الشهرة يمكن تغير أشياء كثيرة في الناس، وممكن بسبب الشهرة نجد أن طريقة بعض الفنانيين تغيرت في اختيار الملابس وبعضهم يضطر لتغيير أسمه ، تابعونا لمرفة أشهر هؤلا النجوم واسبابهم.
يمكن كتير من المشاهير إحنا نعرفهم بالاسم الفني بتاعهم، لكن منعرفش إنهم قبل الفن كان ليهم أسامي تاني ولكن الشهرة ليها أحكامها بقى، وأحيانا الأسامي بيتغير عشان يختاروا اسم سهل النطق، ويعلق في دماغ الناس بسهولة، وكمان يكون مختلف ومميز عن الأسماء العادية الموجودة على الساحة.
من بين المشاهير اللي غيروا اسمه، هي الفنانة جوري بكر، واللي متألقة خلال موسم رمضان الحالي، من خلال دور دلال في مسلسل جعفر العمدة، واللي غيرت اسمها من لما كان عمرها 19 سنة، من أول ما عملت فيسبوك، كانت عايزة تعمل اسم مختلف وجذاب، فسمت نفسها جوري بكر، ولكن هي اسمها الحقيقي شيماء محمد أبو بكر.
كمان عندنا الكوميديانة شيماء سيف، ودي كان ليها اسم تاني قبل الشهرة، وهي حكت في مرة من المرات عن سبب تغيير اسمها واللي مكنش متعلق أوي بموضوع الشهرة قد ما كان بحاجة نفسية عندها، وهي علاقتها الصعبة بوالدها، الفنانة شيماء سيف اسمها الحقيقي هو شيماء فتحي، ولكن سمت نفسها على اسم أول مخرج اشتغلت معاه واللي كانت بتعتبره حد مقرب منها.
عندنا كمان الفنانة مي عز الدين ودي من المشاهير اللي غيروا اسمهم والكلام ده كان مع صدور فيلم «رحلة حب» لما قالولها نكتب اسمك ايه على التتر فاختارت اسم مي، وهو الاسم اللي بينادوها بيه أهلها وصحابها أصلا، ولكن هي اسمها الحقيقي ماهيتاب، ولكن غيرت اسمها لأن ماهيتاب اسم تقيل على اللسان وكانت محتاجة اسم سهل على الناس.
الفنانة زينة كمان من النجوم اللي غيروا اسمهم عشان يتناسب مع الشهرة، وهي طبعا في موسم رمضان الحالي بتلعب دور عايدة مرات جعفر العمدة وخاربة الدنيا يعني، وهي كان اسمها الحقيقي وسام رضا، ولكن لما دخلت مجال التمثيل غيرت اسمها لزينة.
عندنا كمان الفنانة نور اللبنانية، وهي من النجمات الجميلات ومحبوبة في مصر واشتغلت في أعمال فنية كتير، ويمكن ناس كتير متعرفش اسمها الحقيقي، ولكن هي لما دخلت عالم التمثيل قررت تختار اسم سهل في النطق فاخترات نور، ولكن هي اسمها الحقيقي ماريان.
الفنانة روبي من النجمات اللي غيروا اسمهم لاسم فني أسهل وأخف، وكان سبب تسميتها هو المخرج الراحل يوسف شاهين، واللي كان بيناديها دايما بالاسم ده فحبته واختارت إنه يكون اسمها الفني، ولكن هي اسمها الحقيقي رانيا حسين محمد توفيق.
طبعا عندنا من الأجيال القديمة كتير من النجمات غيروا اسمهم لأسماء فنية زي الفنانة يسرا واللي اسمها الحقيقي سيفين، وكمان الفنانة لبلبة واسمها الحقيقي نينوتشكا مانوك كوبليان، والفنانة بوسي واسمها الحقيقي صافيناز مصطفى قدري، والفنانة نجلاء فتحي اللي اختارلها المنتج رمسيس نجيب الاسم ده وهي اسمها الحقيقي فاطمة الزهراء حسين، وغيرهم كتير من النجمات.
