هل تتذكروا جوليا الشريك الأجنبي ضرة منة شلبي في فيلم “أبو العربي”؟ هل فكر أحكم قبل سابق اين اختفت بعد النجاح الكبير الذي حققته مع الفنان هاني رمزي، بعد رقصتها الشهيرة في فرحه على الفنانة منه شلبي، تابعونا لتعرفوا اين اختفت؟
ليلى فريد أو زي ما بنقول عليها جوليا الشريك الأجنبي.. بطلة فيلم أبو العربي.. اختفت من سنة 2005 .. ومعملتش أي فيلم تاني.. رغم إن النهارده في رقاصات كتير أجانب واكلين الساحة.. بس وقتها مكنش في سوشيال ميديا تساعدها زي النهارده
فيلم أبو العربي كان بيتكلم عن السيد أبو العربي اللي بيتاجر في بورسعيد.. وبيحب بنت اسمها مهجة.. وأبوها رافض يجوزهاله عشان فقير وعلى قد حاله.. بس السيد اللي هو هاني رمزي سافر اليونان وهناك قابل جوليا اللي حلت كل مشاكله
الفيلم اللي حقق نجاح كبير كان المفروض يبقى فتحة خير على ليلى.. اللي جت مصر سنة 2000 في زيارة وعجبتها البلد واتعلقت بيها وقررت إنها تقعد هنا.. طب هي منين أصلا وقصتها ايه؟ .. هقولكم.
ليلى هي ممثلة أمريكية.. اتولدت في مدينة سياتل.. من أم هندية وأب أمريكي.. درست الرياضيات بس كانت طول عمرها مهتمة بالفن والأزياء والتمثيل.. فا بقت ممثلة محترفة على مسارح نيويورك.. وموديل معروفة في بعض المجلات.. ولما جت مصر وحبتها قررت إنها تخوض هنا نفس التجربة.
اشتغلت شوية في مجال الاستعراض والكليبات وعروض الأزياء في مصر.. بعد ما صديقة ليها قدمتلها عرض مدته 6 شهور.. وبعد ما خلصت الفترة دي قررت إنها تكمل.. وفي يوم كانت بتقدم عرض رقص شرقي في واحد من الفنادق الكبيرة.. وشافها مخرج الفيلم وعرض عليها الدور ووافقت على طول.
ليلى درست كتير وذاكرت العربي عشان تعرف تقدم الدور بتاعها وتعبر صح.. وبعده فعلا شاركت بدور صغير كده في مسلسل سيت كوم تامر وشوقية بدور “ميس لانا” لو فاكرين.. وبعده برضه ظهرت في مسلسل 7 شارع السعادة مع أشرف عبد الباقي.
مش بس كده فاكرين كليب كلام بكلام بتاع الفنان حكيم.. أيوه.. هي ليلى اللي كانت بطلة الكليب.. وكان عندها طموح تقدم حاجات أكتر من كده.. لكن الغيرة اشتغلت واتمنعت من الرقص 7 شهور.. بسبب إن بعض الرقاصات المصريات كانوا غضبانين من ظاهرة زمايلهم الأجانب اللي جم خدوا منهم الشغل والفرص.
ليلى في حوار نادر جدا ليها.. قالت إن كان عندها مشاريع كتير مخرجتش للنور.. وكانت هتغني مع هشام عباس وسميرة سعيد.. وكانت كمان بتفكر تنتج أول شريط رقص شرقي ليها.. لكن كل دي حاجات اتبخرت في الهوا.. ورجعت تاني بلدها أمريكا ومجتش تاني.
بس رغم إن طموحها في مصر متحققش.. إلا إن ليلى لسه بتشتغل في مجال الاستعراض في أمريكا.. وكملت حلمها هناك بعد ما اتجوزت وخلفت.. يمكن معرفناش نحافظ عليها كشريك أجنبي.. بس الجمهور لسه فاكر العربي المكسر بتاعها ودمها الخفيف.
