أسرار مي حلمي التي اعتبرها محمد رشاد أكبر غلطة

قصتها هي قصة معظم المشاهير، تصريحات وتريندات وأزمات، ثم نهايات، وبعدين نبدأ من جديد ونعيد الحكاية، نجمتنا درست تمثيل، واشتغلت مذيعة، بيتقال إنها بتعرف تغني بس لو سمعتوا صوتها هتعرفوا إنها معلومة غلط أكيد، لكن هي عملها الأساسي مقدمة برامج.. تعالوا نتكلم عن مي حلمي

طبعا لما بتقع في فخ السوشيال ميديا مش بتعرف تطلع منه تاني، لأنك خلاص بقيت في دماغ الناس بالكام حاجة اللي فاكرينهم مش باللي انت عملته، وطول الوقت هتفضل في قايمة كدة زي المطلوبين أمنيا، كل ما تحصل حاجة الناس تستدعي اسمك وقصتك وحكايتك، حتى لو انت اليومين دول هادي وراسي ومعملتش حاجة
المهم يعني آخر كام يوم مي حلمي معملتش حاجة غير إنها قالت لضيف إنها معجبة بيه، وهو رد وقالها أنا كمان وتقريبا افتكر إنه هيروح هيلاقي مشكلة في البيت، فاتصلح الكلام بإن الجمهور كله معجب بيها وكل المصريين بيحبوها، وهي قالتله إن آراؤه مميزة، وده كان في برنامجها الرياضي اللي بتقدمه على واحدة من القنوات الفضائية.

وبمناسبة البرنامج بقى نفتكر إنه تم إيقافه قبل كدة لفترة تخطت الشهر، وده بعد ما أهانت نجم نادي الزمالك السابق أحمد صالح، في واحدة من الحلقات ومسابتهوش يتكلم، وكانت بتتعامل معاه بطريقة مستفزة، لدرجة إن الراجل قالها لو هتفضل تتكلمي كدة هنسحب وهسيب الحلقة، فقالتله فيما معناه اتكل على الله، فمشي وبعدين تم التحقيق معاها في القناة، وبعدين تم وقف البرنامج، وبعدين زي غيرها رجعت تاني.

مي حلمي اتولدت في المعادي سنة 1990، درست في معهد الفنون المسرحية، وإرشاد سياحي، واشتغلت في السياحة شوية قبل ما تروح للتقديم الإذاعي، قدمت شوية برامج منها «حلمي مع مي حلمي» و«أوسكار الأغنية الشعبية»، و«ما تسمعش وبس»، كمان دخلت مجال التقديم التلفزيوني، وبدأت تناقش قضايا رياضية، وبدأت من قناة «النهار رياضة» ومنها لقناة «أون سبورت» وبعدها قناة «الحدث اليوم».

بيتقال إنها عندها مواهب متعددة بس مشفنهاش بتمثل، ولو سمعتها بتغني هتقول إن الموهبة دي كمان مفقودة، وموضوع العزف ده ممكن تكون اتعلمت بس مش لدرجة الموهبة يعني، لكن هي إعلامية وده شغلها الرئيسي.

المهم يعني الناس افتكرت مي حلمي اليومين اللي فاتوا لأنهم اعتبروها قدوة للإعلامية منى العمدة، أيوة هي منى العمدة اللي اتوقفت من كام يوم بسبب موضوع الصوت الشتوي، والسبب إن الجمهور النسائي علق على منى العمدة، وساب القصة كلها، وقال.. ايه ده دي شبه مي حلمي خالص.

طبعا عمليات التجميل اللي عملاها منى العمدة، مغيرة ملامحها شويتين، وتقريبا كدة إما الدكتور أو منى حد منهم كان متأثر بشخصية مي حلمي، فقرر يقلدها.

لكن بالنسبة لمي حلمي نفسها، فده شكلها الحقيقي، هي بتنفي إنها عملت عمليات تجميل، لكن قالت إنها نفخت شفايفها بس، لكن المطرب محمد رشاد اللي انفصلت عنه قال إنها عملت عملية، وكانت سبب في إجهاض طفلهم.. طب ايه الحكاية.

مي حلمي ارتبطت بمحمد رشاد من كام سنة كدة وبعدين اتخطبوا، ويوم الفرح اتلغى مرة واحدة، واتقال إن ده بسبب خلافات عائلية حوالين القايمة، وبعد شهور رجعوا تاني، واتجوزا فعلا، وبعد الجواز بـ5 شهور، كشفت إن هي حامل، وبعدها أعلنت إنه تم الإجهاض، المهم يعني الموضوع عدى وخلصت، لكن بعد سنة ونص من الجواز لما حصل الانفصال، ابتدى الكلام بتفتح، شوية يتقال إن محمد رشاد ضربها، وهو منفاش إنه ضربها، لكن هو قال إن ده مالهوش علاقة بالإجهاض، لكن قال إنها كانت داخلة تعمل عملية شفط دهون، ودي كانت النتيجة.

يعني أهو كل واحد راح لحاله، وهي كانت نفسها تحب وتتحب تاني، فمن فترة كدة كشفت إنها اتخطبت لواحد ثري خليجي، بس مكشفتش هو مين، لكن مرة قالت إنه خرجها يفسحها على المركب ونشرت صورة ليهم مع بعض، وحطت قلب وشه كدة عشان تخفيه، زي ما بعض الناس بيعملوا لما بينشروا صورهم مع أطفالهم بالظبط، ولسة متجوزتش، ومش عارفين امتى.

مي إلى جانب تقديم برنامجها، متعودة تتواصل مع جمهوراه على إنستجرام، وتنزل صورها ورحلاتها، وتتخانق معاهم لو حد سأل سؤال مش على مزاجها، وبتقلهم بشكل واضح أنا هنا بنشر الحاجات العامة، والإعلانات عشان يجيلي شغل تاني، اللي هو أنا بتسخدمكم عشان أجيب أكسب، فربنا يوفقها بقى.