في مسلسلات مهما تعرض تظل تشاهدها دون الشعور بأي ملل حتى إن كنت تتذكر كل احداثه، مسلسل لن أعيش في جلباب أبي اللي بدأ عرضه من حوالي 27 سنة تقريبا من هذه المسلسلات ووقت عرضه حصلت طفرة في المشاهدات..
ياترى القصة اللي بتتفرجوا عليها بشغف كل مرة دي هي الأصلية ولا الموضوع مختلف.. ده أصلا شخصية فاطمة كشري الي عملتها الفنانة عبلة كامل دي مكانتش موجودة أصلا.. وكان الموضوع الأصلي يخص واحدة من بنات عبدالغفور البرعي.. وبنته دي مكانتش عاوزة تعيش في جلباب أبوها.. يعني مش الفنان محمد رياض هو اللي عليه العين؟
أيوه والله .. استنوا كمان دي عبلة كامل في الكواليس عملت مشكلة كبيرة في الكواليس مع بنتها في المسلسل لدرجة إنها كانت هتنفصل عن جوزها لو حابين تعرفوا كل التفاصيل دي وكمان شروط الفنان نور الشريف عشان يعمل الدور ده خليكوا معايا في التقرير التالي:
مسلسل لن أعيش في جلباب أبي يعتبر واحد من أشهر المسلسلات العربية ونجح جامد جدا في فترة التسعينيات ولحد دلوقتي حتى الإيفيهات بتاعته معروفة بين الأجيال وصورة عبلة كامل وهي قاعدة شايلة طاجن ستها زي ما بيقولوا لفت السوشال ميديا لف.. المسلسل ده خلى الشباب عندهم أمل كبير في الحياة بعد ما اتضح إنك ممكن تعمل ثروة كبيرة من الصفر وبطرق مشروعة عادي زي ما عمل الحاج عبدالغفور البرعي.
الرواية الأصلية
المفاجأة بقى عن المسلسل إن الموضوع الأصلي بتاعه مكانش كده والرواية أصلا كانت قصيرة وكان محور أحداثها حوالين بنات الحاج عبدالغفور البرعي وابنه المدلل.
يعني مفيش أي كلام عن رحلة صعوده والقصص دي ده يعني مكانش عبدالغفور راجل عصامي ولا حاجة ده كان راجل تاجر سمعته مش ولابد يعني كام راجل نصاب.. وكانت فاطمة وعبدالغفور شخصيات هامشية أصلاً والشخصية الأساسية في الرواية واحدة من بنات عبدالغفور وهي نفسها اللي كانت رافضة تعيش في جلباب أبوها مش ابنه عبدالوهاب.
يعني محمد رياض مش هو اللي مقصور بموضوع إنه مش عاوز يعيش في جلباب أبوه دي.. وكان المقصود بيها بنته نظيرة اللي جسدتها الفنانة حنان ترك.. آه ومكانش في شخصية المعلم سردينة اللي قابله عبد الغفور البرعي في رحلة صعوده دي خالص.
شروط نور الشريف
بطل المسلسل الفنان نور الشريف رفض يقدم دور عبدالغفور البرعي بالطريقة دي والنجم الراحل قرأ القصة الأصلية من هنا وقالك لا أنا لا يمكن أعمل المسلسل دم إلا لما تغيروه وأصر إن عبدالغفور نفسه يبقى شخصية عصامية والمسلسل يكون فيه قصة صعوده.. وبدأ يبحث عن شخص بنفس المواصفات لحد ما لقى الحاج ناجي في طنطا وده يبقى بيّاع خردة.. زاره نور الشريف أكتر من مرة عشان ياخذ قصة حياته ويحولها بشكل درامي وتناسب أحداث الرواية.
كمان الفنانة يسرا كانت هي اللي مترشحة تعمل دور البطولة قدام نور الشريف في وكان هيبقى دور فاطمة كشري من نصيبها وكمان هي كانت أشهر من عبلة كامل اللي مكانتش في الحسبة أصلاً.. وكمان كانت معالي زايد هي المرشحة التانية للشخصية بس في الآخر صناع العمل قالوا إن عبلة كامل هي الأنسب للشكل المصري وكمان دور بياعة الكشري لائق عليها وده كان سبب في شهرتها بعد كده.
أزمة عبلة كامل
عارفين الفنانة ناهد رشدي، اللي عملت دور سنية، كانت أكبر من عبلة كامل في الحقيقة وكمان هي قبلت الدور بعد تردد فترة طويلة بس الصراحة أقنعتنا إنها بنت عبلة كامل.. ورغم كده عبلة عملت أزمة في الكواليس لدرجة إن سنية كانت هتنفصل عن جوزها في الحقيقة.
واللي حصل إن عبلة كامل كانت بتعمل اكل كتير في بيتها وتجيبه معاها لوكيشن التصوير وكان أغلب الأكل بالتوم فكانت الريحة في المكان تهفهف وده كان بيخلي رباب حسين المخرج المنفذ للمسلسل تضايق.. وناهد رشدي مرة قالت لعبلة كامل أنا هتطلق بسببك.. أنا برّوح البيت كل يوم ريحتي توم.
ناهد رشدي كامت متجوزة وقت تصوير المسلسل، وكان عندها طفلين واحد اسمه أحمد وعنده 8 سنين والتانية دينا وعندها 3 سنين.. ده حتى دينا دي لما شافت أمها بتضرب من نور الشريف في المسلسل زعلت وكانت هتقوم تكسر التليفزيون.
مفاجأة فرح سنية
آه استنوا الفنانة منال سلامة، اللي لعبت دور نوفا دي لما بدأت تصوير المسلسل كانت حامل في الشهر الرابع وخلصت تصوير وهي في السابع وعشان كده أغلب مشاهدها كان ليظهر وشها بس ولما يتجاب جسمها كله كانت بتبقى من ورا اخواتها عشان تداري بطنها ورا الكرسي.. وبخصوص مشهد فرح سنية بقى اللي يعتبر واحد من أشهر مشاهد المسلسل اللي الجمهور بيستنى عرضه بفارغ الصبر ده بقى اتعمل ارتجالي يعني مش متحضر ليه عشان يبقى طبيعي وشبه البيوت المصرية.
والأكل اللي كان على بوفيه الفرح من بيوت الممثلات في المسلسل يعني أكل بيتي مية في المية والمخرج كان بيمنع الممثلين من الأكل طول اليوم عشان لما يصور يبقى حقيقي وشكلهم جعانين.
