بعد ما محمد رمضان قدم مسلسل جعفر العمدة الذي كان متجوز فيه 4 ستات ، الناس بدأت تسأل أكثر عن حياته الشخصية وعن زوجته في الحقيقة ، ومن هي وماذا تفعل في حياتها؟
ومن ساعة ماظهر رمضان على الشاشة وكلنا عارفين ان مراته من خارج الوسط الفني وملهاش في التمثيل ، هي بس بتظهر معاه في الصور اللي بينشرها والايفنتات والحفلات لكن تمثيل وكاميرات لأ.
محمد في الاصل راجع صعيدي واهله من قنا ، وعنده عقدة الراجل الشرقي ورافض تماما ان مراته تكون ممثلة ، رغم انها لو حبت تدخل التمثيل دلوقتي هتقدر وبسهولة لأنها طبعا مرات محمد رمضان ، لكن هو مانعها من التمثيل نهائي ورافض الفكرة.
ولما اتجوز محمد رمضان نسرين في 2012 كان نجم ومعروف وبدأ يحقق الشهرة اللي هو فيها دلوقتي ، لكنه برضه كان مصر على انها متمثلش وكفاية عليها البيت والاولاد.
وناس كتير فاكرة ان رمضان متجوز اتنين حاليا، لكن الحقيقة لا هو اتجوز مرتين مش اتنين ,, تعالى احكيلك.
محمد سنة 2008 اتجوز مراته الأولانية وكانت محجبة وخلف منها بنته الكبيرة حنين ، وعاشوا مع بعض 4 سنين بس وبعدها انفصلوا ومحدش يعرف سبب الانفصال ايه لحد دلوقتي وهو مش بيتكلم عن القصة دي خالص.
وفي نفس السنة اللي انفصل فيها رمضان عن زوجته الاولى في 2012 ، اتجوز الجديدة نسرين عبد الفتاح وخلف منها علي وكنز ولاده اللي دايما بنشوفهم معاه في الصور.
ومن وقتها لحد دلوقتي محمد ونسرين عايشين مع بعض وهي شاركته مسيرة نجاحه لأنه من بعد جوازهم بدأ يحقق الشهرة والنجاح اللي هو فيه دلوقتي، شكلها كدا كانت وش السعد عليه.
وكل مرة كان بينجح فيها رمضان كان بيرفض ان مراته نسرين تدخل المجال حتى لو هتمثل معاه ، لكن هو متفق معاها انها هتكون شريكته وتهتم بيه وباطفالهم بس ومفيش ولا شغل ولا تمثيل.
وقصاد انها متمثلش بقى محمد رمضان معوضها بشكل تاني ، يعني بياخدها معاه في كل سفرياته وحفلاته واحيانا في التصوير.
ودايما بنشوف صور ليهم مع بعض وهما في الطيارة لو مسافر عنده حفلة او حاجة برا مصر ، فبيكون حريص ان ولاده ومراته يكونوا معاه في كل حاجة بيعملها ، ودي نقطة تحسب لرمضان انه مشارك زوجته وولاده معاه ومش سايبهم ومنطلق في حفلاته جوا وبرا.
محمد رمضان رغم انه مانع مراته تمثل الا انه دايما بيحب ينشر صوره معاها على انستجرام ويقولها اد ايه هو بيحبها وبيقدرها قدام الناس ، ومعترف بمجهودها معاه وانها شريكته في النجاح اللي وصله.
كمان علاقته بولاده علي وكنز وحنين الكبيرة حلوة ودايما بيكلم جمهوره عنهم وبيحاول يقوم بدوره كأب ويقضي وقت مع ودلاه ويجيبلهم كل اللي نفسهم فيه وكأنه بيعمل اللي متعملش معاه وهو صغير.
علي عنده 9 سنين وكنز عندها 5 سنين ، ورمضان مدخلهم مدرسة انترناشونال وظهروا معاه في حلقة راس السنة مع منى الشاذلي مع باباهم ، ودي كانت اول مرة يطلعوا في برنامج وواضح اد ايه هما اشقية جدا.
وولاده قالوا ان باباهم بيلعب معاهم كتير في البيت وبيعملهم اجواء حلوة ، وكمان بياخد رأيهم في اي اغنية جديدة قبل ما يعملها ويسمع وجهة نظرهم وبيقتنع برأيهم وبيعمل اللي هما بيقولوه.
اما حنين بقى بنته الكبيرة فهي ملهاش في التمثيل لكن بتحب التيك توك وعندها حوالي 150 الف متابع وساعات باباها رمضان بيصور معاها فيديوهات وبتنشرها.
، ولسة كانت منزلة فيديو من يومين وناس كتير هاجمتها بسبب انها طالعة ترقص مع صحابها في المدرسة وبيصوروا فيديو.
وقبل كدا نشر رمضان صورة ليه وهو في البيت مع بناته ، وكتب : بناتي حبايبي حنين وكِنز محمد رمضان.. ربنا يحفظهم ويحفظ بناتكم جميعاً».
وحنين عندها تقريبا 15 سنة ، وبتحب الغنا والجولف جدا ، وكان بابها بيتعلم معاها اللعبة ونشروا صور ليهم وهما بيلعبوا الجولف ، كمان ظهرت معاه في كليب مصباح علاء الدين اللي عمله من كام سنة.
محمد رمضان حريص على علاقته بولاده ومشاركهم معاه في شغله وبياخدهم معاه في كل حتة ومدلعهم اخررر دلع.
