مع انتشار وسائل التواصل الاجتماعي، أصبح بالفعل أكثر سهولة للفنانين التواصل مع الجمهور والتفاعل معه،ولكن ينبغي على الفنانين الحذر من التعامل مع التعليقات المسيئة أو الخلافات مع الجمهور سواء على وسائل التواصل الاجتماعي أو في الشارع،ولكن رغم الحذر قد تحدث بعض الخلافات كما سنوضح في التقرير التالي:
أحمد زاهر غيران على بنته
واتعرف عن الفنان أحمد زاهر إنه بيحترم جمهوره ومبيمنعش حد إنه يتصور معاه ويكون ليه معاه ذكرى لكن لحد “ليلى” بنته واستوب واتضح غيرته الشديدة عليها كأب.
وده لما كانت في حفل تكريم ليها وهو لاحظ إن المعجبين اتجمعوا حواليها وعاوزين يتصوروا معاها فاضطر إنه يتصرف بمنع الكل عنها لحد ما وصلت لبر الأمان، واتضح من الفيديو اللي انتشر وقتها وهو بيزعق ويقول “هو أنا لازم أمشي بجاردات”.
حمو بيكا اتحامى في جارداته
ويمكن مؤدي المهرجانات حمو بيكا لقى نفسة بقى نجم فجأة وده اللي خلاه معندوش الخبرة إنه يتعامل صح مع المعجبين وحسن التصرف في الموقف اللي معانا ده مكانش ولابد، ووقتها كان حمو في بنزينة على طريق إسكندرية وقابل واحد من معجبينه هناك.
ولما حاول المعجب ده يتصور معاه اتفاجئ بجاردات حمو بيضربوه وبياخدوا منه الموبايل بتاعه لدرجة إن المعجب عمل محضر قال فيه إنه تم التعدي عليه وده سببله تجمع دموي في العين وكسر في الوجه، وحمو طلع دافع عن نفسه وقال ده حصل تجاوز واستفزاز من المعجب وشتمني بس عادي الله يسهله حاله وده درس الواحد لازم يتعلم منه.
كريم عبدالعزيز كان معاه حق
الفنان كريم عبدالعزيز، معروف عنه إنه شخصية متواضعة وبيحترم نجوميته وبالتالي نفسه ومعجبينه وصراحة كان معاه حق لما اتخانق مع معجب في الشارع وتحديدًا وهو بيحضر العزا بتاع والدة يسرا، ووقتها طلب منه معجب إنه يتصور معاه لكن كريم رفض وحب يديله درس في الأخلاق وقاله يابني عيب إحنا في عزا وده مش مكان نتصور فيه وسابه ومشي.
عمر الشريف
وطبعًا الفنان العالمي عمر الشريف صاحب كاريزما وحضور ولما معجب يشوفه يبقى معهوش حق لو فوت فرصة زي دي في إنه ياخد معاه صورة ولما كان بيحضر مهرجان المسرح العربي اتجمع عليه المصورين والصحفيين عشان ياخدوا معاه لقاء.
لكن هو رفض بس واحدة من الصحفيين خرجت بره السياق ووقتها أصرت إنها تعمل اللقاء معاه وده اللي عصبه وخلاه خرج عن شعوره وقالها إن اللي بتعمله ده قلة أدب لدرجة إنه كان هيكسرلها المايك.
محمود العسيلي محسبهاش مظبوط
والمطرب محمود العسيلي جه عليه وقت من الأوقات محسبهاش مظبوط مع المعجبين بالرغم لإنه ليه جمهور كبير يشهدله بالموهبة والكفاءة في اختياره لأعماله الغنائية لكنه ولسوء حظ وقع مع معجب في شر أعماله وهو في حفل غنائي ليه.
ووقتها السوشال ميديا كلها اتقلبت ضده وكإننا مش ولاد تسعة ولما حس بغلطته طلع واعتذر واللي حصل إن معجب ألح على إنه ياخد صورة مع العسيلي فقاله هو انت معاك واسطة يعني عشان أتصور معاك ولو اتصورت معاك هضطر أتصور مع كل الناس دي وده مش صح ولا انا بتكلم غلط.
أحمد الفيشاوي والغرور
ويعتبر الفنان أحمد الفيشاوي من الفنانين اللي متاخد عنه فكرة إنه مغرور وغروره ده ظهر حتى لما مكانش نجم أثبت موهبته وكان الكل بيقول عليه إنه دخل التمثيل عشان والده الفنان فاروق الفيشاوي بس قدر يكون ليه جمهوره فيما بعد رغم إن تصرفاته مبتعجبش بعض الناس .
عشان هي ضد تقاليد المجتمع العربي عمومًا، المهم إن حد من المعجبين في مرة طلب منه صورة واستجاب ليه وخد معاه أكتر من صورة مش واحد بس لكن المعجب ده فضل يجري وراه لحد ما احمد زعقله وصوتي بقى عالي وقاله أنا مش عاوز أزعلك.
