مشهورة لكنها لم تختار طريق الشهرة، ولكن لأن النصيب جعلها بنت اثنين من أشهر نجوم الوطن العربية ومصر طبعا، وجميلة لأن الأب والأم من علامات الجمال، بعدت عن طريق الفن مع إن الباب كان مفتوح لها، لأنها لا ترى نفسها في هذا الطريق ، إنها منة حسين فهمي.
منة حسين فهمي، اتولدت سنة 1982، وهي عمرها حاليا 40 سنة، وطبعا زي ما هو واضح هي بنت الفنان حسين فهمي، والفنانة ميرفت أمين، ورثت منهم الجمال والقبول، لكن هي مختارتش طريق الفن زيهم، وهي شايفة إنها معندهاش الموهبة ولا الجرأة الكافية غنها تمثل.
اتعرض عليها أدوار فنية ولكنها رفضت، ويمكن أشهر الأعمال دي كان فيلم «أيام السادات» اللي كان بطله الراحل الفنان أحمد زكي، وحسب كلامها هي مكنتش تعرف ايه الدور بالظبط، لكن غالبا كان دور جيهان السادات في مرحلة المراهقة، واللي لعبته النجمة منى زكي.
قريبة من الوسط الفني سواء بالجواز، أو بالنسب، ولكن شغلها هي في مجال الملابس والإكسسوارات، عندها محلات وبتسوق لشغلها ده، وهي مبسوطة على كدة، وكل افتتاح لمكان جديد ليها بيحضره نجوم الفن والمجتمع.
الناس افتكرتها خلال الساعات اللي فاتت بعد نشر صورة ليها مع ابن عمها الفنان مصطفى فهمي، وعلقوا على الشبه اللي بينهم، والعلاقة الوثيقة اللي بين ولاد العم.
وقبلها بشوية ظهرت صورة ليها مع الفنان شادي شامل، وطبعا اللي كلنا عارفينه لما جسد دور الفنان عبدالحليم حافظ، بعد ما نشر صور بتجمعه بيها على إنستجرام وكتب عليها «أنتي تعنين الكثير بالنسبالي، وانتي عارفة»، وده اللي خلا بعض الناس يفترضوا إن في علاقة بينهم واللي ممكن نشوف خطوبة قريب ولا حاجة، لكن لحد دلوقتي مفيش.
منة حسين فهمي اتجوزت 3 مرات وكل جوازة منهم يادوب كانت 3 سنين، أو 3 وكام شهر، تقريبا هو تارجت وبتقف لحد عنده، يمكن في الجوازة الأخيرة حطمته شوية لكن لسة شوية.
أول جوازة ليها كانت من الفنان شريف رمزي سنة 2008، ولكن مستمرتش كتير لأن العلاقة بينهم انتهت بعد 3 سنين وتحديدا في 2011.
صامت فترة عن الارتباط، وبعدها سنة 2015 اتجوزت من الفنان أحمد فهمي، ودي الجوازة اللي كان عليها كلام كتير، لأن احمد فهمي كان انفصل عن أخت شريف رمزي، اللي هو الزوج الأول لمنة، وحاجات داخلة في بعضها كدة، ولكن عموما الموضوع مستمرش إلا لمدة 3 سنين، عشان ينفصلوا في فبراير 2018.
بعدها بكام شهر اتجوزت المحامي الشهير طارق جميل سعيد، وده ليه قصة تاني، لأن هو حكى إنه لما اتخرج من الكلية راح اتقدملها، وهي كان عمرها وقتها 17 سنة، وهي رفضت تقابله من الأساس، لانها كان عندها حالة خوف شديدة من مسألة الارتباط، وبعد كدة كل واحد راح لحاله سنين كتير، لحد ما اتربطوا بعد ما هي انفصلت مرتين، وهو كان اتجوز وانفصل مرة.
المحامي طارق جميل سعيد، قال إنه إخيرا بعد 20 سنة، حلمه اتحقق واتجوز حب عمره، وعبر عن سعادته بالارتباط ده، ومن ناحيتها منة قالت إنها غلطة غلطة عمرها وندمت إنها موافقتش عليه في أول مرة اتقدملها، ولكن باردو بعد 3 سنين وكام شهر كدة حصل الانفصال ما بينهم عشان تنتهي قصة الحب الجميلة دي، ولكن مع ذلك الطرفين احتفظوا بعلاقة قوية ومفيش بينهم أي خلافات.
وعموما منة بتجمعها علاقة صداقة بازواجها اللي انفصلت عنهم أو حتى زوجاتهم، سواء كانت ريهام أيمن زوجة شريف رمزي، أو هنا الزاهد، زوجة الفنان أحمد فهمي.
ومن فترة حصل جدل كدة، بعد ما انتشرت صور للفنان شريف رمزي مع بنت صغيرة، وكتب عليها «مش مصدق إنك كبرتي فجأة» وبعدين حذف الصورة تاني، والبعض ربط بينها وبينن منة حسين فهمي، وإنها بنتهم وكانوا خافين الموضوع ده، لكن منة أكدت من خلال كلامها مع جمهورها على إنستجرام إنها بتحلم بالأمومة، في إشارة واضحة لإن هي معندهاش أي أطفال من أي حد من جوازتها السابقة.
