الفنانة نيللي كريم كعادتها كل سنة تقدم شخصية وقصة أصعب من التي سبقتها، تبذل مجهود في رمضان لكي تطور مهاراتها التمثيلية، وفي النهاية مسلسلها يكون الأنجح والأشهر طول الـ 30 يوم، ولكن هذا العام هي في اختبار صعب جدا، صعيدية لأول مرة، فماذا ستقدم؟
عملة نادرة هو اسم مسلسل الفنانة نيللي كريم في رمضان السنة دي.. اللي بتقدم فيه شخصية ست صعيدية اسمها نادرة.. بتحارب العادات والتقاليد.. والأسوء هي الأفكار الصعيدية المتجمدة من سنين طويلة.
نيللي كريم بعد ما ناقشت السنة اللي فاتت قضية الطلاق والظلم اللي بيتحط على الست بسبب قانون الأحوال الشخصية.. وعملت نقلة كبيرة في المجتمع وفي الفكر القانوني نفسه.. المرة دي داخلة في عش الدبابير.
معروف إن قضية الميراث.. وإن الست تاخد حقها الشرعي من أهل زوجها المتوفي أو اخواتها حتي.. أزمة لسه متحلتش في مدن وقرى كتير.. وخصوصا في الصعيد.. وده كان عش الدبابير اللي قررت نيللي كريم تدخل فيه بقلب جامد.
مسلسل عملة نادية بيشهد صراعات كبيرة بين عيلتين هما “عبدالجبار”، و “أبو عصايا”.. واحدة مهم هي عيلة زوج نيللي كريم أو نادرة المتوفي.. بيحاول عبد الجبار ( اللي بيقوم بدوره الفنان جمال سليمان) قتل نادرة (نيللي كريم) وابنها بسبب الورث.. ازاي هتقدر نادرة تحمي نفسها وابنها من الظالم اللي واكل حقها.. وتعمل ثورة على الظلم ده.. ده اللي هنشوفه مع نيللي كريم في رمضان السنة دي.
نادرة اللي بتعيش معاناة التفرقة والحرمان اللي بيحاصر المرأة.. ويمنعها إنها تورث أرض جوزها.. هترفض العرف ده والتقليد اللي ظلم ستات كتير من زمان.. وهتواجه مشاكل كثيرة جدا.. ربنا يستر يا نيللي.
والحقيقة إنها مش لوحدها في العمل.. معاها قوة ضاربة من النجوم والنجمات اللي كل واحد فيهم مباراة تمثيلية لوحده.. كمال أبو رية وندى موسى.. وجومانا مراد.. ومريم الخشت.. وطبعا اللي الناس كلها مستنياه أحمد عيد اللي بيقدم دور جد وشرير لأول مرة في حياته بعد ما كان نجم شباك كوميدي وأفلامه محققة نجاحات كبيرة.. واختفى فجأة.
المسلسل من تأليف مدحت العدل.. اللي نجحت معاه نيللي من 5 سنين في مسلسل “لأعلى سعر”.. وإخراج ماندو العدل اللي كان مخرج مسلسل “فاتن أمل حربى” السنة اللي فاتت.. ومعروف إن نيللي كريم والعدل جروب بينهم شراكة ممتدة ودايما بتحقق نجاحات كبيرة.
على قد ما في تخوفات بس نيللي كريم كل سنة بتثبت إنها قد المهمة.. وشخصيتها اللي بتقوى وبتتغير مع الوقت بتديها فرصة إنها تقدم أحسن ما عندها.. صحيح السنة دي في مسلسلات صعيدي كتير.. بس مش كلها هتبقى على قد المسئولية والتوقعات.. فا ربنا يستر.
