الفنانة أمينة خليل من أبرز نجمات رمضان هذا العام، حيث تشارك بمسلسل الهرشة السابعة والذي علم مع الجمهور بصورة كبيرة ولكن للأسف يوجد العديد من الانتقادات التي طالت الفنانة أمينة خليل بسبب أدائها الأوفر على حسب وصف بعض المتابعين.
من ساعة مسلسل “خلي بالك من زيزي” والفنانة أمينة خليل رافعة سقف التوقعات تجاه شغلها وأعمالها ع الآخر.. الناس اتعلقت بالمسلسل أوي ساعتها.. وكانوا مبسوطين منها.. بس مش هنفضل عايشين ع الأطلال بقى.
السنة دي أمينة خليل عاملة مسلسل منكد على جمهور رمضان كله.. الهرشة السابعة اللي هارش الناس في دماغها ومخليهم كلهم خايفين يتطلقوا.. أو أصلا خايفين يرتبطوا لو كانوا سناجل.
الفنانة أمينة خليل من ساعة مسلسل ليه لأ.. وأغنية اللي قادرة ع التحدي وع المواجهة.. وهي رافعة شعار الست القوية.. اللي ناس كتير بيشوفوها مفترية.. بس هي في الحقيقة مش كده خالص.
على مدار 9 حلقات من مسلسل الهرشة السابعة.. اتنرفزت أمينة خليل على محمد شاهين اللي بيلعب دور جوزها في الحلقة الواحدة عشرة أو اتناشر مرة كده.. كل ما الراجل يعمل حاجة حلوة تسكت.. يقصر شوية تديله على دماغه.. لغاية ما الحمد لله قالتله طلقني أنا زهقت منك.
وفي الوقت اللي محمد شاهين وأسماء جلال وعلي قاسم واخدين السوكسيه كله والجمهور مبسوط منهم.. رغم إن شخصياتهم في الهرشة السابعة مستفزة برضه منقدرش ننكر.. بس أداءهم سلس وهادي شوية ومش بيزعقوا كتير
لكن أمينة خليل واخدة الزعيق أسلوب حياة.. وناس كتير شايفين إنها لسه معرفتش تخرج من شخصية زيزي.. بتزعق زيها.. وتتنرفز على نفس أسبابها.. وموترانا كده واحنا مش ناقصين كفاية الصيام يعني.
وبرده لما ظهرت في مشهد واحد في مسلسل رشيد.. اللي رغم إن الجمهور بيشيد بيه وبالفنان محمد ممدوح وريهام عبد الغفور.. إلا إنهم عندهم مشكلة مع الصوت في العمل.. وجت أمينة خليل زودت المشاكل.
ظهرت أمينة خليل في الحلقة الرابعة من مسلسل رشيد وعاملة دور مدمنة.. وكانت بتبص وبتزغر للناس بطريقة مكررة جدا.. الجمهور بقى حافظها خلاص.. وبدل ما يقولوا الله يا فنانة على الظهور المشرف.. خدت تعليقات سلبية قااااااااد كده.
الحلقات الجاية من الهرشة السابعة المفروض إنها الأخيرة خلاص لإن المسلسل 15 حلقة بس.. هتتحول فيهم أمينة خليل من الزوجة المقهورة.. للست اللي قدام تحديات كتير منها حياة ما بعد الانفصال.
فا الجمهور مستني يشوفها لما تبطل تزعق وتتخانق مع آدم جوزها وعيالها.. هتعمل ايه.. يا ترى هتبقى أهدى وهيشوفوا منها الوش الحلو
ولا هتتعصب أكتر لإن جوزها سمع كلامها وطلقها وراح اتجوز واحدة تانية فرفوشة ونعنوشة ومش judgmental.. ربنا يستر والله والمسلسل ميبوظش على آخر حلقاته.
