الفنانة ريهام حجاج خلال الساعات الماضية أنجبت طفلين توأم وهما يوسف وجميلة، من رجل الأعمال محمد حلاوة، وكثير من الجمهور هنأها وعبر عن فرحه. العلاقة بين ريهام وحلاوة بدأت سنة 2019، وكانت سبب في حالة جدل كبيرة، بسبب إنه كان انفصل قبلها عن الفنانة ياسمين عبدالعزيز، وحصل أحداث كتير خلال الفترة دي..
الفنانة ريهام حجاج رزقت أخيرا بطفلين توأم من زوجها رجل الأعمال محمد حلاوة، والعلاقة بين ريهام وحلاوة كانت محل جدل كبير خلال السنين اللي فاتت، وده لانه طبعا كان متجوز الفنانة ياسمين عبدالعزيز في علاقة استمرت لسنين طويلة، وبعد الانفصال حصل كلام كتير على السوشيال ميديا بسبب الموضوع ده.
ياسمين عبدالعزيز علاقتها برجل الأعمال محمد حلاوة استمرت لمدة 17 سنة انجبوا طفلين وهما ياسمين وسيف الدين، ودي كانت من العلاقات اللي استمرت لفترة طويلة.
ياسمين قالت في لقاء صحفي إن هي قابلته وهي عندها 18 سنة وهو كان عايزها تعمل معاه إعلان، ووقتها عرض عليها الجواز اكتر من مرة ولمدة 3 سنين ولكن هي كانت رافضة، وقالت إنه وقتها مكنش رجل أعمال كبير ولا حاجة وإنهم كبروا هما الاتنين مع بعض.
سنة 2010 انتشرت شائعات انفصال ياسمين عبدالعزيز ورجل الأعمال محمد حلاوة، وللرد على الموضوع ده ظهروا مع بعض في حفل افتتاح مطعم للفنان أحمد حلمي، عشان يردوا على الشائعات دي.
استمرت العلاقة بينهم بعيدة عن الأضواء خصوصا إن ياسمين عبدالعزيز بطبعها مبتظهرش كتير، ولكن اتفاجئ الجمهور في 2019 بخبر انفصال ياسمين وحلاوة، واللي كان بدون أي مقدمات.
وقتها ارتبط اسم فنانة تاني إن ليها علاقة بالقصة دي وإنها اتسببت في الانفصال ده، وهي الفنانة ريهام حجاج، ومن الوقت ده ريهام بتقدم أعمال كبيرة وبتتشاف في كل القنوات.
ريهام حجاج في 2018 كانت بتعمل مسلسل اسمه كارما، واللي كان مشارك في إنتاج المسلسل ده، هو رجل الأعمال محمد حلاوة، وده كان قبل إعلان الانفصال بين ياسمين وحلاوة.
ياسمين عبدالعزيز في لقائها ببرنامج معكم منى الشاذلي، طلعت واتكلمت عن الموضوع وقالت إن الانفصال بالفعل كان حصل في 2018، ولكن هما غلطوا إنهم مأعلنوش عن ده من بدري، وده اللي خلى في حالة جدل عند الجمهور، وأكدت إنها هي اللي طلبت الانفصال النهائي.
ياسمين قالت إن العلاقة بينهم انتهت باحترام وفي بينهم ود وعلاقة الصداقة بينهم مستمرة وإنه بعد الانفصال كان موجود معاها في موقع التصوير بسبب مرض بنتهم، وإن اللي كانوا موجودين وقتها في مكان التصوير كانوا مستغربين من العلاقة اللي بينهم بعد الانفصال.
بعد الموضوع ده وإعلان زواج رجل الأعمال محمد حلاوة من الممثلة ريهام حجاج، بدأت بقى الصحف تتداول كلام عن تلقيح على السوشيال ميديا بين النجمتين، وردود من تحت لتحت، ولكن ريهام حجاج المرة الوحيدة اللي اتكلمت فيها كانت نشر خبر بيقول إن الجواز بينها وبين محمد حلاوة تم بعد سنة من انفصاله عن ياسمين عبدالعزيز.
وفي واحد من البرامج اتسألت ريهام حجاج هل ياسمين عبدالعزيز النجمة رقم 1 في مصر؟ فكان ردها إن هي يسرا هي رقم 1، وفضلوا لفترة في شوية حاجات من دي، لحد ما ظهر على السطح موضوع تاني خالص، وهو علاقة ياسمين عبدالعزيز بالفنان أحمد العوضي، والي فضلت باردو في بدايتها سر واتسببت في مشكلات كتير وقتها، ولكن في الأخير وبعد فترة قرر الطرفين الإعلان عن الموضوع.
