كل يوم مشكلة حسن شاكوش مع زوجته تتطور ولا أحد يراعي الآخر، فرح تكلف مبلغ كبير جدًا من شهرين وناس تحضر الفرح وتبارك ومجاملات ولا أحد يراعي حتى للمودة والرحمة.
وعمالين يقطعوا في فروة بعض ونفسهم طويل أوي الناس دي بصراحة، حتى طليقها اللي فعلًا ملوش في الموضوع رجله جت القصة وهاتك ياتقطيع لحد ما اضطرت ريم طارق ترد عليه، ياترى بقى قالت إيه وإزاي اتضررت منه وإيه التفاصيل اللي اتكلمت فيها المحامية بتاعتها بخصوص سرقتها مبلغ مالي من حسن شاكوش، ده غير موضوع السبب الطبي اللي بيمنعها من الجواز، كل ده هتعرفوه معانا في الفيديو اللي هتشوفوه.
ريم طارق بقى طليقها أهم من جوازتها
تقريبًا كده ريم طارق قالت عليا وعلى أعدائي وزي ما تيجي تيجي وفتحت النار على طليقها أحمد خليل وهاتك ياهجوم عليه وقالت إنه بقى شغلها الشاغل دلوقتي ترد عليه وتقاضيه عشان هو ملوش صفة في جوازتها من حسن شاكوش يبقى طالع يتكلم ليه.
وأكدت ريم: “خلافي مع جوزي حسن شاكوش مش المشكلة الأساسية دلوقتي المشكلة الأساسية إني تعرضت للتشهير من واحد ملوش أي علاقي بيا ومش عارفة صفته إيه علشان يطلع في التليفزيون”.
ريم طارق خدت إجراء قانوني
وواضح إن طليق ريم طارق هيزود على قضاياه قضايا تانية بعد ما ريم اتقدمت ببلاغ ضده وبتقول لازم الجهات المعنية تاخد إجراءاتها لإنه طلع يشهر بيا علشان أتنازل عن القضايا اللي بينا هو انا كده هتنازل أنا مش هتنازل وخلافي مع حسن شاكوش مسألة عائلية والإعلام ملوش علاقة بيها.
ريم طارق والضرر النفسي
وطبعًا تصريحات طليق ريم طارق ضدها عملها مشكلة نفسية وقالت إنها بقت متدمرة بسبب الإنسان اللي طلع في التليفزيون واتكلم ده وكمان المذيعة المحترمة اللي استضافته واللي تعتبر شاركت في التشهير بيا وبتشويهي نفسيا، ومرضيتش تحكي على موضوع الصلح بينها وبين حسن شاكوش رغم إن ده وارد جدًا الفترة الجاية خصوصًا إن حسن مطلعش ولا اتكلم في حاجة لسه غير إنه عمل محضر بسرقة ريم مبلغ مالي منه، طيب إيه حكايته ده كمان.
ريم طارق مش مصدقة اتهام حسن شاكوش
وفي تصريحات بردوا قالتها المستشارة القانونية هايدي الفضالي ودي تبقى محامية ريم طارق مرات حسن شاكوش قالت فيها إن حسن شاكوش اتهمها بسرقة مبلغ مالي منهان وده اللي حاجة غريبة لإنها خرجت بالهدوم اللي عليها بعد حسن ما طردها .
وقالت إن حسن اداها نسخة من مفتاح خزنته عشان يكون معاها لإن الخزنة فيها القايمة بتاعتها والدهب وإيصال الأمانة اللي مضى عليه فطبيعي يكون معاها نسخة بس هي مخدتش أي حاجة وكل اللي عملته أثبتت واقعة إنها اتطردت من بيت الزوجية بالهدوم اللي عليها ولا خدت أي حاجة من حاجتها وكله لسه في بيت حسن لدرجة إن ريم قالت أنا مش مصدقة إن حسن شاكوش يتهمني إني سرقه أكيد حد من اللي حواليه قاله يعمل فيا كده لكن دي متطلعش منه.
حكاية التعب اللي بيمنعها من الجواز
والمحامية بردوا اتكلمت عن موضوع التعب اللي بيمنع ريم طارق من الجواز مرة تانية بعد ما انتهت علاقتها الزوجية بطليقها أحمد خليل اللي طلع قال إنها عندها مشكلة صحية وده اللي خلى الناس تسأل باستغراب عن إيه اللي بيمنعها من الجواز ولو في مشكلة طليقها اكتشفها قبل الجواز ولا لبس في الحيط واتفاجئ.
وده اللي قالته المحامية إنها معندهاش مانع من الجواز ولا حاجة وكل اللي عملته إنها عملت تحاليل طبية عادية خالص قب لجوازتها الأولانية وطلعت النتايج سلبية ومعندهاش اللي يمنعها عن الجواز واللي عمله ده تنمر وتشهير وهتعمل ضده قضية جناية غير القضايا التانية الأسرية.
إيه اللي قاله طليق ريم طارق
أحمد خليل طليق ريم طارق مرات حسن شاكوش، كان كشف مفاجأة بخصوص الخلافات اللي حصلت بينهم والصور المتداولة ليهم.
وقال إن الصدمة اللي اتفاجئ بيها إنها تتجوز تاني، وهي عندها تعب صحي يمنعها من الجواز والتعب ده ظهر بعد شهرين من جوازه منها وأهلها كلموه عشان تتطلق، وهو مقصرش معاها، وقال لأهلها مش عايز أطلق وأنا هعالجها وراح معاها للدكتور اللي قاله إنها ميصحش تتجوز.
