أعمالها الفنية قليلة لكن أشهر أدوارها التي ظهرتفيها في مسلسل العصيان بطولة النجم الكبير محمود ياسين.. تقدروا اعتبروا مشاكلها مع فنانين في الوسط أكثر من الشغل ممكن تصنفها فنانة مشاغبة.
تحقيقات وراحت وقف واتوقفت سجن واتسجنت إيه تاني متعملش مش عارفين.. بس اللي فتح موضوعها تاني اليومين دول كلامها واتهاماتها الخطيرة اللي اتسجنت بسببها.. وده عشان قضيتها المنافية للآداب.. اللي بنتكلم عنها هي الفنانة غادة إبراهيم واللي هنحكيلكم تفاصيل حكايتها واتهاماتها الخطيرة.
غادة ابراهيم اتولدت يوم 1 نوفمبر سنة 1972 في اسكندرية ودرست الباليه في مدرسة ماريا أوزيليا تريتشي في اسكندرية وكمان العزف على البيانو في معهد الكونسرفتوار في اسكندرية والعزف على العود في بيت العود مع عازف العود العراقي المشهور نصير شمة.. بعد كده اشتغلت فس الإعلانات مع غادة عادل وياسمين عبدالعزيز لغاية لما اشتغلت في التمثيل.. والمشاكل بدأت.
من كام سنة كده سمعنا عن قضية آداب متهمة فيها الفنانة غادة إبراهيم.. تسكت لأ متسكتش دي فضلت تتكلم إنها ملهاش دعوة بالكلام ده وقدمت دلائل تقول إنها أصلا في الفترة اللي كانت مأجورة فيها شقتها وحصلت القضية دي كانت بره مصر.. الله أومال إيه حكاية الاتهامات دي؟ هي كانت مأجرة شقة لواحد حوائط وأرضية مش مفروش يعني وبتاخد الإيجار كل 6 شهور يعني مبتشوفش الراجل ده أصلاً.
فوتي يا أيام تعالي يا أيام رجعت غادة إبراهيم من بره وبدأ التحقيق معاها وفي أسبوعين بس خدت براءة بس حظها مكانش حلو وللأسف النيابة اعترضت على حكم القاضي واتعادت المحاكمة وخدت 3 سنين سجن عملت استشكال على الحكم وبقت الـ3 سنين سنة واحدة.. وهنا بقى غادة مسكتتش وقالت إن القضية متلفقة ليها وهي لا يمكن تعمل كده.
ملهاش في الخيانة
غادة إبراهيم ظهرت في فيديو من حلقة هتظهر فيها اليومين الجايين دول عشان تتكلم عن اللي لفقوا ليها القضية وموقفها من الخيانة اللي قالت فيه إنها متعرضتش للخيانة قبل كده ولا بتحبها ولا هتخون وشايفة نفسها كلها أنوثة وتملى عين الجن كمان مش الإنس بس وجوزي مرة قالي عايزة تنفصلي ولا تزعلي نفسك يلا بينا.. وقالت إنها في مرة حبت راجل عراقي من تكريت.
كلام غادة إبراهيم كمان وصل لحد الفنان أحمد سعد وعلقت على اللبس بتاعه إياه اللي لبسه وهو بيعمل حفلة في السعودية وقالت أنا مش بحب الراجل اللي بيلبس اللبس ده.. يعني دخلت في حكاية مش بتاعتها بردوا أصل المواضيع دي حرية بس غادة غاوية دايما تعمل قلق لنفسها.
اتهام خطير
كلام غادة إبراهيم عن قضية الآداب إياها موفقتش عند إنها متلفقة وخلاص حصل خير لأ دي قالت إن في فنانة مشهورة هي السبب وراء كده وبتقول عليها إلهام بنت عفاف طبعاً هي تقصد إلهام شاهين وكمان اتكلمت عن اسم إعلامية معروفة وسخرت منها وقالت في مذيعة تقول بحبك يا تراڤولتا ابقى تعالى مصر.. وطبعاً تقصد بوسي شلبي ما هو محدش غيرها قال كده.. وصريحة كده قالت اللي لفقلي القضية هما الاتنين الشريرات اللي يطلع أشتم عليهم في كل حتة (من بكرة قضية سب وقذف في المحكمة بقى)..
غادة إبراهيم كان ليها مشكلة بردوا مع بوسي شلبي في جنازة الفنان الراحل سمير صبري من حوالي سنة ووقتها اترفض إنها تركب أتوبيس الفنانات وكان فيه إلهام شاهين وفنانات تانيين ولما رفضوا تركب راحت واحدة عربيتها وماشية وقالت يا دار ما دخلك شر.. بس للأسف فضحت بوسي وإلهام في كل حتة وطلعت تتكلم عن اللي حصل معاها لحد ما الفنان أشرف زكي وقفها عن التمثيل لحد ما يشوف إيه اللي هيحصل وحقق معاها في النقابة وانتهى الموضوع..
ورجعت غادة إبراهيم تشتغل وكان آخر مشاركتها في مسرحية “ليلة إسكندراني” مع وزارة الثقافة ومعاها الفنان أحمد ماهر، وكمان شاركت في المسلسل الإذاعي “عروس النيل” واتذاع على محطة إذاعة الشرق الأوسط والبرنامج العام والذي تم بثه رمضان 2021.
