هو فنان أردني، ولكن في مصر هنا أصبح له تاريخ وسجل كبير مع الجمهور، وجهه أصبح من أشهر الوجوه على الشاشة، يكون مقنع جدا في الأدوار الصعيدية..إنه منذ ريحانة.
لما بيلعب دور ابن البلد بنصدقه، كأنه جاي من حواري السيدة زينب.. أيوة السيدة زينب اللي بيتمثل فيها مسلسل جعفر العمدة، واللي هو بيعمل فيه دور شوقي عدو بطل المسلسل.
فنان مش مصري معجون بماية التمثيل، اشتغل بين بلده وبين مصر عشان يحقق نجاحات في الاتنين، قدر إن هو يقدم الدراما المصرية والسينما، وقدر إنه يقدم الدراما التاريخية في الأردن وكمان الحواري الشعبية.
في موسم رمضان ده بقى عامل دور مهم، وكلنا مستنيين الدراما والأحداث الشيقة اللي هتتبني عليه، هو بيقدم دور شوقي وده بينه وبين محمد رمضان مشاكل كتير، طول المسلسل بيظهر إنه بيتوعد لمحمد رمضان إنه لما يخرج من السجن مش هيسيبه، وعيلته معتمدة عليه عشان يرجعلم حقهم الغايب بعد ما جعفر العمدة مسح بكرامتهم الأرض.
الفنان منذر ريحانة لعب أدوار الشر دي أكتر من مرة، وبملامحه القاسية، وحواجبه الحادة، بيقدر إن هو يقدم أدوار الشر بشكل مميز، وده من الأدوار اللي أي ممثل عارف إنه بيكون صعب، لأنه بيتطلب انفعالات معينة، وطريقة تعامل مختلفة في كل موقف عشان تكون مقنع بالشكل الكافي.
منذر ريحانة الفنان الأدرني هيطلع هنا بدور الشاب المتربي في شوارع السيدة زينب، هيمشي زي ناسها ويتكلم زيهم، وكمان هياخد حقه بطريقتهم.
والفنان منذر ريحانة بقى بيخرج من السجن مع النص التاني من مسلسل جعفر العمدة، وبيتجوز وداد مرات سيد أخو جعفر، وده من الأمور الغريبة اللي مكنش حد فاهم إزاي لأنها متجوزة، ولكن الفنانة جوري بكر كشفت في هزار على فيسبوك إنها خلعت سيد.
وبمناسبة الأعمال اللي بتتكلم عن الحواري الشعبية فمنذر ريحانة كان عامل فيلم من كام سنة اتعرض على منصة «نتفلكس» اسمه الحارة، وهو كان بيقدم فيه بقى تفاصيل الحارة الشعبية بألفاظها بمشاكلها، والفيلم حقق ضجة كبيرة، وكان أهمها إن في واحد من النواب الأردنيين طالب بسحب الجنسية من منذر ريحانة بسبب تقديمه للمجتمع الأردني بالشكل ده، ولكن الأخير رد بإنه دي فئة موجودة ولازم يتسلط عليها الضوء.
منذ ريحانة رغم نجوميته موهبته الجبارة، إلا إن جاتله لحظة من كام سنة شك في نفسه، وقال انا مش موهوب ومش همثل تاني، الفترة دي هو كان بيمر بحالة نفسية سيئة جدا، وراح لصديقه اللي بقى بمثابة أخ ليه بعد كدة، الفنان أحمد عز، وقاله الكلمتين دول، فعز رد عليه وقاله «يا غبي انت مفيش منك اتنين»، وهو الكلام ده أثر فيه ورجع عن قراره، خصصا إنه كان بيتزامن مع الفترة دي وفاة والده وأخوه.
منذر ريحانة في أحد اللقاءات طلع على الهوا وحلق شعره بالكامل قدام الجمهور مع الإعلامي عمرو الليي، وهو هنا كان بيقدم رسالة دعم لمرضى السرطان، والجمهور تعاطف جدا مع الموقف وحيا منذر ريحانة عليه.
