بطل الجمهورية في الكونغ فو..قصة جان رامز طفل فيلم البعبع

مشاركة الأطفال في الأعمال الفنية واكتشافهم أمر موجود  من زمان وليس بجديد ولكن بعض هؤلاء الاطفال يكمل مسيرته الفنية والبعض الآخر يبتعد .

ولكن الأكيد إن اختيار الأطفال دول بيكون معتمد على وسامتهم ولباقتهم وشقاوتهم، وازاي بيقدروا إن هما يجذبوا انتباه الجمهور ويكونوا خفاف على الكاميرا، وآخر طفل عامل قلق بقى، كان الطفل جان رامز، نجم فيلم البعبع..

سكريبت
الطفل جان رامز عامل قلبان من ساعة ما بدأ يظهر وبتكلم والناس تعرفه، وده بسبب خفة دمه وحركاته وسرعة البديهة اللي عنده طول الوقت وهو بيتكلم، وناس كتير بتسأل هو مين الطفل ده وايه حكايته، وطلع منين.

جان رامز مشارك في فيلم البعبع من بطولة أمير كرارة وياسمين صبري ومحمد أنور ومحمد عبدالرحمن، ومن إخراج حسين المنباوي، وهو واحد من الأعمال الفنية اللي شاركت في موسم عيد الأضحى اللي فات، وقدر يحقق نجاح معقول وسط الأعمال المشاركة.

الفيلم حقق المركز التالت في ترتيب الإيرادات، وتخطى الـ20 مليون جنيه لحد دلوقتي، وهو بيتكلم عن يوم في حياة مجرم اسمه سلطان لسة خارج من السجن، وكان هيعمل عملية إجرامية وحصل بقى شوية حاجات وبيكتشف إنه عنده ولاد، ولازم يحميهم من العصابات اللي بتطارده.

المهم يعني واحد من ولاده دول هو الطفل جان رامز، واللي عليه العين والكلام، واللي أمير كرارة قال عنه أشعار وإنه هيكون ليه مستقبل كبير.

تقدر بسهولة لما تشوف جان رامز على الشاشة، تعرف إن هو طفل موهوب جدا، وبشكل مش طبيعي كمان، هو مش مجرد واحد دمه خفيف، لأنه وهو في عمر 6 سنين واعي وفاهم وبيقول ايه وبيعرف يعبر ويتكلم ويرد، وبيعرف يأدي كويس جدا ومش بيتكسف من الكاميرا وذهنه حاضر، لدرجة إن أمير كرارة بيقول إنه بيبقى محضر للمشاهد وبيدخل يقترح حاجات برة السيناريو يقولها.

جان رامز في أولى ابتدائي وهو مبيروحش المدرسة وبيجيلوا مدرسين البيت يعلموه، لأنه خايف يروح المدرسة يتعور، خصوصا إن هو طفل نجم دلوقتي.

في لقاء معاه قال إن مثله الأعلى هو النجم حمادة هلال، لأن هو اللي قدمه أول مرة واكتشفه لما ظهر معاه في كليب أغنية «تاكا تاكا» ومن بعدها ربنا كرمه بقى وجاله فيلم البعبع مع أمير كرارة، وبيعتبر إن الكليب ده أول سلمة ليه في مشواره، وإن الفيلم ده تاني سلمه.

ولكن هو اتعرف منين؟ من خلال فيديوهات يقدمها على مواقع التواصل والحسابات اللي بيديرها والده، وهو بيعمل سلسلة فيديوهات قصف جبهات، واللي محققه انتشار كبير، ومن خلالها شافه حمادة هلال وجابه معاه أول مرة عشان يبدأ مشواره.

جان رامز بيحب التمثيل مش واخد الموضوع كدة وخلاص، يعني ناوي يكمل ويكبر في المجال ده ويعمل حاجة كبيرة، وهو عنده مؤهلات كويسة ولو قدر إنه يشتغل على نفسه ويكمل هيعمل حاجة كويسة.

أحرج أمير كرارة لما راح معاه برنامج منى الشاذلي لأنه دخل عليها ببوكيه ورد، وأمير كراراة دخل بإيده فاضية، وساعتها أمير قاله إنت هتوصل.

بيقول عن أمير كرارة نجم وأستاذ وبيخاف يضياقه عشان بقول كل مرة يشوفني في الاستوديو بيضربني على قفايا، طبعا بهزار يعني، وقال إنه عامل دور عيل لزقة.

بيحب كمان محمد عبدالرحمن توتا، وبيقول عنه ده صاحبي.جان رامز كمان لاعب كونغ فو وواخد بطولة الجمهورية، وبيحب تربية الكلاب والحيوانات.