ممثلة ومخرجة مصرية، درست “اللغة الفرنسية” بكلية الآداب جامعة القاهرة.. اشتهرت بأدوار الحركة في السينما المصرية، ومن أشهر أفلامها حالة تلبس، وبنت مشاغبة جدًا.
اللي يشوفها على الشاشة، هيعرف على طول إن شخصيتها قوية.. لكن ميعرفش إنها وحدة طيبة أوي، يعني من شغلها للبيت وحياتها كلها لابنها الوحيد.. بنتكلم عن الفنانة الكبيرة “سماح أنور”.
“سماح” بنتنمي لأسرة فنية كبيرة.. أمها الفنانة الراحلة “سعاد حسين”، وأبوها الكاتب والمؤلف الكبير “أنور عبدالله”، ومع الاتنين اتولدت وعاشت “سماح” ما بين الفن والإبداع.
علاقتها بالأسرة وتأثير ده في حياتها
“سماح أنور” ليها أسرار كتيرة في حياتها، لكن علاقتها بأبوها وأمها يعتبر أهم أسرار نجاحها، بتقول إنها في آخر سنوات عمر أمها وأبوها كانوا الاتنين موجوعين أوي.
الأم فقدت بصرها، ومن يومها وأبوها اتعلق بيها أكتر لأنها كانت شريكة حياته، مكانوش بيسيبوا بعض أبداً سواء في البيت أو برة، وارتبطوا ببعض نفسياً بشكل كبير، وكان أبوها بيساعد أمها في كل خطواتها.
تصرف غريب يوم رحيل أمها
“سماح أنور” ليها سر كشفت عنه بتقول إن أمها رحلت وهي في البيت بعدما صحتها اتدهورت، وقامت بانهاء كل اجراءات الدفن من غير متعرف أبوها انها رحلت.
عملت كل إجراءات الغسل وتحضير الجنازة بنفسها بكل هدوء رغم الألم اللي كان جواها بس مكانتش قادرة تبين علشان خايف تخسر أبوها اللي كان مرتبط بيها أكتر.
لكن سماح بتقول إن اللي كانت خايفة منه حصل.. لحد ما تم تجهيز أمها للدفن أبوها مكانش يعرف، وفجأة وهما نازلين بالنعش أبوها كان قاعد في الدور الأرضي فحس إن في حركة غريبة ولما شاف النعش عرف إن شريكته رحلت فوقع من طوله.
بتقول إن أبوها وقع على الأرض فجابوله كرسي وسند راسه للحيطة وغمض عينيه.. وفي اليوم ده دخل في غيبوبة واتنقل للمستشفى وبعد كام يوم من رحيل أمها رحل أبوها، وكأنه مش عاوز يشوف حد في الدنيا غيرها.
سر جواها من سمير صبري
“سماح أنور” كانت بتربطها بالفنان الكبير “سمير صبري” علاقة صداقة من نوع خاص، لدرجة إن الناس قالوا عليهم متجوزين.. لكن سماح نفت ده وقالت إنها اتجوزت مرة واحدة من أبو أدهم ابنها.
اسمه “عاطف فوزي” في تجربة جواز عادية من غير قصة حب، وفي الوقت اللي بدأت تحبه رحل “عاطف فوزي” و وأدهم ابنهم عمره سنتين، وتحديداً سنة 1997.
ودلوقتي أدهم داخل على 26 سنة ومن بعدها رفضت الجواز علشان ابنها.
سماح شايفة انها لازم تكون أم لإبنها وخلاص رغم انه ممنعهاش تتجوز لكن هي حابة تقوم الصبح علشانه رغم انها من النوع اللي تحب تنام كتير.
وعن ارتباطها بالفنان سمير صبري.. قالت إنها كانت تتمنى تتجوزه لكن للأسف مكانش مناسب إنهم يتجوزوا بسبب السن.. وأياً كان السبب اللي منعهم عمرهم ما اتكلموا عن الحب أبداً وبالر غم من كدة الناس كانت فاكرة إن فيه بينهم علاقة، لكن ده مش حقيقي وقالت “مفيش علاقة بجد في صداقة بجد”.
سماح قالت إن سر شائعة زواجها من “سمير صبري” هو انها اشتغلت معاه كذا حاجة سواء على المسرح أو دراما وسينما وأعمال فنية تانية، وبارغم انه مكانش فيه أي مشاعر بينهم لكن كان هو أكتر واحد عارف إيه اللي بيحصل في حياتها وكان سمير صبري سرها الكبير.
مبتشربش المية من 17 سنة وعايشة على الأكلات دي بس
سماح لما اتسألت عن نظامها الغذائي كشفت عن مفاجأة وهي انها مبتشربش المية من 17 سنة وده اللي احتار فيه الدكاترة خاصة لما قالت إن شرب المية مش ضروري لأنها بتشربه بشكل غير مباشر من خلال الفاكهة والخضار والمشروبات الغازية والنسكافيه والقهوة” ومنها الجسم بياخد الكمية اللي محتاجها.
