أحمد سعد وقع في مشكلة كبيرة بعد ما عمل حفلة غنائية في تونس مع واحدة سيدة ووقف وحدث بينهم مشادة كلامية أمام الكل وأهانهاوهذا بعد أن قاطعته وهو يتحدث.
إيه حكاية الـ80 ألف دولار اللي لهفها؟ وإيه كواليس الخناقة اللي حصلت؟ وليه أحمد سعد مشي زي المطرود والكل كان عمال يقوله يعتذرلها وهو مرضيش؟ ل وفي مصيبة عملها مدير أعماله كمان والجمهور كان هينسحب من الحفلة؟ كل ده وأكتر هتعرفوه معايا لما تتابعوا التقرير التالي:
هو أحمد سعد غاوي مشاكل ولا إيه؟.. كل ما يطلع يعمل حفلة بره مصر لازم يكون وراه حكاية جديدة بس بلاويه اللي عملها في تونس مش هتعدي على خير وشكل الموضوع هيكبر عشان أهان امرأة تونسية هناك والناس مسكتتش.. وكل ده وسط خناقة بينه وبين واحدة من منظمين الحفلة بتاعته اللي عملها هناك.. قالها اسكتي وهو بيتكلم راحت فضحته واتكلمت عن الـ80 ألف دولار وخلته ينسحب من قدام الكاميرات.
غاوي مشاكل
معداش شهر على الأزمة بتاعة القميص المخرّم اللي كان لابسه أحمد سعد في حفلة ليه في السعودية والكل اتريق عليه من بينهم طليقته إلا وكان عامل مشكلة جديدة والمرة دي في تونس.
يعني في دولة عربية شقيقة بردوا! طيب موضوع القميص وعدى بعد ما قال إنه ندمان لما عمل كده ولو رجع بيه الزمن مش هيلبس القميص ده واستقبل هجوم الجمهور عليه بإنه نوع من المحبة وهو هيسمع الكلام خلاص.
لحد هنا الكلام حلو تقوم ميعديش شهر وتتخانق في تونس مع واحدة ستْ وتقف قصادها وتقولها اسكتي أهي دي كبيرة عند التوانسة ومش هيسكتوا الموضوع شكله هيكبر وهيعمله أزمة في حفلته اللي جاية.
تفاصيل الخناقة
اللي حصل إن أحمد سعد كان عنده حفلة في مدينة بنزرت في تونس وده كان في حفل افتتاح الدورة التانية من المهرجان الدولي للتخييم والفنون والرياضة بالرمال.. الحفلة دي اتعملت في معتمدية منزل جميل على مسرح الهواء الطلق والجمهور التونسي كان مهتم وحضر بشكل كبير.. المفروض يكون في مؤتمر صحفي بعد الحفلة ولقاءات مع الكاميرات التلفزيونية والصحفية اللي بتغطي الحفلة.
قام أحمد سعد قال انا مش متفق على كده بس هقف أحترم وجودكم واسجل معاكم وأنا يشرفني إني أكون موجود وسط الإعلام والكلمتين الحلوين دول.. وهوب واحدة من المنظمين اسمها حنان الشقراني اتدخلت وقالتله إنها متفقة معاه يعمل ندوة صحفية وهو معملش قام قالها اسكتي إنتي إنتي مبعترفيش تنظمي حفلات ولا تديري حفلات ولا ليكي علاقة بالحفلات أصلا.. الست استغربت وبتقوله إزاي ولما جه يكمل كلامه قامت مقاطعاه عاوزة تاخد حقها بقى إزاي يقولها اسكتي وقالتله انت جاي عشان تاخد 80 ألف دولار وتخرج.. راح سايبها وساب الكاميرات ومشي.
فضايح وبلاوي
أحمد سعد مشي من هنا والست اللي اتقال إن اسمها حنان الشقراني صوتها بقى عالي وزعلت جدًا وقعدت تلوم على الصحفيين إزاي تفضلوا واقفين بالمايكات وهو يقولي اسكتي كنتوا انسحبوا علطول هو كده بيهين امرأة تونسية في عقر دارها وكلام كبير كده قعدت تقوله.
لكن المهم إنها فضحت سعد وقالت ده مدير أعماله قدم ديزني في الحفلة والجمهور كان زعلان وهيمشي وإحنا خلصنا الموضوع وقعدنا نهدي الناس ونقول استنوا يا جماعة وصبرنا واستحملنا وفي الآخر بيتنطط ده مش فنان ولا يمثل الفن المصري ولا يشرفنا في تونس أنا قابلت عادل إمام وكان محترم مع الكل وهو ده اللي بيمثل الفن المصري.
احتواء مرفوض
أحمد سعد حاول يحتوي الموقف ويعدي الأزمة رجع تاني عشان يكمل كلامه مع الصحفيين بس المنظمة مسكتتش وجوزها اتدخل هو كمان وكان عاوز يضرب أحمد سعد وناس اتدخلت وهوب قالتله انت مستواك أقل من فنان قام ماشي زي المطرود ومرجعش تاني والكل بقى قعد يتكلم عن اعتذاره وإنه إزاي يهين امرأة تونسية حرة.
دي المديرة بتاعة الحفل منامتش بقالها أسبوعين وتعبانة عشان تعمل حفلة كويسة واوعوا تفكروا أحمد سعد رجع عشانكم ده عشان نفسه أصله عنده حفلة قريب في مهرجان قرطاج ومش عاوز يخسرها.
وبعد ما أحمد سعد مشي ملقاش غير صفحته على فيسبوك يوضح فيها اللي حصل وإن بند الكلام في الإعلام مش موجود في التعاقد على الحفلة أصلًا.
طبعًا الخناقة دي عاملة ضجة على مواقع التواصل الاجتماعي ومش عارفين الموضوع هيوصل لحد فين وأحمد سعد هيعتذر ولا الموضوع هيعدي؟.. تفتكروا الأزمة دي هتوصل لحد في اكتبولنا في الكومنتات آرائكم وشايفين مين الغلطان في الموضوع ده المنظمة اللي قاطعته ولا أحمد سعد اللي قالها اسكتي؟.. ويا ترى سعد هيعمل حفلته في قرطاج الشهر الجاي ولا هتتلغي ويجيبوا حد مكانه؟
