قالت على شاكيرا إنها سرقت حركاتها في الرقص، وابنها يرى إن الرقص فن محترم ويقول لها هزي ياماما كويس، وتذهب لدكاترة تجميل مع رانيا يوسف، الفنانة لوسي قررت تعترف بأكثر أسرارها، تعالوا نعرفها في التقرير التالي:
لوسي علمت شاكيرا الرقص
الفنانة الاستعراضية لوسي واللي اتهمت الفنانة شاكيرا إنها سرقت حركاتها في الرقص، مش بس كده كمان لوسي قالت إن الطبال الخاص بشاكيرا كان بيجي مخصوص عشان ياخد أحزمة الرقص اللي بتشخلل ويديها بدالها سيديهات، والحركات كان بيقعد معاها بالأيام يتعلمها ويروح يعلمها لشاكيرا، ومش بس كده دي الرعشة لوحدها حوار، وياعيني على تقسيمة الوسط واللي كانت بتقف تعلمهاله كأنه واحدة بجلابية بلدي، ومش بس شاكيرا، الفنانة لوسي قالت إن أغلب الرقصات اتعلمت منهم الرقص.
الراقصة الاستعراضية لوسي قالت إنها معلمتش غادة عبد الرازق الرقص بشكل كبير، الموضوع كان مجرد دور هي هتمثله فعلمتها شوية حركات وقواعد، وغادة أصلا كانت فنانة شاطرة وتلميذة نجيبة اتعلمت الرقص بسرعة، كمان لوسي قالت إن كل رقاصة بتعرف حركاتها، وهما عادة كلهم بيعرفوا حركات بعض، زي عايدة رياض، تحية كاريوكا، وغيرهم كتير.
هزي ياماما كويس
ابن الفنانة لوسي ممانعش شغل والدته، بالعكس هو شايف إن الرقص فن سامي جدا، وإنها مش بجاحة ولا حاجة زي ماكل الناس بتقول، بالعكس ده كان وهو صغير بيشجعها ويقولها هزي ياماما كويس، كمان لوسي قالت إن الرقص فن ومعترف بيه في العالم كله، وكمان مرسوم على معابد قدماء المصريين، وكل واحد فينا بيكبر وحظه ونصيبه في الدنيا معروف، واللي مكتوب على الجبين لازم تشوفه العين، وسرحت للحظة وقالت “نصيبي كده ومكتوب على جبيني إني هبقى رقاصة وأشتغل في الأفراح الشعبية لحد ما أكبر شوية وأبقى كومبارس وممثلة ونجمة وبطلة ومشهورة، من ناحية تانية افتكرت فتحي ابنها وقالت إنه بيحب الهزار، ثقافة مختلفة وتربية مختلفة وبيلعب مزيكا، ونصحت كل الستات “طالما فكرتي تخلفي يا تربيه كويس وبما يرضي ربنا يا مجيبش أطفال”.
مفيش خلافات مع رانيا يوسف
نفت الفنانة لوسي إن مفيش أي خلافات بينها وبين رانيا يوسف، بالعكس دي قالت إنهم كانو بيروحو لدكاترة تجميل سوا، ودي حاجة مينفعش تكذب فيها، وان موضوع إنها اتكلمت على بدلة رقص دينا ده كله كذب لان كلهم أصحاب في المهنة.
استرابة: ضربت ممثلين المسرح
لما سألوا الراقصة لوسي عن اللي حصل في المسرح القومي وإزاي تضرب الفنانين بالمنظر ده، ردت بمنتهى الهدوء وقالت إنهم عصبوها، وأنا جوايا ست هادية بتحب النظام والإلتزام، والممثلين اللي كانوا معاها بالرغم من إنهم موهوبين جدا، بس مكنش فيهم حد ملتزم نهائي، ومفيش حد بيديك فرصة تقول جملتك، أنا مؤمنة جدا إني ممكن أخرج عن النص وأقول كلام أكتر واقعية بس مش لدرجة إني مقولش أي حاجة خالص
