالسلامة هو اللي يقول إيه اللي حصلها.
قلبه تعبان
مش بس لقاء وحسام هما اللي تعبوا بس ده قبلهم الفنان طارق عبدالعزيز فاجئنا إنه في المستشفى وابنه عمال يقول ادعوله لأنه تعبان جداً يعني هو كل اللي حصله أزمة قلبية مفاجئة بس الحمد لله اتلحق وعدى منها.
لكن الدكاترة قالوا عشان يبقى تمام لازم يعمل عملية قسطرة وكلنا طبعاً عارفين طارق عبدالعزيز لما كان واقف جنب عشرة عمره الفنان الراحل خالد صالح اللي قلبه تعبه بردوا من كام سنة وودع دنيتنا دلوقتي العجلة لفت وبقى طارق هو اللي تعبان وعاوز الجمهور يدعيله كلنا طبعاً بنتمناله يقوم بالسلامة بعد ما عمل القسطرة ودلوقتي هو في بيته بس بيكمل العلاج بتاعه عشان يبقى أحسن ويرجع يكمل شغله ويشوف مصالحه.
مش بس الفنانين دول اللي تعبوا ودخلوا المستشفى اليومين اللي فاتوا، إحنا كمان اتفاجئنا بمرات الفنان محمد مهران كاتبة بوست على حسابها في فيسبوك بتقول إن مهران خرج من العمليات وربنا يتمم شفائه ويحفظه.. والجمهور في الكومنتات بيدعيله.
ومحدش عارف إيه اللي عنده ولا إيه تفاصيل الأزمة الصحية اللي اتعرض ليها.. لكن نهاية الفيديو حابين نقول إن الفنانين دول مستنيين دعوات جمهورهم ولو كل واحد كتب كومنت يدعي دعوة حلوة لفنان بيحبه يمكن ربنا يستجيب وربنا يكفينا شر أي حاجة تيجي على فجأة.
