الكثير من الناس يعتقدون ان الأموال قد تشتري أي شئ، ولكن الواقع عكس ذلك تمام، قد تجد أن العديد من الفنانيين قدموا أعمال خارج بلادهم من أجل الموال، ولكن البعض الآخر رفض، وفيروز واحدة من هؤلاء الشخاص، فماذا فعلت عندما قدمت السعودية عرض خيالي لها للعودة للغناء؟ هذا ما سنتعرف عليه من خلال التالي:
جارة القمر الفنانة فيروز، اللي وحشتنا كلنا وبقالها زمان غايبة عن المسرح، شكلها هتوحشنا أكتر، بعد ما رفضت عروض كتير بفلوس مغرية جدا، ولحد دلوقتي محدش عارف هي ليه مختفية.
في حالة من الغضب في السعودية .. بعد ما رفضت فيروز عرض مغري بـ 5 مليون دولار عشان تغني زي نجوم ومطربين كتير في موسم الرياض.. تخيلوا كده فيروز على مسرح أبو بكر سالم وفي البوليفارد.. شيء خيالي.
ملايين كتير رفضتها جارة القمر اللي كلنا ياما حبينا واتحبينا على صوتها.. اتشوقنا نسمعها لايف بعد ما بطلت تظهر كتير وتسافر بعيد عن بيتها وبلدها لبنان.. حتى لما المشاهير حبوا يزوروها.. بقوا يروحوا عندها على البيت.. وطبعا أهمهم إيمانويل ماكرون رئيس فرنسا، اللي كان آخر ظهور ليها في صور معاه وهو عندها.. فيروز رافعة شعار “مطلعش بره بيتي أبدا.
الغناء في السعودية فرصة كبيرة، جماهير عريضة مستنية كل نجومهم المفضلين يجوا عندهم ويحضروا حفلاتهم ويسمعوا أغانيهم بعد الطفرة الكبيرة اللي حصلت في المملكة.. وكان كل أملهم تيجي فيروز وتطل عليهم زي القمر وتغني “نسم علينا الهوا من مفرق الوادي”.
بس فيروز بتاريخها الكبير هي أذكى من إنها ترفض عرض بشكل واضح.. لكنها حتى الآن مبتديش أي إجابة قاطعة.. طبعا الحدق يفهم إنها بترفض، خصوصا إنه الأجر اللي معروض عليها هو الأكبر في مسيرتها كلها.
لا ده مش بس كده ده ممكن يكون الأعلى أجرا في العالم كله، بس دي مش أول مرة ترفض جارة القمر أرقام بملايين الدولارات، من كام سنة كده اتعرض عليها مليون دولار.. وبرضه رفضت ومظهرتش
فيروز دلوقتي عمرها تقريبا 88 سنة، يمكن ده السبب اللي مخليها مش قادرة ولا عاوزة تطلع تظهر للجمهور، وبتحاول تحافظ على صورتها اللي دايما كانت بهية في نظرهم، كانت بتطلع على المسرح تقف بشموخ محدش كان بيستوعبه.. جميلة ومتمكنة وفنانة حقيقية.
آخر حفلة قدمتها فيروز كانت سنة 2012 على مسرح بلاتيا في بيروت، وقالتها وقتها إنها الحفلة الأخيرة ليها بس رجعت نهاد حداد وده اسمها الحقيقي اللي ناس كتير بتنساه، وطرحت أغنية في ذكرى رحيل جوزها الموسيقار عاصي الرحباني، وكانت بعنوان “لمين” ورغم كبير سنها إلا إنها صورتها بطريقة الفيديو كليب
السؤال هنا.. هل الأمل معدوم إننا نشوف فيروز تاني على المسرح؟.. بنسبة كبيرة آه.. لكن هي رجعت في قرارها قبل كده مرة واحدة في حياتها وتحديدا سنة 1992 بعد انتهاء الحرب الأهلية في لبنان.. وغنت وسط بيروت برعاية رئيس الحكومة الراحل رفيق الحريري
كان بقالها حوالي 6 سنين منقطعة بعد رحيل زوجها عاصي الرحباني وبعدت عن الفن كله.. وساعتها غنت بحزن وقالتله:” سألوني الناس عنك يا حبيبي .. لأول مرة ما بنكون سوا “.. وقد ايه كان لحظة صعبة عليها.. عشان كده رجعت تاني في قوقعتها.. بس احنا بنقولها وحشتينا يا صوت لبنان.
