كيف قدرت بنت بالملامح الروسية أن تغزو البيوت المصرية بهذه السهولة وتقدر إن تكون واحدة من أهم نجمات جيلها، وخلال السنوات الأخيرة قدرت إن تتربع على عرش الدراما المصرية.
إسهامتها في السينما مميزة جدا، لكن في الدراما، هي دايما بتكون في الصف الأول، حياتها فيها قصص وحكايات مختلفة، ولكنها في النهاية صنعتلنا نيللي كريم
الفنان نيللي كريم ومن مواليد عروس ابحر المتوسط مدينة الإسكندرية، وهي من أب مصري، وأم روسية، طفولتها قضت معظمها في روسيا، وهناك اتربت على إيد والدتها اللي كانت ست قوية وشديدة، ويمكن دي سبب واحدة من الهزائم النفسية في حياة فراشة الدراما نيللي كريم، لما اتعرضت في مرة للمرض، واللي بتقول عنها نيللي: أنا فجأة لقيتني مش عارفة أعمل حاجة كنت معتمدة عليها في حياتي وتربية ولادي.
نيللي كريم هي أصلا راقصة باليه، حياتها كان فيها تمرد كبير، والجينات المصرية كانت طاغية عليها، حتى وهي في روسيا، بتقول نيللي إن رغم إن والدتها شديدة وكانت بتهتم بتدريبها وتعليمها، إلا إنها كانت بتهرب من المدرسة مع صحابها، وهي كمان اللي كانت بتخليهم يهربوا كلهم مع بعض، تخيلوا إن نيللي كريم خلت بنات روسيا يهربوا من المدرسة.
نيللي كريم كمان بجملة التمرد اتجوزت لأول مرة وهي في عمر 16 سنة عشان تحط أهلها قدام الأمر الواقع، وأغلب الظن كان الفترة دي من حياتها كانت بقى عشان فقرة المراهقة كانت واخدة الدنيا بقلبها الجامد ومش فارق معاها حاجة ومبتفكرش وبتعمل اللي هي عايزاه بس، للدرجة اللي خلتها لما والدها اتوفى في نفس التوقيت ده، كانت معتقدة إنه عادي وإنها مش هتزعل عليه ولكن هي فوجئت إنها حزنت جدا، وافتقدته بشكل كبير في حياتها.
نيللي كريم بتقول إنها مكنتش متوقعة ولا حد كان متوقع وفاة والدها، اللي صحته اتدهورت فجأة لحد ما اتوفى، كانوا فاكرين إنه عنده التهاب في الشعب الهوائية، ولكن فوجئوا إنه مريض بالكانسر، وتعب شوية واتوفى، عشان تكتشف إنها مش عارفة تتجاوز الموضوع ده.
جوزاة نيللي كريم الأولى المتمردة اللي عملتها عشان تحط أهلها قدام الأمر الوقع دي، كان ثمرتها أبنائها الوليد كريم ويوسف، وبعده بسنين كتير وهي كانت خلاص بقت ممثلة في بداية طريقها الفني اتجوزت في 2004 خبير التغذية هاني أبو النجا، واللي كان ثمرته طفلتين وهما سيليا وكندة، وبعد 11 سنة بينهم حصل الانفصال.
الفنانة نيللي كريم كان ليها تصريحات كتير بتقول إن جوازتها كلها كانت سيئة، وكانت طول الوقت بتذم في الزيجات دي، وقالت وده اللي خلى طليقها هاني أبو النجا يطلع يقولها «حلي عني بقى، هو حضرتك إزاي متخيلة إني علشان أب محترم أني اسكتلك هو حضرتك نسيا إنك أم.. معلش عارف أنك مش فاكرة»، وبمناسبة بناتها الاتنين من خبير التغذية، فهما عايشين مع الأب، بالاتفاق ما بينهم.
الفنانة نيللي كريم اتجوزت آخر مرة من لاعب الاسكواش السابق واللي دخل مجال التمثيل مؤخرا هشام عاشور، في علاقة سريعة، بعد أول مقابلتين ما بينهم، وإعجاب متبادل وقالتله انت لذيذ أوي، فقالها يلا نتجوز.
هشام عاشور بعد مشاركته مع نيللي كريم في مسلسل «عملة نادرة» اتعرض لانتقادات كتير، ونيللي ردت على الكلام ده وقالت إن هشام لسة خبرته قليلة، وكمان ردت على اللي قاله إنها جاملته عشان يشتغل معاها، بإنها عمرها ما بتفرض حد على صناع الأعمال اللي بتشارك فيها.
الفنانة نيللي كريم خلال الموسم الحالي بتقدم عمل يعتبر جديد عليها، لأنها لأول مرة بتلعب دور واحدة صعيدية، وهي البنت اللي اتبرت في روسيا في طفولتها، اللي في وقت من الأوقات مكنتش بتعرض تقرأ أو تكتب بالعربي.
نيللي كريم بتقول غنها شخصية بتقدر تتغلب على المواقف الصعبة، وإن الإنسان ممكن يدخل في مراحل اكتئاب سنة أو اتنين أو خمسة، بس لازم دايما يلاقي طريقه للخروج، وهي نفسها بتقول إنها اتعرضت لده، ولكن كانت دايما بتخرج منه أقوى.
