تعرض لحادث مفاجئ وتعرض لنوبة اختناق، وتمت محاولة إسعافه ونجحوا في إعادته إلى الحياة مرة أخرى. ولكن بعد ذلك توقف قلبه ولم يتمكن أحد من إنقاذه في الوقت المناسب ليصل إلى حبيبه الفنان خالد صالح. كانت آخر رسالة أرسلها تتعلق باللاعب محمد صلاح، تابعونا لمعرفة تفاصيل أو أسباب الرحيل الصادم للفنان طارق عبدالعزيز.
اللي اتقال إنه كان كويس عادي جداً لا بيه ولا عليه وبيشتغل في تصوير المشاهد بتاعته في مسلسل وبقينا اتنين وفارق الحياة خالص.. لا دكتور لحقه ولا مستشفى بقى ليها لازمة وربنا استرد أمانته.. الفنان أشرف زكي أكد رحيل الفنان طارق عبدالعزيز عن عمر 55 سنة في مستشفى زايد التخصصي.
وده حسب ما قال موقع المصري اليوم الإخباري.. وفي مصدر في كواليس مسلسل وبقينا اتنين قال في تصريحات نقلها موقع القاهرة 24 الإخباري تفاصيل الوعكة الصحية دي وقال إن الفنان طارق عبدالعزيز وقع وقت تصوير مشهد ليه في المسلسل واتصاب ببعض التشنجات وتوقف نبض قلبه ورجع مرة تانية وبعدين اتنقل للمستشفى مع ابنه.
رسالة محمد صلاح
طارق عبدالعزيز كان بيحب الكورة جداً مشجع ليها من زمان ومتابع لمشوار نجمنا المصري المحترف في ليفربول الإنجليزي محمد صلاح.. وعشان كده قال في منشور شاركه على حسابه في فيسبوك.. فضلاً وليس أمراً أدخل صوت لمحمد صلاح كأحسن لاعب في 2023 على موقع جلوب سوكر علشان يسبق رونالدو.
وده دليل على الدعم الكبير اللي بيقدمه لغيره وقلبه النقي اللي اتسبب في قبوله عند الجمهور وعند صحابه المقربين وزمايله في الوسط الفني.. وآخر رسالة ليه بقى كانت تخص القبول ده بس الأول في موضوع كده عن تعبه بالقلب وإزاي اتسبب في رحيله.
طارق عبدالعزيز كان أجرى جراحة في القلب في شهر يونيو اللي فات وكتب على حسابه في فيسبوك اللهم لك الحمد دائما وأبدا تمت القسطرة الثانية وتركيب الدعامات بنجاح وبطمن الجميع إني بخير الحمد لله وبشكرهم على الدعاء ومحاولة الاطمئنان الدائم بكل الطرق.
والغريبة بقى إنه كان محتاج متابعة لحالته الصحية وإنه ميجهدش نفسه في الشغل ولا التصوير وكده لكن الواضح إن طارق عبدالعزيز مسمعش كلام الدكاترة وربما أهمل وضعه الصحي وكانت النهاية إنه رحل بسبب أزمة قلبية.
طارق عبدالعزيز والقبول
آخر حاجة شاركها طارق عبدالعزيز في منشور ليه على حسابه في فيسبوك يخص القبول اللي بيجي من عند ربنا.. وقال إن شكلك وأهلك ولبسك وعربيتك وبيتك وولادك وشغلك مش حيخلقولك قبول عند حد مهما تخيلت هما ممكن يخلقوا زحمة حواليك وناس عايزينك لأسباب معينة لكن القبول بيجي لما تكون في حالك.
القبول بيجي لما تتمنى الخير لغيرك.. القبول بيجي لما تتقبل حالك وترضى.. غلبان قوي اللي بيحاول يشتري قبول الناس هيضيّع كل حياته يشتري حاجة ما بتتباعش.. لكن اللي سايب قلبه وروحه على طبيعتهم ومسلمها لله ده بيكَوّش على القبول كله.. والحقيقة طارق عبدالعزيز كوش على القبول كله وربنا يرحمه ويسامحه ده غير إنه كان في حاله ومن النجوم اللي في الوسط الفني لا يعرفوا المجاملة ولا غيره ودايما محبوب وسط الكل.
محدش مصدق وراح لحبيبه
محدش مصدق رحيل الفنان طارق عبدالعزيز والكل بيتكلم عن القصة دي وإنه راح لحبيبه الفنان الراحل خالد صالح بعد 9 سنين وبنفس التعب في القلب بردوا.. نعي كتير على السوشال ميديا للفنان طارق عبدالعزيز زي لا إله إلا الله محمد رسول الله وداعاً يا طيب القلب بشوش الوجه البقاء لله وفاة الفنان طارق عبدالعزيز وداع يا حبيب روحت لربنا وحبيبك الأستاذ خالد صالح روحت بنفس السبب وداعا طارق عبدالعزيز.
وفي اللي قال بمزيد من الحزن والأسى أنعى أخى وصديقي العزيز الفنان طارق عبدالعزيز الذي وافته المنيه اليوم وانتقل الي جوار ربه والله نسأل أن يغفر له ويرحمه ويسكنه فسيح جناته ويتقبله بقبول حسن وأن يلهم أهله الصبر والسلوان وإنا لله وإنا إليه راجعون.. وطارق تهامي زميل دراسته في كلية الحقوق قال أنعي ببالغ الحزن الأخ والصديق زميل الدراسة في كلية الحقوق بجامعة القاهرة الفنان طارق عبدالعزيز إنا لله وإنا إليه راجعون.. ده غير فنانين كتير نعوه زي محمد جمعة وأحمد زاهر ومهند حسني وغيرهم.
وطارق عبدالعزيز اتولد في محافظة سوهاج سنة 1968 ورحل وهو عمره 55 سنة واتخرج من كلية الحقوق والتحق بشركة ورشة عمل وأدى عدد من المسرحيات وبعدين انتقل لأداء سلسلة من المسرحيات وتجيسد العديد من الأدوار سواء كانت داعمة أو أبطال ومع الوقت بقى ليه قاعدة جماهيرية كبيرة.
