فجأة وبدون مقدمات وجدنا صور وفيديوهات فرح يوسف ابن ماجد الكدواني ، منتشرة بشكل كبير على السوشيال ميديا ، والفرحة في عيون ابوه وهو واقف أمام ابنه العريس.
الفرح اتعمل على الضيق خالص ، من غير ضجة كبيرة بقى زي باقي النجوم ، لكن ماجد الكداوني اكتفى بانه يعزم شوية نجوم صحابه و العيلة والاهل والاحباب بس.
واول فيديو شوفناه كان ليوسف وعروسته كارلا منصور ، وهما في الكنيسة ، وده كان مفاجآة لناس كتير مكنوش يعرفوا ان ماجد الكدواني اصلا مسيحي ، وبيمثل من زمان وكنا فاكرينه مسلم ، لكن عادي الدين لله والوطن للجميع.
وظهر ماجد الكدواني وهو واقف في الكنيسة وبيهزر مع حد بيصوره بالكاميرا ، وكان مبسوط جدا بابنه ، وانتشر الفيديو على السوشيال ميديا.
وبعد ما خلص الجزء الاول من الفرح في الكنيسة ، طلعوا على الفندق اللي عاملين فيه الفرح ، وبدأت الليلة الحلوة اللي استناها ماجد الكدواني ومراته من زمان وهو بيفرح بابنه.
وحضر الفرح نجوم قليلن وهما الدايرة القريبة لماجد الكدواني ، منهم النجمة دنيا سميرغانم وجوزها رامي رضوان ، ونشرت دنيا صورة ليها مع ماجد ومراته ، ودي كانت اول مرة نشوف فيها زوجة ماجد الكدواني لأنه ملوش في السوشيال ميديا ومش بينزل صور اصلا،وكتبت دنيا على صورتها معاهم : ميجزي الغالي ولافي حبيبتي .. ربنا يحفظكم ويسعدكم”.
وكمان حضر الفرح فريق العمل بتاع مسلسل موضوع عائلي اللي عمله ماجد وحقق نجاح كبير جدا هو ورنا رئيس
وحضرت كمان النجمة ريهام عبد الغفور ، واتصورت مع ماجد الكداوني ونشرت الصورةع على انستجرام وكتبت : ابو العريس .. الف مبروك يا حبيب قلبي”.
ومن يومين عمل يوسف حنة ليه ولعروسته ، وكانت مقتصرة على الاسرة فقط ، واكتفوا بفرح هادي من غير زحمة كتير
ماجد الكدواني عنده ولد وبنت ، وهما يوسف وساندرا ، ومكنش ليهم في التمثيل زي ابوهم لحد ما دخل يوسف المجال وشارك في مسلسل ولاد ناس سنة 2021 ، وبعدها ظهر مع ابوه في الجزء الاول من مسلسل موضوع عائلي لكن في دور صغير.
والظهور الكبير بقى والاهم كان في مسلسل وبينا معاد اللي اتعرض من فترة وكان بطولة شيرين رضا وحقق نجاح كبير ، ومن وقتها اتعرف يوسف وبقى مستعد انه يخوض التجربة تاني ويكمل في مجال التمثيل زي باباه ، لكن عروسته كارلا هي من خارج الوسط الفني خالص.
وماجد الكدواني ملوش اوي في السوشيال ميديا وجو الصور والحركات دي عشان كدا محدش يعرف عيلته بشكل كبير، ومراته مش شخصية معروفة للجمهور، لكنهم ظهروا مع بعض كلهم في العرض الخاص لفيلم البعض لا يذهب للمأذون مرتين ، وقرر وقتها ياخد مراته وولاده معاه ، ودي كانت اول مرة نشوفهم سوا.
ماجد مظهرش كتير مع ابنه يوسف ، ومشوفناهمش في اي لقاء تلفزيوني خالص ، لكنه اكتفى بكلمتين عنه قبل كدا من غير ما يدخل في تفاصيل ، ده طبع ماجد الخصوصية ، ووقتها قال انه مش هيتدخل في قراره اذا كان هيدخل الوسط الفني او ولا وسايبه يختار الحاجة اللي بيحبها براحته ،، عشان كدا كلنا بنحب شخصية ماجد الكدواني وبنحب تمثيله كمان.
