تميز بأدواره الطيبة وروحه الحلوة على الشاشة، وكان هو القاضي ذو الضمير اليقظ في مسرحية “شاهد ماشفش حاجة” مع الزعيم “عادل إمام”.
من الفنانين التقال أوي، نجح في وضع اسمه ضمن عباقرة الفن، وكمان حضر عرض فيلم “أولاد الذوات” اللي هو أول فيلم مصري ناطق سنة 1933 وكان عمره وقتها سبع سنوات.
بنتكلم عن الفنان الكبير “عمر الحريري” اللي واجه صعوبات كتيرة في حياته، وكمان له أسرار صادمة محدش كتير من جمهوره يعرفها، خاصة علاقته بعادل إمام في أواخر أيام حياته.
“عمر الحريري” اتولد سنة 1926 وليه تاريخ فني حافل ما بين سينما ودراما ومسرح وصلوا لـ 300عمل فني، وارتبط بالشاشة بطريقة كبيرة لكن المسرح كان عشقه الأول لدرجة غنه أتمنى يرحل من على خشبته ودي الأمنية اللي اتحققت بالفعل.
شارك الزعيم 3 مسرحيات وبسبب موقف رفض يزوره أو يحضر العزا
“عمر الحريري” كان من ضمن دفعته بمعهد الفنون المسرحية الفنان “شكري سرحان” واتخرجوا منه سنة 1947 ارتبط سنوات طويلة مع الفنان عادل إمام وعمل معاه مسلسل أحلام الفتى الطائر” ومسرحيتين اللي هما شاهد مشفاش حاجة والواد سيد الشغال.
كانت علاقتهم ببعض معروفة زادت عن 30 سنة، وفي يوم اتفاجئ “الحريري” بعادل إمام مرشحه لمسرحية تالتة معاه، لكن “الحريري” بكل جرأة وقال له: “بلاش علشان الناس متقولش إنه مرتبط بعادل إمام بس”.
“الحريري” لما رفض يشارك عادل مسرحيته التالتة مكانش يعرف إنها هتكون سبب مقاطعة عادل له.. لكن عرف ده لما أصيب “عمر” بأزمة صحية، وقتها طلب من بنته يشوف “عادل” قبل رحيله لكن اتصدم لما عرف إن “عادل” رافض يزوره..
لكن كانت الصدمة الكبيرة كانت لبناته لما رحل أبوهم اتفاجئوا برفض “عادل إمام” يحضر حتى عزاه، فالناس قالت ان نفس الموقف ده عمله مع صديق عمره سعيد صالح.
اتجوز 3 ودي قصة فنانة ضحكت عليه!
حياة “عمر الحريري” فيها أسرار غريبة.. أول واحدة اتجوزها كانت السيدة “امال السلحدار”، ومن شدة غيرتها عليه انفصلت عنه تلات مرات، وفي المرة التالتة رجعها بعد اصابتها بالكانسر وبرحيلها أصيب بحالة حزن كبيرة.
في المرة التانية اتجوز واحدة اسمها “نادية سلطان” ودي كانت مثقفة وراقية وواحدة من سيدات المجتمع وخلف منها بنته “ميريت الحريري” شغالة في الفن دلوقتي.
وعلشان “عمر الحريري” كان طيب في حياته زي ما كان طيب في أدواره.. وقع في حب فنانة مغربية اسمها ” رشيدة رحموني” لفت عليه واتجوزته في أواخر ايامه وخلفت منه بنت وحيدة في مجال الفن.
حاول يغير اسمه لسبب غريب
عمر الحرير ليه قصة غريبة في اخر ايامه لما حاةول يغير اسمه من “عمر محمد الحريري” لـ “فريد” ودي كان فكرة غريبة لما سألوه قال إنه مش عاوز الناس تحبه علشان هو مسلم، لكن عاوز الناس تحبه من غير أي اعتبار ديني,
عمر كان ممثل كبير أوي شارك في فيلم إيطالى اسمه “العملية الأخيرة 008” مع الممثل إنجريد سكلر، وألبرتو لوبو وفي آخر 4 سنوات من عمره كان مصاب بالكانسر مشافش فيهم عادل امام خالص حتى بعدما طلب يشوفه عادل رفض.
وفي يوم كان على المسرح ووقع فجأة، فتم نقله لمستشفى الشروق وبعدها بـ 4 أيام غادر الحياة وتحديدا يوم 16 اطتوبر سنة 2011.
