أول ما تسمع اسمه تتذكر فيديوهاته وهو يأكل في كل مطعم أكلات مختلفة.. يجوعك وانت تشاهده، لكن لم يتخيل أحد أن صوته بهذا الجمال، وهذا ظهر وهو يغني أغنية أجنبية أشعلت مواقع التواصل الاجتماعي، إنه الفنان مراد مكرم.
من كام ساعة بس انتشر فيديو أكيد عدى عليك وشوفته من جمال صوته ، ظهر فيه مراد مكرم وهو قاعد في كافيه في مكان عام ، وماسك المايك وبيغني أغنية أجنبية بشكل احترافي جداً ولا كأنك بتسمع أجدعها مغني أمريكي
التعليقات والقلوب على الفيديو كانت كلها دعم لمراد مكرم اللي محدش كان يعرف أنه عنده موهبة الغنا وصوته بالحلاوة دي ، وده خلى كل الناس تشير الفيديو وتطلب منه أنه يسيب برنامج الأكيل و يتجه للغناء
مراد مكرم بنفسه مكنش متوقع ان الفيديو بتاعه وهو بيغني هينتشر كدا ، وعلشان هو متابع جيد للسوشيال ميديا ، قرر يرد على الفيديو ويعلق عليه ، ونشر الفيديو كامل على صفحته على الفيسبوك ، وقال لجمهوره :” بما اني لاقيتكم بتشوفوا الفيديو على صفحات برة وعاجبكم فقولت انزله هنا كامل” .
أما بقى بالنسبة للتمثيل، فكانت آخر حاجة عملها مرد مكرم في رمضان مسلسل علاقة مشروعة مع النجوم ياسر جلال ومي عمر ، وقدم فيه شخصية أمجد الراجل اللي بيعشق تراب الست بثينة وعايز يجيبلها حتة من السما عشان يرضيها وترجعله ، والدور ده خلاه فتى أحلام البنات دلوقتي واللي نفسهم يلاقوا راجل يعمل عشانهم نص اللي أمجد عمله لبثينة
لكن هيفضل برنامج الأكيل هو المحطة الأهم في حياة مراد مكرم واللي نقلته نقلة تانية خالص مكنش متوقعها حتى وهو بيصور البرنامج في2013 ، والبرنامج ده تحديداً ليه قصة غريبة حكاها مراد مكرم في اكتر من لقاء تليفزيوني ,, تعالوا معايا اسمعوا ايه حكاية الأكيل ..
مراد مكرم كان في الأساس مذيع من أواخر التسعينيات ، وقدم برنامج على شبكة قنوات النيل زمان ، وبعدين راح قناة art ، وفي 2009 دخل عالم الفن و التمثيل اللي كان طموحه من وهو في ابتدائي لكن أهله كانوا رافضين طبعا ، وقدم أول دور ليه في فيلم أيام صعبة سنة 2009 ، وبعدها قدم ادوار تانية في الدراما والسينما
وطبعا لأن الرياح لا تأتي بما تشتهي السفن ، قامت ثورة يناير وحصلت أزمة كبيرة في وضع السينما واضطر مراد مكرم انه يوقف شغل التمثيل كذا سنة لكنه كان راجل مسئول عنده بيت و زوجة أولاد ولازم يصرف عليهم ، فلما اتعرض عليه فكرة برنامج الأكيل مكنش عاجبه لكه اضطر غصب عنه يعمل عشان يقدر يوفر لأسرته مصدر دخل ، وده الكلام اللي قاله مراد مكرم بنفسه في كذا برنامج
وصور مراد مكرم البرنامج في 2013 وبعدين اتذاع في 2014 ، ومكنش عاجبه ولا مقدم فيه كل طاقته ، لكن اعتبره تجربة يا صابت يا خابت ، لكنه اتفاجئ بنجاح كبير جدا للبرنامج واللي حقق مشاهدات عالية خاصة وأنه أول فكرة مختلفة تتعمل بالشكل ده على الشاشات المصرية
طبعا اسرة مراد مكرم كانت معترضة على برنامج الأكيل ، والدته كانت رافضة الفكرة تماما، و عمته شتمته وقالتله ” انت طالع تاكل قدام الناس .. انت مش عارف انت ابن مين ؟” ، لكن حظه ضرب والبرنامج فرقع وبقى أشهر واحد بياكل ويجوعك معاه في مصر.
