عمرو مصطفى من فترة للثانية يظهر ويهاجم نجوم ويدخل معهم في مشاكل، فما السبب الذي يجعله يقوم بهذا؟ فالبعض يراه عبقري جيله في الموسيقى والبعض الأخر يطلق عليه لقب هجاص فياتري من الصح فيهم؟
وليه عمرو مصطفى شايف نفسه إنه سبب نجاح عمرو دياب؟ وهل الفنانين غيرانين منه فعلًا ولا هو إحساس عادي؟.. خليكوا معايا في التقرير ده هقولكم تفاصيل كتير.
اللي بيحصل من المطرب والملحن عمرو مصطفى بيخلي الناس تستغرب عشان هجومه على النجوم عدى الحدود.. مش عارفين هو ليه شايف نفسه نجم كبير جدًا ومحدش حواليه ليه فيها يعني يقول حاجات تخلي الناس تقول ده عبقري وحاجات تانية تخلي الجمهور يضحك ويبان إنه مفهوم.. يعني هجوم على مغنيين المهرجانات تلاقيه دايس ودلوقتي دخل على نجوم الراب وأولهم ويجز اللي محقق نجاحات كبيرة جدًا طيب ليه كل ده؟.
مش عاجبه حد
عمرو مصطفى محدش يختلف على موهبته في الألحان والجمل الموسيقية اللي بيعملها وهو اشتغل مع نجوم كتير ومحدش يقدر يقول إنه مش موهوب أو محققش نجاح.
بالعكس في الحتة دي مفيش حد يقدر يقول إنه مش صنايعي موسيقى زي ما بيقولوا.. لكن المشكلة كلها إنه مش عاجبه حد وبيخانق في دبان وشه وعمل مشكلة من كام ساعة مع تامر عاشور بسبب لحن أغنية.. ده غير إنه علطول بيهدد باللجوء للمحاكم وهيدخل في قضايا وهيحبس فلان وهيقاضي علان وهكذا.
العبقري تراجع
الغريبة بقى إن عمرو مصطفى طلع بتصريح قال فيه إنه هو السبب في دخول الجيتار مصر.. والكل مسك في كلامه وانتقدوه بشكل كبير جدًا لحد ما طلع قال توضيح إنه اتفهم غلط وتصريحه مش مقصود إنه هو اللي دخل آلة الجيتار في مصر دي الآلة موجودة من قبل هو ما يتولد عند العبقري عمر خورشيد وحميد الشاعري.
بس بسبب ألحانه اللي عمله هو كان سبب في إن آلة (الجيتار) تبقى بطل أساسي في الأغنية.. وده خلى الجمهور يقول إنه عاوز يركب التريند وخلاص وإنه بيدور على أي موضوع عشان اسمه يفضل على الساحة وبس.
قصته مع الهضبة؟
الخلافات بين عمرو مصطفى والهضبة متصاعدة وشوية يختلفوا وشوية يتصالحوا بس في النهاية الهضبة ادى الصابونة لعمرو مصطفى بعد ما كانوا هيقدموا أغنية وطنية سوا بس الهضبة استعان بملحن تاني ومصطفى قال بالسلامة.
طبعًا الهضبة ولا فارق معاه شغل سنين مع مصطفى ولا مصالحة تمت بينه وبينه بواسطة تركي آل الشيخ خالص هو شايف إن ده احتراف وهو حر.
بس عمرو مصطفى قال الهضبة خذلني وأنا اديته كتير ومش هتعاون معاه تاني إحنا اشتغلنا 20 سنة مع بعض وفلوس شغلي مع عمرو دياب جبتها في فرحين أعملهم في يوم واحد وتاريخ عمرو دياب كله آخر 20 سنة بتاعي.
المهرجانات والراب
المشكلة بقى الأكبر إن عمرو مصطفى دايمًا بيهاجم مغنيين المهرجانات وبيتهمهم إنهم لهفوا الألحان بتاعته وعملوا عليها أغاني وكلوا من وراه عيش وهو ولا حد شافه بأي فلوس فقرر يقاضيهم ولحد دلوقتي ولا شوفنا أي حاجة بتحصل.
وكمان اليومين دول عمال يهاجم ويجز رغم إن طريقة ويجز ملهاش دعوة بشغل عمرو مصطفى أصلًا بس أهو أي كلام والسلام وقال إن ويجز بيشتري الألحان من على النت وبيدفع فلوس طبعًا هو مش عيب بس أنا هعمل كل يوم أغنية وهشتري ألحان عادي.
السؤال اللي بيطرح نفسه بقى هو هل عمرو مصطفى عبقري ولا هجّاص واوز يركب التريند وليه شايف الفنانين بيغيروا منه.. الإجابة هنستناها في الكومنتات بعد ما وصلنا لنهاية الفيديو.
