أسرار الجزء الثاني من جعفر العمدة ومفاجأة عن النجمة التي ستغيب عن المسلسل

مسلسل جعفر العمدة حقق نجاح كبير جداً وأصبح له جمهور خارج مصر وداخلها، فقد خطى نجاح هذا المسلسل أي نجاح حققه محمد رمضان مع المخرج محمد سامي في أي عمل سابق.

تحس كده في كيميا بينهم فعلاً.. ومن يوم ما انتهى عرض المسلسل في رمضان اللي فات والجمهور ملهوش سيرة غير إنه عاوز يشوف الجزء التاني.. طيب هيتعمل فيه إيه ده؟ ما خلاص كده يا جماعة وشوفوا غيره لكن لأ الموضوع باين عليه يستاهل..

ياترى بقى محمد رمضان كان متردد ليه في التعاقد على الجزء التاني من جعفر العمدة وإيه السر ورا خوفه.. وياترى مين هيشارك في الجزء التاني ومين مش هيكون موجود؟..

محمد رمضان فاجئ الجمهور من كام ساعة وأعلن إنه تعاقد على الجزء التاني من مسلسل جعفر العمدة عشان يتعرض في موسم دراما رمضان 2024 الجاي.. طبعاً خطوة زي دي الجمهور قابلها بإعجاب كبير وقال برافو واتمنوا إن المسلسل يحقق نفس نجاح الجزء الأول وأكتر..

قلبه اطمن

كلام محمد رمضان لما نشر صور ليه من التعاقد على حسابه في إنستجرام يبين إنه كان خايف من التجربة.. عشان قال إنه تعاقد لما قلبه اطمن إن الجزء التاني هيكون أقوى من الأولاني.. وطبعاً جملته الشهيرة اللي مش بتفارقه ثقة في الله نجاح وهيتعرض المسلسل في رمضان 2024.

طبعاً رمضان معملش كده قبل كده رغم إن الأسطورة نجح والبرنس نجح وكمان ابن حلال كان قوي جداً لما اتعرض.. وعشان يعمل جزء تاني من جعفر العمدة كان متردد وعاوز يشوف اللي هيقنعه يخليه يعمل كده.. وده عشان النقاد أصلا مش بيفضلوا موضوع استثمار النجاح ده عشان الخوف من الفشل.. أصل خلاص يعني حاجة نجحت ليه تعمل جزء تاني توقع الأولاني وبس كده ده الرأي الفني للنقاد دايماً.

قلق جعفر العمدة

طبعاً في سر ورا تأخير محمد رمضان في التعاقد وطبعاً هو ليه شروط في المسلسل لأنه مش واخد على موضوع الجزء التاني ده خالص.. لكن في قعدة تمت بينه وبين محمد سامي وشرحله المسلسل هيمشي إزاي والسكة سالكة عادي وعشان كده تعاقد.

هو أصلا كان خايف ومش خايف بس كان مايل أكتر لجزء تاني عشان هو مش عارف يعمل إيه بعد النجاح الكبير اللي حققه المسلسل وهيعمل إيه في رمضان الجاي ولازم سيناريو قوي لو هيعمل حاجة جديدة.. وعشان كده شاف إن أنسب حاجة يعمل جزء تاني.

توقعات جريئة

طبعاً أول ما اتقال موضوع الجزء التاني ده بدأت التوقعات من الجمهور عن اللي هيحصل في المسلسل وطبعاً كل الأحداث اللي انتهى بيها الجزء الأول من المسلسل ينفع يتربط بيها أحداث الجزء التاني.. وأول ما جت السيرة كانت دلال اللي بتجسدها الفنانة إيمان العاصي واللي تعتبر في السجن ودي بقى اللي محدش عارف هل هيكون مصيرها حبل عشماوي ولا السجن عشان دي لازم يكون ليها دور وتطلع تنتقم أصلا ما الموضوع مش هيحصل كده يعني.

الغريبة بقى إن في كلام عن إن الملكة صفصف اللي بتجسدها الفنانة هالة صدقي مش هتموت موجودة في الجزء التاني والتوقعات رايحة إنها هتكون موجودة في البدايات بس وبعدها هينتهي دورها وتودع الدنيا ويتعملها عزا كبير يلمْ أهل السيدة زينب كلهم.. أما باقي نجوم المسلسل فتفاعلوا بردوا مع اللي كتبه محمد رمضان.. وأولهم مي كساب اللي قالت مبروك علينا كلنا.

ومنذر رياحنة كمان علق وقال بالتوفيق إن شاء الله ورمضان ضربة واحدة كده من بتوعه وقاله السجن عامل إيه معاك يا أبو الشوق.. يعني شوقي فتح الله راجع السجن تاني وهيخرج تحصل معركة وحكايات.. منة فضالي هيكون ليها دور بردوا وفي الغالب مش هترجع لمحمد رمضان عشان هتحصل محاولات تاني في الموضوع إنها ترجع لجعفر بس الجديد بقى إنها هتتجوز واحد غيره.

 أزمة زينة

الناس بقى ملهاش سيرة غير الفنانة زينة اللي قالت إنها مش هتمثل تاني في مسلسل من إخراج محمد سامي يبقى لا جعفر العمدة ولا غيره.. هنا بقى إيه اللي هيحصل؟ التوقعات بتقول إن زينة هتكون مسافرة بره وهتعيش حياتها وتتجوز واحد تاني وده هيكون في المشاهد الأولى من المسلسل وجعفر هيعرف من قرايبها ودور زينة هينتهي خالص بجوازتها دي لأن رمضان مش هيسأل تاني فيها ويعيش حياته.

 مفاجأة أحمد داش

المفاجأة بقى في المسلسل كله هتكون في الفنان أحمد داش اللي هيكمل دوره عادي لحد نص المسلسل تقريباً وبعدين هيظهر محمد رمضان بشخصيتين في المسلسل واحدة جعفر العمدة والتانية عبدالجواد وهيكمل مسيرة أبوه.. طبعاً الكلام ده لسه مش مؤكد لحد دلوقتي لكن كل الكواليس اللي نعرفها إن محمد رمضان وافق على المسلسل بسبب اللقطة دي تحديداً.. وكمان أحمد داش مزعلش من كده عشان هيتفرد ليه مساحة كويسة في نص المسلسل.. يعني بالبلدي كده هيكون الدراسه اليمين لأبوه جعفر وكمان عمه سيد ونعيم هيبقى دورهم في الشغل مش بنفس قوة الجزء الأول.. وحكاية دلال بقى حكاية هتفضل مختفية لحد ما نعيم هو اللي يدور عليها وهتعرف إن أبوها ودع الدنيا وهترجع تاخد فلوسه وتكمل حياتها عادي.