تخيلوا إن الموضوع حقيقي وبعد المطالبات بتغيير نهاية مسلسل جعفر العمدة وأن تكون نهاية مختلفة للقصة التي حيرت جماهير مصر والعالم العربي على مدار ولكن لماذا؟ تابعونا لمعرفة القصة:
على مدار اليومين اللي فاتوا طلع كلام كتير إن مسلسل جعفر العمدة نهايته إن محمد رمضان يلاقي ابنه وينتصر على أعدائه.. وكإنه بطل قومي وشعبي.. وده خلا ناس كتير تبقى متضايقة.. إنه رغم حلاوة المسلسل وقصته المحبوكة جدا.. إلا إنه في الآخر البطل ده عمل حاجات كتير خارج القانون.. ولازم يبقى في حساب.
طبعا ناس كتير قالت استحالة.. وأصلا المسلسل خلص تصويره من قبل رمضان.. وخلاص last order.. شطبنا يا زينب على رأي رمضان حريقة.. طلع إن مفيش مستحيل.. وإنه عادي جدا نرجع لوكيشن التصوير ونغير النهاية.. الورق ورقنا والدفاتر بتاعتنا.
اتقال كلام كتير إن المخرج محمد سامي أصلا سافر بره مصر.. وهيفضل في دبي لغاية بعد العيد.. ومفيش كلام عن إعادة التصوير ولا حاجة.. وفي نفس الوقت لا في مصادر من جوه مدينة الإنتاج الإعلامي قالوا فعلا إنه جه من كام يوم هو ومحمد رمضان وفتحوا اللوكيشن تاني.. وفي سرية تامة صوروا كام مشهد.. بالأمارة فيهم الفنانة هالة صدقي.
وبعدها على طول وكعادة أبطال مسلسل جعفر العمدة.. اللي هيجيبوا انهيار للمخرج محمد سامي على آخر رمضان.. طلع واحد من الأبطال وأكد المعلومة.. وقال فعلا هما بيصوروا مشاهد تاني دلوقتي.. بس “جيس وات”.. مش بيغيروا النهاية ولا حاجة.
الفنان طارق النهري.. عميد عائلة فتح الله.. اللي هيشوفوا الويل في نهاية المسلسل.. وأصلا لو نزلوا الشارع الجمهور هيجري وراهم بالشباشب.. كشف سبب إعادة تصوير مشاهد من مسلسل جعفر العمدة في تصريحات ليه.
وقال حمادة فتح الله.. إنه المشاهد اللي اتعاد تصويرها دي مش تغيير للنهاية ولا حاجة.. خلاص اللي ذاكر ذاكر.. بس للأسف في مشاهد في العمل فيها عيب هندسي.. وقرر المخرج يتعاد تصويرها عشان تخرج في أحسن صورة.
الأكيد بقى إن محدش من ابطال مسلسل جعفر العمدة.. غير محمد رمضان.. يعرفوا حاجة عن مسار العمل.. كل واحد دخل العمل .. صور مشاهده .. وخلص قصته ومشي.. في ناس متعرفش مصير الأبطال التانيين أصلا.
على عكس زوجات جعفر اللي موجودين في كل حلقة.. ومعاهم الـ 30 حلقة من أول التصوير.. وعارفين كل حاجة.. ومدكنين.. صحيح بيلقحوا على بعض على السوشيال ميديا.. وكل واحدة فيهم بتقول للتانية أنا ممكن أقول هيحصلك ايه عادي.
في معلومة كمان مهمة جدا.. بعد ما اتقال الفترة اللي فاتت إن الفنانة زينة متخانقة مع محمد سامي بسبب إن نهاية المسلسل مش عجباها.. وعشان كده لا بتروج له على السوشيال ميديا ولا بتحتفل بنجاحه معاهم.. وارد جدا يكون محمد رمضان اتوسط للصلح بينهم.. وقرروا إنهم ميزعلوهاش.. وده هيبقى تويست جامد في الأحداث.. نبقى نعمله فيديو لوحده.. يلا سلام بقى دلوقتي.
