مصطفى كامل بؤذن فى مالطة،واخرته ستكون على إيد مطربى الراب والمهرجات،ومن وقت توليه منصب النقيب وهو لا حول له ولا قوة، يعاقب هذا ،الثانى يكرر نفس الموضوع، وضع بعض القوانين والقرارات وقال سأجمع شملهم لكن بشرط الالتزام.
أخرهم ويجز وما فعله عندما وضرب بكل قرارات النقابة عرض الحائط وطلع صدره واسع ويحتويه فعلا هو مكدبش، ما تيجوا نعرف إيه اللى عمله ويجز خلى كامل مستحلفله كده وتحقيقات وشوشرة ياترى إيه الحكاية؟
والله مش عارفة أقول مصطفى كامل ماسك لهم الكرباج،ولا هم اللى بيتحدوه وبيسمعوا من الودن دى ويخرجوا من الودن التانية.
لسة عمر كمال من يومين دافع غرامة وأتعمله تحقيق وكانت ليلة،ويجز مش ياخده عبرة ويمشى بما يرضى الله مع قرارات النقابة لا،شكله عايز قرصة ودن هو كمان.
إنتشرت الساعات اللى فاتت أخبار إن ويجز هيسافر قطر فى نهائى المونديال وهيعمل حفلة بين الشوطين ومحضر أغنية جديدة وهى إسم العرب.
هل ده هيزعل مصطفى كامل فى إيه؟بيغير منه مثلا،بيحقد علي نجاحه؟ بالعكس كل اللى عايزه منه إنك عايز تغنى تعالى مشكور النقابة وطلع تصريح بحفلتك دى سواء برة او جوة مصر. دى حاجة صعبة عليك يا ويجز؟
ويجز قالك بقى إيه مش تصريح اللى هيخلينى أغنى ولا مغنيش،مش تصريح اللى يتحكم فى شغلى،ووقت ما أحب أغنى هغنى.
مصطفى كامل جاب أخره من مطربين الراب صحيح،لا إجتماعات بيحضروا،ولا قرارات بيلتزموا بها ،ولا تصاريح بيطلعوها. وبيسأل نفسه كان مالى ومال الهم ده؟ وعرف فعلا اللى كان هانى شاكر شايفه منهم.
الحقيقة إن ويجز قدامه يومين ويلحق نفسه،لإنه لو فعلا قدم الحفلة دى من غير ما يستأذن النقابة،هيتعمل فيه زى ما إتعمل مع غيره ويمكن العقوبة تكون أكبر كمان.
وده اللى أكده أحمد أبو المجد سكرتير النقابة إن هيتم إتخاذ إجراءات ضد ويجز وهيتحول للتحقيق،وأكد كمان إن ويجز لحد دلوقتى ممضاش على قرارات مصطفى كامل،هو إسمه مش أكبر من عبد الوهاب وأم كلثوم يعنى علشان يعمل كده.
محمد عبدالله رئيس لجنة التحقيق بالنقابة، قال إن ويجز عضو منتسب لشعبة الراب ولم يحضر لمقر النقابة خلال الفترة اللى فاتت علشان يقنن أوضاعه ،ومش ممكن أبدا يحصل على تصاريح غنائية إلا بعد حضوره للنقابة والموافقة على شروطها، والنقابة منتظراه يرجع، وحفل المونديال هو أمر استثنائي، بسبب غيابه عن مصر الـ45 يوم اللى فاتوا.
وفي حالة لو اللى بيقال عن حفلته ده صح ،لازم يبعت توضيح، واعتذار لمجلس النقابة، وتأكيد إلتزامه بالحضور إلى مقر النقابة بعد رجوعه لمصر، والخضوع للتحقيق والتوقيع على كافة القرارات الخاصة لمطربي الراب.
والحقيقة دايما مصطفى كامل بيأكد إنه مرحب بكل ملتزم بالقرارات، وإن النقابة مش جهة منع، ولكن على ويجز، تأكيد التزامه.
مصطفى كامل عداه العيب ،قسم المطربين 3 شعب “أداء صوتى وغناء شعبى وراب” وغير إسم أغانى المهرجانات لإسم أغانى الأداء الصوتى،تفتكروا تغير المسميات هيفرق في حاجة؟
وفعلا جدد إسم الشعبة دى في النقابة، وإن الشعبة دى بتدى تصريح غناء بيتجدد كل ربع سنوي ، وده طبعا لو المطرب ملتزم بالشروط ماهى مش سايبة هي.
مش بس كده قالهم الحفلات بدون فلاشات،وطبعا محدش إلتزم بكده ولا شوفنا فرق وراهم ولا حاجة. طيب يا أخى أعمل الحفلة بدون تصريح بس حاول تلتزم بباقى القرارت مش كده يعنى .
تفتكروا عقوبة ويجز هتكون نفس غرامة عمر كمال 50 ألف جنيه ولا ممكن أكتر؟ هل ممكن تحصل ويتم إيقاف أى مطرب مخالف عن الغناء؟ياترى هيكون مصير ويجز إيه لو عمل الحفلة بدون تصريح؟وهل ممكن يعملها ويرجع يتحدى مصطفى كامل تانى؟ ياترى إيه اللى مخلى ويجز رافض قرارات النقابة أو رافض يمضى عليها؟
هنعرف كل التفاصيل دى الساعات الجاية تابعونا..
