المشاهد الجريئة في الأفلام ووجهة النظر منها واحد من الأمور التي تثير الجدل باستمرار، وبعض الناس يقول طالما في سياق الدراما تمام وهذا جزء من الحياة الطبيعية، وناس تقول لا لابد أن يكون هناك سينما نظيفة.
وناس تتخانق وناس تأيد وناس ترفض، ولكن في النهاية ده موجود وبيحصل، وفي ناس بتتقبله وناس لا، ولكن مع ذلك الساحة الفنية فيها نجمات رفضوا يقدموا النوع ده من المشاهد حتى لو كان في سياق الخط الدرامي.. تعالوا نشوف.
نجمات كتير اختاروا قرار البعد عن المشاهد الجريئة، عندنا مثلا الفنانة زينة، كشفت إنها رفضت تلعب دور في فيلم «مذكرات مراهقة» للمخرجة إيناس الدغيدي، وده كان قبل بداية التصوير بيوم واحد، وكان عمرها وقتها 16 سنة، وده بسبب المشاهد الجريئة اللي فيه، ولكن أهلها رفضوا إنها تقدم ده.
النجمة نيللي كريم كمان من النجمات اللي كشفوا بشكل واضح رفضهم تقديم مشاهد فيها عري أو إثارة، وده حرصا على مظهرها قدام عيلتها وأولادها، وبتعتبر إن دورها في فيلم «إنت عمري» كان بعيد عن الجرأة ومشاهده كانت عادية وطبيعية.
الفنانة ريهام عبدالغفور من النجمات اللي بيرفضوا النوع ده من المشاهد، وكمان مش عايزة ولادها يشوفوا وعايزاهم بفتخروا بيها، كمان احترامها لنفسها ورا القرار ده، وكشفت إنها بالفعل رفضت أعمال فنية بسبب مشاهد القبلات والإغراء، وقالت إنها مش حابة بعد ما تموت تسيب تاريخ زي ده والناس تقول كانت ممثلة إغراء.
الفنانة منى زكي، كمان كشفت رفضها للمشاهد دي، ولكن بتحاول تقدم حاجات شبهها وتقدر تستمع بيها، ورغم إنها اتعرضت لانتقادات بسبب فيلم «احكي يا شهرزاد» لكن هي مش شايفة إنها قدمت فيه إغراء جامد للدرجة اللي تخليها تتعرض للهجوم، وكشفت إنها مع الإغراء المحترم ضم السياق الدرامي.
عندنا كمان النجمة ياسمين عبد العزيز، واللي عندها حدود من يوم ما دخلت الوسط الفني، وعمرنا ما شوفناها بتقدم النوع ده من المشاهد، ومع ذلك هي نجمة وناجحة، وكشفت إن هي بترفض تقديم النوع ده تماما، لدرجة إن المخرجين مبقاش عندهم الجراة يطلبوا منها.
النجمة السورية كندة علوش كمان من الفنانات اللي مش بيعملوا الوع ده من المشاهد، وأكدت إن هي معندهاش الجرأة من الأساس لتقديمها، رغم إنها اتعرضت عليها كتير، ولكن هي متقدرش تلبس ملابس مكشوفة أو تعمل إغراء.
الفنانة غادة عبدالرازق وإن كانت قدمت بعض الشيء من المشاهد دي، إلا إنها كشفت إنها طلبت من المخرج خالد يوسف يستعين بدوبلير في مشهد من فيلم «الريس عمر حرب» لجرأته الزايدة، لخوفها على مشاهر ابنها.
الفنانة أيتن عامر باردو أعلنت رفضها لمشاهد الإغراء اللي بتكون من غير داعي، وده لإنها مش عايزة تحس بالخجل قدام أسرتها بعد كدة، أو إن الناس في البيوت تمنع أولادها عن أعمالها عشان المشاهد دي.
الفنانة مي عز الدين كمان، انضمت لطابور الرافضات للمشاهد دي، سواء كان عري أو إغراء ولكن هي معندهاش مانع من تقديم الأحضان بس، لأنها فعل رومانسي.
الفنانة غادة عادل كان ليها موقف واضح، لما رفضت المشاركة في فيلم «الديلر» بسبب مشهد فيه قبلة بينها وبين الفنان خالد النبوي، لأنها خايفة على مشاعر أولادها، وأسرتها كمان.
بالمثل كانت الفنانة منة فضالي اللي رفضت المشاركة في فيلم “حلاوة روح” لأن الشخصية اللي اتعرضت عليها بتعتمد على الإغراء المفرط، وأكدت إن هي بترفض الإغراء دون توظيف في سياق درامي.
النجمة لقاء الخميسي كشفت إن عندها توازنات بتراعيها لما بتيجي تختيار أي عمل، ومنها رفضها لفيلم «احكي يا شهرزاد» خوفا على مشاعر أسرتها واستقرارها العائلي.
الفنانة إيمان العاصي من النجمات اللي بيرفضوا النوع ده من المشاهد وفي البداية بيكون المهم بالنسبالها هو النص، ومش بتوافق لو كان فيه أي مشاهد إغراء، وكشفت إنها رفضت بالفعل أعمال من النوع ده، لأنها حتى لو حققت نجاح فهو مزيف.
