من الصعب أن تتزوج مرةأخرى، وهي عندما أعلنت هذا لم يكن مجرد كلام، ولكن كان اكتفاء، هي النجمة التي وصلت لمرحلة التواصل مع نفسها للدرجة التى تقدر تعتبر ابنها إنجازها في الحياة، وإن مهمتها انتهت، ولو اختارت العمر المناسب لنهايتها سيكون في خلال 3 سنين وهذا عندما يكون ابنها في الجامعة، لا تظهر كثير ولا تتحدث في البرامج، ومع ذلك الجمهور ينتظر منها كل كلمة وحرف، هي النجمة السورية كاريس بشار.
بعض الناس بيختاروا طريق التريند، وناس تاني بتختار طريق «دع عملك يتحدث عنك» عندها صفة مش موجودة كتير، وهي الصمت، بتتكلم لما تحس إنه جه الوقت عشان تقول، لأن عندها كلام، لو سمعت ردها على كل سؤال هتقول إنها محضرة الإجابات، ده لأنها متسقة مع نفسها بشكل كبير.
سقراط زمان قال «تكلم حتى أراك»، وأحيانا بيكون ورا الصمت جهل، ولكن كاريس ورا صمتها فخر، بنفسها، وبإنجازها، وبكل أخطائها في الحياة، واللي خليتها الشخص اللي هي عليه حاليا، محبوبة بشكل كبير من الجمهور السوري والعربي بشكل عام.
كاريس بشار مبتخجلش تكشف عمرها الحقيقي، وهي رسالة بتقدمها لكل النجمات، إن الجمال مش شرط يكون بالعمر الصغير، هي مولودة سنة 1976، عمرها حاليا 47 سنة، مهتمة بالحفاظ على رشاقتها وجمالها، بتلعب رياضة بانتظام، وبتاكل أكل صحي، قارئة ومثقفة وصاحبة تاريخ فني مميز.
ورغم الثقة اللي بتملكها، لكن هي كشفت إن أكبر أخطائها إنها مكملتش الجامعة، لأنها قررت تسيب الكلية وتمشي في الطريق اللي حبته واللي هيكون هو مشوارها بعد كدة، وهو التمثيل، وده اللي خلاها سابت مجال الإعلام، وانضمت لفرقة «زنوبيا» للفنون الشعبية عشان تبدأ مشوارها، وبعدها يشوفها النجم السوري الشهير دريد لحام عشان تشارك معاه في مسرحية «صانع المطر»، ومن بعدها تبدأ مشوارها الفني في بعض الأعمال السورية.
وهتفضل أول لحظة شهرة في حياتها بعد دورها في مسلسل «العبابيد» لأنه رغم النجاح الكبير والشهرة اللي حققتهم، لكن أول مرة تحس إن الناس بقت عارفاها، وبتشوفها في الشارع تشاور عليها كانت بعد العمل الفني ده.
معروف عن كاريس بشار قدرتها على تجسيد الأدوار المختلفة ببراعة شديدة، مشاهدها بتخطف الأنظار، خصوصا إنها بتتمتع بمجموعة مقومات بتخليها من نجوم الصف الأول، فإلى جانب موهبتها، بتتمتع بكاريزما، وشخصية، وجمال الملامح، والحفاظ على نفسها.
كاريس بشار مبتقدرش تعيش حياتها من ورا ستار، مبتحبش الاصطناع، للدرجة اللي خلتها رفضت تتصور مع واحد من المعجبين لأنه لاحظت إن الكاميرا فيها فلتر، وهي بتشوف إن الإنسان كدة مش بيكون حقيقي، وإنه ربما بعد كدة يفقد ثقته في جماله الشخصي.
آخر تجارب كاريس الفنية واللي مكسر الدنيا هو مسلسل «ستيليتو» واللي بتلعب فيه دور «ألمي السيد»، وهو مسلسل بيتكلم عن جريمة حصلت، وخلال محاولة كشف الجانب بتظهر الحكايات، كمان مشاهدها في مسلسل «كسر عضم» بيتم تداولها على السوشيال ميديا لجمال تمثيلها.
وبمناسبة السوشيال، فكاريس مكنش عندها منصات تواصل، ومؤخرا بدأت تستخدمها من باب الضرورة فقط، ولكن من الصعب تلاقي ليها تصريحات أو كلام أو خناقات أو حتى تلميحات، مكنش في أزمة معروفة في حياتها غير اللي مع مواطنتها السوري سولاف فواخرجي، واللي اتكلمت عن خلاف حصل بينهم قبل أكتر من 20 سنة، لما كان فرح سولاف، وكاريس عملت عيد ميلادها وقطعت تورتة جوة الفرح ده، وكان رد كاريس بإنها رفعت دعوى قضائية على سولاف وكسبتها.
عموما من الصعب تلاقي في حياتها حكايات من المثيرة للجدل، لأنها مبتحبش تتكلم خالص عن نفسها ولا عن أسرتها، كاريس اتجوزت مرة واحدة من رجل أعمال سوري اسمه شادي جواد، وأنجبت منه ولد وهو «مجد» وعمره حاليا 17 سنة، وحصل الانفصال في 2014، ومش بتخطط إنها تتجوز مرة تاني.
