كل يوم والثاني نجد نجم جديد طالع يستعرض التاتو الخاص به، والأمر لم يعد مقتصر على السيدات فقط، وذلك لأن نجوم رجال رسموا العديد من التاتوهات وشاركوا الجمهور صورهم بها.
منهم اللي بيختار شكل معين بيعبر عنه ، ومنهم اللي بيكتب اسم حد غالي عليه.وهو ده اللي عمله الفنان حسن الرداد ، اللي قرر يكتب اسم ابنه فادي تاتو على صدره ، وصوره ونشر صورته على انستجرام عشان يوريها للناس ، مع انه لما مراته ايمي سمير غانم كانت حامل ، كانوا مخبين خالص الخبر ومحدش عرف الا لما ولدت ايمي من كام شهر وحسن أعلن لكن كمان مرضيوش ينزلوا صورة البيبي ، ولحد دلوقتي برضه حريصين جدا انهم مينشروش صوره.
وكمان معروف عن ايمي انها بتخاف من الحسد جدا ، وكانت طول فترة حملها بتلبس واسع ومش بتتصور كتير ، وخبت الخبر على كل الناس ماعدا اسرتها لكن فاجئتهم بعد الولادة وفضلت مختفية من وقتها لحد من فترة قريبة رجعت تظهر من جديد.
لكن حسن فرحان جدا بابنه فادي اللي سماه على اسم اخوه اللي اتوفى ، وحسن كان مقرر يسمي اول مولود ليه على اسم اخوه ، مش بس كدا ده عمل اسمه تاتو على صدره.
كمان النجم عمرو دياب عملها كذا مرة وهو بيعشق التاتوهات جدا لكن بيكون حريص في اختياراته ، وكل تاتو بيعله بيكون ليه معنى وهدف ، ولانه بيحب ولاده جدا فكان كل فترة يعمل على جسمه تاتو باسم حد فيهم.
وأول تاتو عمله عمرو دياب كان باسم ابنه عبدالله وكان ده التاتو الاشهر في الوسط الفني سنة 2009 لما عمرو عمل البوم وياه ، واتصور صورة البوستر عشان يورينا التاتو اللي عمله باسم ابنه عبدالله، وفي سنة 2011 عمرو دياب عمل تاتو تاني يجمع فيه اسماء بناته التلاتة كنزي ونور وجنى.
وفي سنة 2013 عمرو دياب منسيش باباه ومامته ، وقرر يعمل تاتوه يجمع اسمهم مع بعض رقية وعبد الباسط على دراعه الشمال ، لكنه كان صعب شوية ومش كل الناس قدرت تفسره.
وفي سنة 2015 عمرو دياب حب يزاولنا شوية، فعمل تاتو على رجله وكتب LXI .. تلت حروف بس لكن ليهم معنى بالروماني وهو تاريخ ميلاده 11 أكتوبر 1961.
الموضوع شكله عجب عمرو دياب وكل فترة يفاجئنا بتاتو جديد ، وفي 2017 رسم عمرو دياب تاتو على صدر وكتب كلمة ستامنيا-Stamina ،ودي معناها القوة والقدرة على تحمل الصعاب ، مش قولتلك كل حاجة بيعملها الهضبة بيكون وراها معنى خفي.
وده كان اول تعاون بين عمرو دياب والمتخصص في رسم التاتوهات المصري محمد عبد الستار ، وبعدها بسنة رسمله تاتو على رقبته من ورا مكتوب عليه رقم السنة اللي اتولد فيها باباه ومامته سنة 1934 مع غصن زيتون.
وأخر تاتو عمله عمرو دياب كان وهو بيروج لاغنية خلص على قلبي ، وكتب اسمه بالكامل عمرو عبد الباسط دياب ، ياترى عمرو هيرسملنا ايه تاني الفترة الجاية ؟
كمان الفنانة مي عز الدين معروف عنها انها بتحب التاتو وكاتبة كلمة برنسيس على ايديها من سنين ، لكنها كمان عملت اسم مامتها تاتو من كتر تعلقها بيها.
ولما اتسألت مي عن موضوع تاتو برنسيس قالت انها بتحب اللقب ده وبتعبره تكريم ليها على كل اعمالها ، وكمان طلع عليها بعد ما غنالها عمرو دياب في فيلم عمر وسلمى، ومن وقتها وهي حبت اللقب ومبسوطة بيه وعملته تاتو على ايديها.
وطبعا مينفعش نتكلم عن التاتوهات ومنجبش سيرة احمد الفيشاوي، لكن احمد مش عامل تاتو باسم مامته ولا ولاده ، لكنه مالي جسمه كله بالوشم والرسومات بشكل غريب ومش مفهوم ، وعمل سيشن تصوير مخصوص عشان يوري الناس كمية التاتوهات اللي راسمها على صدره وايديه.
ومن فترة قريبة لما راح أحمد الفيشاوي يعمل عمرة ، اتعرض لهجوم كبير وهو لابس ابيض وقاعد قدام الكعبة لكن التاتوهات كلها باينة ، والناس هاجمته وقالتله ان ده حرام ودخلنا في قصة العمرة مقبولة ولا لا ، لكنه تجاهل الرد على اي انتقاد وعمل عمرته واحتفل بفيله ورجع.
