حالة من الهجوم الشديد تعرض لها الفنان محمد فراج ،بعد تعليقه على الانتقادات العديدة الموجهة للفنانة داليا شوقي بعد عرض مشاهدها في مسلسل سفاح الجيزة.
من جانبه، كتب محمد فراج عبر حسابه الرسمي بموقع انستجرام: “بعد مساء الفل، فوجئت بعدد كبير من أصدقائي بيقولولي مزعل الجمهور ليه يا فراج؟، بصراحة استغربت من السؤال، أنا بقالي أكتر من 15 سنة ممثل، عمر ما حصل إن اتقال لي جملة زي دي.”
أول رد من محمد فراج بعد الهجوم عليه بسبب داليا شوقي
وتابع فراج: “القصة باختصار أنا كنت في العرض الخاص لفيلمي واتسألت من برنامج محترم عن ردي على إشاعة انفصالي عن بسنت وانتقاد أداء داليا، ورغم إن لا الوقت ولا المكان يستحملوا الكلام ده، لأننا بنحتفل بالفيلم، لكن احتراما للإعلام بشكل عام جاوبت، بس زي ما كلكم عارفين إن صيغة السؤال بتتحذف من المونتاج والخبر اللي بيتنشر هو الإجابة فقط لاغير، فالسؤال كان: إيه ردي على حملات الإهانة والتجريح فأنا قولت إن ده مينفعش ناخده بجدية لكن مكنتش بتكلم على الجمهور بشكل عام إطلاقًا.”
وأضاف محمد فراج:” أنا متأكد إن جمهوري اللي بنى اسم محمد فراج فاهم معنى كلامي كويس وعارف إن في فرق بين وجهة النظر وبين الإهانة والتجريح، ومتأكد إن جمهوري عارف إني مستحيل أحجر على رأيه، وياريت دايما الحكم على أي موقف أو رأي يكون بنظرة شاملة، مش من خلال سطرين متاخدين من مانشيت على فيس بوك، أو من فيديو اتعمل له مونتاج.”
واختتم:” معلش طولت عليكم بس يمكن اللي حصل ده كان فرصة لتأكيد امتناني الدائم بآراء الجمهور وإني بستفيد من النقد والملاحظات زي ما ببقى سعيد بالإشادات، بحبكم وشكرا لدعمكم ليا من بداية مشواري.”
وفي وقت سابق، علق الفنان محمد فراج على الانتقادات التي تعرضت لها الفنانة داليا شوقي، شقيقة زوجته بسنت شوقي بسبب أدائها في مسلسل سفاح الجيزة وسخرية البعض منها.
وقال فراج:”مفيش حد من اللي أتكلم بيفهم في الشغلانة كلها أكونتات وهمية وفيك وتحس أنهم واخدين فلوس.. الناس دي هتتكلم ليوم الدين والمهم ان القافلة تسير”.
وأضاف: “90% من السوشيال ميديا عندنا بتركز حاجات غلط وما ينفعش نتكلم فيها والحاجات الناجحة بيسبوها”.
