مين ميحبش فاطمة؟ طبيعي فنان بهذا القدر من الجمال كل من يراها يحبها، هي يمكن بسبب أصولها الشامية، أخذت جمال مبهر ، ومن أول ما ظهرت على الشاشة علقت مع الجمهور، ورغم إنها على المستوى الفني لم تشارك في عدد كبير من الأعمال إلا إنها تركت اسم وعلامة، ودائما يوضع اسمها في جملة مفيدة، هي شيرين سيف النصر
ملامحها أجنبية ولكن لهجبتها مصرية جدا، وهي من أب مصري صعيدي كمان، وأم من أصول فلسطينية، وعاشت في مصر ومتخرجة كمان من كلية الحقوق جامعة عين شمس.
وهي صغيرة كدة كانت عايشة في فرنسا وشافها المخرج يوسف فرنسيس وقدمها للسينما عشان نشوفها في أعمال فنية كتير في الفترة دي، ولكن بعد كدة قررت الاعتزال.
هي مواليد 1967، ووالدها هو الصحفي إلهام سيف النصر، وبدايتها الفنية كانت من خلال عدد من المسرحيات، ولكن أول فيلم قدمته كان «الأستاذ» سنة 1990، وبعدها قدمت عدد كبير من الأعمال منها طبعا «سواق الهانم» و«المال والبنون» وغيرهم، ولكن هيفضل من بين الأعمال اللي مش ممكن تتنسي مسلسل «من الذي لا يحب فاطمة» واللي بقى أيقونة في مسيرتها، وكان بداية لعدد كبير من النجوم.
قدمت مع النجم عادل إمام كمان عدد من الأعمال زي النوم في العسل وأمير الظلام، ومسرحية بودي جارد.
شيرين سيف النصر في مسيرتها قدمت عدد قليل من الأعمال وده كان بسبب اعتزالها سنة 1996 بعد زواجها الأول، من رجل الأعمال السعودي عبدالعزيز الإبراهيم، عشان تغيب فترة وبعدين يحصل الانفصال وترجع تاني.
وبعدها شوية وتحديدا في يونيو 2002 اتجوز الفنان مدحت صالح من النجمة شيرين سيف النصر، ولكن حصل الانفصال بعد شهور قليلة، ووقتها اتقال إن الراقصة فيفي عبده ورا الموضوع ده، لأن كان في خلاف بينهم، وباختصار إنه كان في شراكة بينها وبين مدحت صالح في شركة تسجيل، ولما الشركة ممشيتش قررت تخرج وكان ليها شيكات باسم مدحت صالح، ولما راحت عشان تصرفها لقيتها من غير رصيد.
في الوقت ده مدحت صالح اتجوز شيرين سيف النصر، ولكن فيفي عبده كانت بتلاحقه بالقضايا للدرجة اللي خلته يدخل السجن فعلا، قبل ما تتحل المشكلة دي بعد كدة.
شيرين سيف النصر لما اتسألت عن إن فيفي عبده ورا انفصالها من مدحت صالح منفتهاش، في حين إن فيفي عبده لما اتسألت قالت: معرفش ليه بتتهمني بإني السبب في انفصالهم.
وغالبا اللي حصل إن فيفي عبده بقى استقصدته، يعني معاكش فلوس تدفعلي اللي عليك ورايح تحب وتتجوز.
المهم يعني إن شيرين سيف النصر ومدحت صالح انفصلوا، وفي الفترة دي لحد 2007 كانت آخر أعمال شيرين سيف الصر الفنية ومنها فيلم «أمير الظلام».
وفي 2010 بتتجوز شيرين سيف النصر من جراح التجميل رائف الفقي، ولكن باردو بيحصل الانفصال ولكن المرة دي مرجعتش للفن، لأن كمان والدتها اتوفت وده أثر عليها نفسيا وخلاها تبعد خالص.
وفي قصة حب في حياتها كانت من الحاجات اللي كسرت قلب نجمنا الكبير أحمد زكي، واللي كان في وقت من الأوقات بيدور على زوجة عشان يستقر ويعيش حياته ولما قابل شيرين سيف النصر في فيلم «سواق الهانم» حبها واتقدملها ولكن أهلها رفضوه.
وفي 2019 ظهرت بقى قضية على الساحة باسم شيرين سيف النصر، لما كشفت إنها اتعرضت لسرقة مجوهرات بـ5 مليون جنيه، وبعد البحث من رجال الشرطة، ظهر إن صديقة ليها هي اللي ورا الواقة دي.
شيرين سيف النصر في آخر ظهور ليها في مداخلة تليفونية قالت إنها عايزة ترجع تاني، ولكن بتدرس رجوعها عشان يكون مشرف لتاريخها.
آخر صورة ظهرت ليها الجمهور علق عليها، واستغرب إن هي لسة محتفظة بجمالها لحد دلوقتي.
