نظام التأمين على الحياة بدأ من زمان جدا خارج مصر، وانتشر على يد “مشاهير العالم” لكي يأمنوا على حياتهم بمبالغ كبيرةظن فهل تعرف إن في نجوم مصريين كثير في الوسط الفني مأمنين على نفسهم؟ من هما أبرز هؤلاء النحوم وكم كانت مبالغ التأمين؟ سوف نتعرف على ذلك من خلال التقرير التالي:
نظام التأمين على الحياة تلاقي الفنان أو الفنانة أو أي شخص مشهور بيدفع مبلغ حسب قدرته يتحط بإسمه كتأمين على الحياة لو حصل له حاجة في جسمه أو تعرض لحادث، يعني مثلًا العندليب “عبد الحليم حافظ” أمن على صوته بـ 50 ألف جنيه ونور الشريف أمن على نفسه بـ 5 آلاف جنيه، وكمان الزعيم عادل إمام أمن على روحه بـ 20 ألف جنيه ده طبعاً من فترة طويلة.
التقارير الإعلامية بتقول إن النجمة اللبنانية “هيفاء وهبي” أمنت على حياتها وجسمها بمبلغ “مليار دولار”، إنما أعلى بوليصة تأمين في العالم لسة متسجلة لحد دلوقتي بإسم الديفا “ماريا كاري” ودي قيمتها بدأت بـ 810 مليون دولار، لكن دلوقتي وصلت لـ 1.035 بليون دولار متقسمين ما بين تأمين على صوتها، وعلى أجزاء من جسمها، ودي كانت “نجمة زمانها” وكانت متصنفة بصاحبة أجمل وجه إعلامي أمريكي.
التقارير قالت برضه إن النحم الإنجليزي في كرة القدم “ديفيد بيكهام” مأمن على رجليه بمبلغ 159 مليون دولار، ونجم الكورة العالمي “كريستيانو رونالدو” مأمن على رجليه بمبلغ 90 مليون دولار، والنجمة “أمريكا فيرارا” اللي كلنا عارفينها وبتشتغل في شبكة ABC أمنت على ضحكتها وسنانها ب 10 مليون دولار.
والتقارير نفسها قالت إن “فرناندو ألونسو” بطل السياقات الطويلة “فورميولا” مأمن على صباعه بمبلغ 15 مليون دولار، والمبلغ ده لأن “الإبهام” مهم في السواقة، وبيأثر عليه، والنجم الأمريكي دانيال كريج ” جيمس بوند” اللي بيستعين بدوبلير علشان يعمل المشاهد الخطرة مكانه علشان ما يتعرضش للاصابة، لما عمل مشاهد خطرة وحصلتله إصابة أمن على نفسه بـ9.5 مليون دولار .
وفي سنة 1943 النجمة الأمريكية “بيتي جرابل” اللي كانت معروفة بجمال رجليها هي أول ممثلة تأمن على رجليها سنة 1943 بمبلغ ضخم وقتها وهو “مليون دولار”.
وفي مصر بقى العندليب الأسمر عبدالحليم حافظ أمن على حنجرته بمبلغ 50 ألف جنيه لأنه كان خايف صوته يتأثر بالطقس المتقلب في مصر، والمخرج والممثل “سعد أردش” أمن على حياته بمبلغ 1000 جنيه، والفنان حسين فهمي في التمانينات اشترى وثيقتين تأمين واحده له والتانية لأولاده بقيمة كل واحدة 20 ألف جنيه، برضو ميرفت أمين ونادية لطفي وزبيدة ثروة وماجدة الخطيب أمنوا على حياتهم، إنما النجمة “ليلى علوى” أمنت على حياتها بـ 10 آلاف جنيه، والفنان “مصطفى متولي” أمن على حياته بـ 100 ألف جنيه، والورثة استفادوا من التعويض.
ومن ضمن الفنانين اللي أمنوا على حياتهم المطرب محمد فؤاد والهضبة عمرو دياب وكل واحد فيهم مأمن على نفسه بـ 2000 جنيه في التمانينيات.
ومش بس كدا كمان في نجوم كتير في الوسط الفني والرياضي من المشاهير عمومًا مأمنين على عربياتهم وممتلكاتهم.
أخيراً.. انت شايف موضوع التأمين ده ازاي خاصة إنه معمول من زمان؟ ورأيك إيه في الفنانة اللي مأمنة على سنانها والتانية اللي مأمنة على رجليها وحاجات كتيرة؟.. عاوزين تعليقاتكم على الفيديو.
